¹ Apas koa aku nee': Sasidie, sabuah pintu tabuka' ka saruga ba suara nang dee udah ku nangar, bakata ka aku aya bunyi sangkakala, jakatae: Naiklah kadian Aku mao'k nojokatn ka kao ahe nang harus jadi aka'k nyian. ² Tarus aku dinguasai'k di Roh ba tee'lah, sabuah tahta badiri ka saruga, ba ka tahta koa duduk Seko' urakng. ³ Tarus Ia nang duduk ka tahta koa tolen aya permata yaspis ba permata sardis; ba manturaja ngulilingi'k tahta koa bakilau-kilau aya tolen batu jamrut. ⁴ Sakuliling tahta koa ada dua puluh ampat tahta, ba ka tahta-tahta koa duduk dua puluh ampat tua-tua, nang make pakean putih ba mahkota amas ka kapalae. ⁵ Tarus dari tahta koa kaluar kilat ba bunyi guntur nang baguruh, ba tujuh obor nang nyala ka adapatn tahta koa; koalah tujuh Roh Jubata. ⁶ Ba ka adapatn tahta koa ada laotan kaca aya kristal; ka tangah-tangah tahta koa ba sakulilingnge ada ampat mahluk barinsi'k di mata, ka sabalah muha ba ka sabalah baikakng. ⁷ Adapun mahluk nang doho'k aya tolen singa, ba mahluk nang kadua sama aya tolen sapi, ba mahluk nang ka talu ada ba muha aya tolen muha manusia, ba mahluk nang ka ampat sama aya tolen burukng pamakatn bangke nang gik tarabakng. ⁸ Ka ampat mahluk koa masing-masing baseap anam, sakulilinge ba ka sabalah daapme barinsi mata, tarus ina baranti-ranti mahluk koa ngampak siakng ba maam: "Kudus, kudus, kuduslah Tuhan Jubata, Nang Mahakuasa, nang udah ada ba nang ada ba nang akan atakng." ⁹ Tarus satiap kai mahluk-mahluk koa mare' puji-pujian, ba hormat ba ucapan sukur ka Ia nang duduk ka atas tahta koa, ba kabatnne koa nyambah Ia nang idup sampe salama-lamae, ¹⁰ lalu basujutlah kaduapuluh ampat tua-tua koa, tarus kabatnne koa nyambah Ia nang idup sampe salama-lamae. Lalu kabatnne koa nabakatn mahkota-mahkotae ka adapatn tahta koa, sambi bakata: ¹¹ "O Tuhan Jubata kami, Kao pantas narima'k puji-pujian ba hormat ba kuasa; barang Kao minjawat sagala sasuatu; ba kamaoanNyu lah samua koa dipinjawat."