¹ TULISATNLAH ka malaekat jemaat ka Efesus: Nyianlah pakataatn dari Ia, nang nyingii'k batujuh bintakng koa ka kokot kanan-Ne tarus bajaatn kaantara katujuh lampu amas badiri koa. ² Aku nauan sagala pakarajaatnnyu: baik kapa'k lalahnyu gek pun katekunannyu. Aku nauan, kade' kao ina sabar ka na' urakng-urakng jahat, kade' kao udah nguji kabatnne nang nyabut diri'k e rasul, tapi nang sabanare ina ayakoa, kade' kao udah namuan kabatnne koa pangalok. ³ Tarus kao tatap sabar ba mandarita di dama-Ku, ba kao ina nauan latih. ⁴ Tapi biarpun ayakoa aku tatap mencela kao barang kao udah ningaatn kasihnyu nang samula. ⁵ Untu'k koa ingatlah daapm sidi kao udah jantu'! Batobatlah ba karajaan agik ahe nang samula kao ngarajaan, Kade' ina ayakoa, Aku akan atakng ka kao ba Aku akan naap lampu amasnyu dari tampatte, kade' kao ina batobat. ⁶ Tapi nyian nang ada ka kao, kao teget ka sagala pabuatan pangikut-pangikut Nikolaus, nang Aku ugak teget. ⁷ Sae nang batarenyekng, haruslah nangaratn ahe nang dingataatn Roh ka na' jemaat-jemaat: Saepun nang manang, ia ana akan Aku bare'k makatn dari puhutn kaidupatn nang ada ka Taman Pirdaus Jubata." ⁸ "Ba tulisatnlah ka malaekat jemaat ka Samirna: Nyianlah pakataatn dari Nang Awal ba Nang Ahir, ba nang udah mati tapi idup agik: ⁹ Aku nauan kasusahatnnyu ba kamiskinannyu - tapi kao kaya - ba fitnah dangan, nang nyabut diri'k e urakng Yahudi, tapi nang sabanare buke' ayakoa: sabalikke kabatnne koa jemaah Ibalis. ¹⁰ Ame gai' ka ahe nang harus kao tagaratn! Sasidie Ibalis ana akan nabakatn sangahe urakng dari antara nyu ka daapm pinjara supaya kao dicobai ba kao ana akan namu kasusahatn salama sapuluh ari. Haruslah kao setia sampe mati, ba Aku akan ngaruniaatn ka kao mahkota kaidupan. ¹¹ Sae nang batarenyekng, haruslah ia nangaratn ahe nang dingataatn Roh ka jemaat-jemaat : Barang sae nang manang, ia ina akan menderita ahepun di kamatian nang kadua. ¹² "Ba tulisatnlah ka malaekat jemaat ka Pergamus: Nyianlah pakataatn-Ne, nang make pedang nang tajapm ba mata dua: ¹³ Aku nauan dimae kao diapm, yakoa dinaun, ka tampat kadiaman Ibalis; kao bapegang ka dama-Ku, ba kao ina nyangkal imannyu ka-Aku, ina ugak ka jaman Antipas, saksi-ku nang setia ka-Aku nang dimunuh ka adapatnnyu, dimae Ibalis diapm. ¹⁴ Tapi Aku ada sangahe kabaratan ka kao: ka antaranyu ada sangahe urakng nang nunaan ajaran Bileam, nang mare' nasehat ka Balak untu' nyasatatn urakng Israel, biar kabatnne makatn persembahan berhala ba buat cabul uga'k. ¹⁵ Ayakoa ugak ada ka kao urakng-urakng nang bapegang ka ajaran pangikut Nikolaus. ¹⁶ Karna koa batobatlah! Kade' ina yakoa, Aku akan sabijake atakng ka kao ba aku akan baparang marangi kabatnne make pedang nang ka moot-Ku nyian. ¹⁷ Sae nang batarenyekng, haruslah ia nangaratn ahe nang dingataatn Roh ka jemaat-jemaat: Barangsaepun nang manang, ka ia ana Ku maok mareatn manna nang ina kateeatn; ba Aku ana maok mareatn batu putih, nang ka atase tatulis dama nang barahu, nang ina ditahui' disaepun, salain nang narima' ia. ¹⁸ "Ba tulisatnlah ka malaekat jemaat ka Tiatira: Nyianlah pakataatn Anak Jubata, nang mata-E aya tolen api nang nyala ba paha-E aya tolen timaga: Aku nauan sagala pakarajaatnnyu, baik kasihnyu gek pun imannyu, baik palayanannyu gek pun katekunan. ¹⁹ Aku nauan, kade' pakarajaatnnyu nang dah dudi labih manyak dari pada nang dah doho' ²⁰ Tapi Aku mencela kao, barang kao miaratn nang bini isebel, nang nyabut diri'k e nabiah, ngajar ba nyasatatn na' amba-Ku untu' babuat jinah ba makatn persembahan-persembahan berhala. ²¹ Ba Aku udah mare' ia waktu untu' batobat, tapi ia bai batobat dari dosae. ²² Tee'lah, Aku akan nabakatn ia ka atas ranjang urakng sakit ba kabatnne nang babuat jinah ba ia akan kutabakatn ka kasusahatn nang aya'k, kade' kabatnne ina batobat dari pabuatan-pabuatan koa. ²³ Ba anak-anakke mao'k ku matiatn ba samua jemaat akan nahui'k, kade' Akulah nang nguji batin ba ati urakng, ba Aku mao' maasatn ka kao ka satiap urakng sasuai kalakuanne. ²⁴ Tapi ka kao, urakng-urakng lain ka Tiatira, nang ina ngikuti'k ajaran koa ba nang ina' nyalidiki' ahe nang dangan nyabut soal Ibalis, ka kao Aku bakata: Aku bai nanggongngan tanggongan lain ka kao. ²⁵ Tapi ahe nang ada ka kao singiiklah koa sampe Aku atakng. ²⁶ Ba saepun nang manang ba ngarajaan pakarajaatn-Ku sampe ahir, ka ia ana akan ku bareatn kuasa atas bangsa-bangsa; ²⁷ tarus ana ia akan mamarentah kabatnne ba tungkat basi; kabatnne ana akan ia ancuratn aya tolen tapayatn tukang tanah liat sama aya tolen nang Ku narima'k dari Apak-Ku ²⁸ ba ka ia ana Aku mao'k mareatn bintakng timur. ²⁹ Sae nang batarenyekng, haruslah ia nangaratn ahe nang dingataatn Roh ka jemaat-jemaat.