¹ Nyianlah wahyu Yesus Karistus, nang dimareaatn Jubata ka-Ia, biar Ia nojokatn ka amba-amba-E ahe nang haruse sabijake jaji. Ka malaekat-E nang Ia ngutus, Ia udah matakatn ka amba-E Yohanes. ² Yohanes udah basaksi parihal Jubata ba parihal kasaksian nang di mareaatn di Yesus Karistus, yakoa sagala parihal nang udah ia nee'. ³ Repolah ia nang macaatn ba kabatnne nang nangaratn kata-kata nubuat nyian, ba nang nuruti ahe nang tatulis kadaapme, barang waktue udah samak. ⁴ Dari Yohanes untu' tujuh Jemaat nang ka Asia Enek: Kasih karunia ba damai sajahtra nonoi'k kita', Dari Ia, nang ada ba nang udah ada ba nang ana mao' atakng, ba dari katujuh roh nang ada kaadapatn tahta-E, ⁵ ba dari Yesus Karistus, Saksi nang setia, ba nang doho'k bangkit dari antara urakng mati ba nang bakuasa ka atas raja-raja ka dunia nyia. Untu' Ia nang ngasihi' diri'k ba nang udah ngalapasatn diri'k dari dosa diri'k di darah-He- ⁶ ba nang udah minjawat diri'k sote' kerajaan, jaji imam-imam untu' Jubata, Apak-E,- untu Ia lah kamuliaan sampe salama-lamae. Amin. ⁷ Tee'lah, Ia atakng ba na' rahu'k-rahu'k ba samua mata ana nee'ak Ia, ba kabatnne ugak nang udah nikam Ia. Ba samua bangsa ka dunia akan nangisi'k Ia. Auk, Amin. ⁸ "Aku lah Alfa ba Omega, pakataatn Jubata, nang ada ba nang udah ada nang ana akan atakng, Nang Mahakuasa." ⁹ Aku Yohanes kamaruk ba ayukngnyu daapm kasusahatn, daapm Kerajaan ba daapm ketekunan ngantiatn Yesus, ada ka pulau nang badama Patmos barang oleh pakataatn Jubata ba kasaksian nang dimareatn di Yesus Karistus. ¹⁰ Ka ari Jubata aku dinguasai'k di Roh aku nangar dari balakangku suara nang nyarekng, aya bunyi sangkakala, ¹¹ jare: "Ahe nang kao nee', tulisatnlah ka daapm sote' kitab ba kirimanlah ka na' tujuh jemaat nyian: ka Efesus, ka Samirna, ka Pergamus, ka Tiatira, ka Sardis, ka Filadelpia ba ka Laodikia." ¹² Tarus aku malek untu' nee' suara nang bakata ka aku. Apas koa aku malek, kateeatnlah ka aku tujuh lampu badiri dari amas. ¹³ Ba katangah-tangah lampu koa ada urakng nang nyarupai' Anak manusia, bapakean jubah nang panyakngnge sampe ka paha, ba dadae baikat pingakng nang dingalilit dari amas. ¹⁴ Kapala ba buuk-Ke putih aya tolen bulu nang putih sidi, ba mata-E aya tolen api nang nyala. ¹⁵ Ba paha-E mangkilap aya timaga babara ka daapm pumputn api, suara-E aya bunyi ai'k bah. ¹⁶ Ba ka kokot kanan-Ne Ia nyingi'ik tujuh bintakng ba dari moot-Te kauar sete' pedang tajapm bamata dua, ba muha-E basinar-sinar aya tolen mataari nang angat. ¹⁷ Sawaktu aku nee' Ia, tasongkop aku ka adapatn paha-E aya tolen urakmg mati; tapi Ia narohi' kokot kanan-Ne ka atasku, tarus bakata: "Ame gai'k! Akulah Nang Awal ba Nang Ahir, ¹⁸ ba Nang Idup. Aku udah mati, tapi tee'lah, Aku idup, sampe salama-lamae ba Aku nyingii'k sagala kunci maut ba kunci kerajaan maut. ¹⁹ Untu' koa tulisatnlah ahe nang udah kao nee', baik nang udah terjadi angkitn, gek nang ana apas nyian. ²⁰ Ba rahasia tujuh bintakng nang udah kao nee' ka kokot kanan-Ku ba tujuh paha lampu amas koa, tujuh bintakng koa malaekat tujuh jemaat, tujuh lampu amas badiri koa tujuh jemaat."