¹ Sawaktu Yesus ba murit-murit-Te udah samak Yerusalem, samak Betfage ba Betania nang barada ka Bukit Zaitun, Yesus nyuruh dua urakng murit-Te ² Ia bapasatn: "Ampuslah kakampokng nang kaadapatnnyu koa. Sawaktu kao taama'k dikoa, kao langsung ana namuan seko' keledai muda'k taikat, nang nape'k suah ditaiki'k diurakng. Lapasatnlah keledai koa ba icaknglah ka dian. ³ Ba kade'k ada urakng nang bakata ka kao: Ngahe kao yakoa, sahuti'klah: Tuhan mararuatn ia. Ia ana bijak muangan ia kadian agik." ⁴ Kabatnne koa pun ampus, ba namuan seko'k keledai muda'k nang taikat ka depan pintu luar, ka sisi maraga, tarus dingalapasatn. ⁵ Tarus sangahe urakng nang ada dikoa bakata ka kabatnne: "Ahe maksutte kao ngalapasatn keledai koa?" ⁶ Tarus kabatnne nyahuti'k aya nang udah dingataatn di Yesus. Lalu urakng-urakng koa miaratn kabatnne. ⁷ Tarus kabatnne ngicakng keledai koa ka Yesus, ba ngalasi'k ia bapakean kabatnne, apas koa Yesus naik ka atasse. ⁸ Manyak urakng nang ngampar pakeanne ka maraga, ada uga'k nang nyabaratn ranteng-ranteng ijo nang kabatnne naap dari uma. ⁹ Urakng-urakng bajaatn kadepan ba kabatnne nang nunaan dari balakang ngampak: "Hosana! ¹⁰ Dibarakati'klah Ia nang atakng daaapm dama Tuhan, dibarakati'klah Kerajaan nang atakng, Kerajaan apak diri'k Daut, hosana katampat nang maha tingi!" ¹¹ Sasampe e ka Yerusalem Ia taama'k ka Bait Tuhan. Dikoa Ia nee'k samua e, tapi barang ari udah amper maam Ia kaluar ka Betania ba kaduabalas murit-Te. ¹² Ampagi e apas Yesus ba kaduabalas murit-Te ningaatn Betania, Yesus marasa kaparatn. ¹³ Ba dari jauh Ia nee'k pohotn ara nang udah badaukng, Ia nyamaki'k untu' nee'k kade'k-kade'k Ia namuan sesuatu ka pohotn koa. Tapi waktu Ia sampe dikoa, Ia ina'k namuan ahe-ahe salain daukng-daukngnge maan, barang memang buke'k munsim buah ara. ¹⁴ Tarus jakata-E ka pohotn koa: "Ame agi'k seko'k urakng pun makatn buahnyu salama-lamae!" Ba murit-murit-Te pun nangar. ¹⁵ Tarus sampelah Yesus ba murit-murit-Te ka Yerusalem. Apas Yesus taama'k ka Bait Tuhan, mulai'klah Ia ngoser urakng-urakng nang bajual-bali ka botang Bait Tuhan. Meja-meja panukar duit ba bangku-bangku padagakng burukng dara dimalik di-He, ¹⁶ ba Ia ina'k muihan urakng ngicakng barang-barang ngaintasi'k botang Bait Tuhan. ¹⁷ Tarus Ia ngajar kabatnne, jakata-E: "Buke'k me ada tatulis: "Rumah-Ku akan disabut rumah doa bagi sagala bangsa? Tapi kao nyian udah nyajiatn ia sarakng panyamun!" ¹⁸ Imam-imam kapala ba ahli-ahli Taurat nangar kajadian koa, ba kabatnne koa barusaha untu' munuha'k Ia, barang kabatnne gai'k ka Ia, nee'k samua urakng rami takjup ka pangajaratn-Ne. ¹⁹ Pas dah mao'k maam kabatnne kauas agi'k dari kota'. ²⁰ Aapm ari sawaktu Yesus ba murit-murit-Te lewat, kabatnne nee'k pohotn ara koa udah karikng sampe ka akar-akarre. ²¹ Tarus taringatlah Petrus ka ahe nang udah jadi, tarus ia bakata ka Yesus: "Rabi, tee'klah pohotn ara nang Kao ngutuk koa udah karikng." ²² Yesus bakata ka kabatnne: "Picaya'klah ka Jubata! ²³ Aku bakata ka kao: Sasidie saepun bakata ka bukit nyian: Pindahlah ba tatabakatn kadaapm laot! Asal ina'k bimbang ati e, tapi picaya'k, kade'k ahe nang dingataatn koa akan tajadi, maka hal koa akan tajaji untu' nyu. ²⁴ Barang koa Aku bakata ka kao: ahe maan nang kao minta' ba doakan, picaya'klah kade'k kao udah narima'k ia, maka hal koa akan dibareatn ka kao. ²⁵ Ba kade'k kao badiri untu' badoa, amponi'klah doho'k sakira'k e ada sasuatu daapm atinyu ka urakng, biar uga'k Apa'knyu nang kasaruga ngamponi;k kasalahan-kasalahannyu." ²⁶ [Tapi kade'k kao ina'k ngamponi'k, maka Apa'knyu nang kasaruga uga'k ina'k akan ngamponi'k kasalahan-kasalahannyu.] ²⁷ Tarus Yesus ba murit-murit-Te sampe ka Yerusalem agi'k. Sawaktu Yesus bajaatn ka botang Bait Suci, ataknglah ka-Ia imam-imam kapala, ahli-ahli Taurat ba tua-tua, ²⁸ lalu batanya'k ka-Ia: "Bakuasa mae ge'k Kao minjawat hal-hal koa? Ba sae ge'k nang mareatn kuasa koa ka Kao?, sampme Kao minjawat hal-hal koa?" ²⁹ Ja Yesus ka kabatnne koa: "Aku akan ngajuatn sete' pertanyaan ka kao. Barei'klah Aku jawapanne, tarus Aku akan matakatn ka kao ba kuasa mae aku minjawat hal-hal koa. ³⁰ Baptisan Yohanes koa, dari saruga ge'k dari manusia? Bareatnlah Aku jawapanne!" ³¹ Kabatnne koa barunding ba sabayaatnne, tarus bakata: "Kade'k diri'k kataatn: "Dari saruga, Ia ana bakata: "Kade'k yakoa, ngahe kita'k ina'k picaya'k ka ia? ³² Tapi, masa'k diri'k bakata: "Dari manusia!" Barang kabatnne koa gai'k ka urakng manyak, barang samua urakng nganggap kade'k Yohanes batol-batol nabi. ³³ Tarus kabatnne koa nyawap Yesus: "Kami ina'k nahui'k." Tarus ja Yesus ka kabatnne koa: "Kade'k yakoa, Aku ina'k uga'k ngataatn ka kao ba kuasa mae Aku minjawat hal-hal koa."