¹ Dari koa Yesus barangkat kadaerah Yudea ba ka daerah sabarang sungai Yordan ba dikoa pun urakng manyak ngarumutni'k Ia; ba aya biasae Ia ngajar dangan koa uga'k. ² Tarus ataknglah urakng-urakng Farisi mao'k mencobai'k Yesus kabatnne koa bakata ka Ia: "Muih ge'k nang laki nyareatn binie?" ³ Tapi jakata-E ka kabatnne: "Ahe parentah Musa ka kao?" ⁴ Ja kabatnne: "Musa mare'k ijin untu' nyareatn ia ba minjawat surat care." ⁵ Tarus ja Yesus ka kabatnne: "Justru karna kakarasatn atinyulah Musa nulisatn parentah nyian untu' kao. ⁶ Barang ka pamula dunia, Jubata nyajiatn kabatnne nang laki ba nang bini, ⁷ barang koa nang laki akan ningaatn apa'k e ba uwe'k e ba jaji satu ba binie, ⁸ sampe kaduae koa jaji sote'k dagen. Yakoalah kabatnne koa buke'k agi'k dua, tapi sote'k. ⁹ Barang koa, ahe nang udah dinyatuatn di Jubata, ina'k muih dicareatn dimanusia." ¹⁰ Sawaktu kabatnne udah sampe ka rumah, murit-murit koa batanya'k uga'k ka Yesus parihal koa tadi. ¹¹ Tarus jakata-E ka kabatnne: "Saepun nang nyareatn binie tarus panganten ba nang bini lain, ia idup daapm pajinahan terhadap binie koa. ¹² Ba kade' binie nyareatn akie ba panganten agi'k ba nang laki lain, ia babuat jinah. ¹³ Tarus urakng ngicakng kamuda'k-kamuda'k ene'k ka Yesus, biar Ia menjamah kamuda'k-kamuda'k koa, tapi murit-murit-Te merai'k urakng-urakng koa. ¹⁴ Sawaktu Yesus nee'k parihal koa, Ia bera tarus bakata ka kabatnne: "Biaratn kamuda'k-kamuda'k koa atakng ka Aku, ame halangi'k kabatnne, barang urakng-urakng nang aya koalah nang miliki'k Kerajaan Jubata. ¹⁵ Aku bakata kakao: Sasidie saepun ina'k nyambut Kerajaan Jubata aya kamuda'k ene'k nyian, ia ina'k akan taama'k kadaapmme." ¹⁶ Tarus Ia ngoho'k kamuda'k-kamuda'k koa sambi narohatn kokot-Te ka atas kamuda'k-kamuda'k koa Ia marakati'k ia. ¹⁷ Sawaktu Yesus barangkat untu' narusatn pajaanan-Ne, ataknglah seko' urakng nang batalama'k notok Ia sambi basujut kaadapatn-Ne ia batanya'k: "Guru nang baik, ahe nang harus ku pabuat biar namu idup kekal?" ¹⁸ Ja Yesus: "Ngahe kao bakata Aku nyian baik? Ina'k ada seko'k urakngpun nang baik salain dari pada Jubata maan. ¹⁹ Kao tantu nauan samua parentah Jubata: Ame munuh, ame babuat cabul, ame mancuri, ame ngucapatn saksi dusta, ame ngurangi hak urakng, hormati'klah apa'k nyu ba uwe'knyu!" ²⁰ Tarus jakata urakng koa ka-Ia: "Guru, samua koa udah ku nuruti'k dari ku gi'k muda'." ²¹ Tapi Yesus nee'k ia ba kasih ka ia, tarus Ia bakata ka ia: "Kahe sete'k agi'k kakurangannyu: puaknglah, jualah ahe nang kao miliki'k ba bareatnlah koa ka urakng-urakng miskin, maka kao akan namuan harta ka saruga, apas koa ataknglah ka dian tarus tunaanlah Aku." ²² Nangar pakataatn koa ia jaji kecewa, tarus dari ba ati nang sedih, barang manyak hartae. ²³ Tarus Yesus nee'k murit-murit-Te ka sakulililing-Nge lalu bakata ka kabatnne: "Sidi susahhe urakng nang ada baduit taama'k kadaapm Kerajaan Saruga." ²⁴ Murit-murit-Te tacangang nangar pakataatn-Ne koa. Tapi Yesus narusatn agi'k: "Anak-anak-Ku, sidi susahhe taama'k ka daapm Kerajaan Jubata." ²⁵ Labih mudah seko'k onta ngalalui'k ubakng jarupm dari pada urakng kaya taama'k kadaapm Kerajaan Jubata. ²⁶ Kabatnne makin heran agik tarus bakata ba sabayaatnne: "Kade'k yaiyan, sae ge'k nang bisa disalamatatn?" ²⁷ Yesus nee'k kabatnne lalu bakata: "Bagi manusia hal koa ina'k mungkin, tapi buke'k yakoa bagi Jubata. Barang sagala sasuatu koa mungkin bagi Jubata." ²⁸ Bakatalah Petrus ka Yesus: "Kami nyian udah ningaatn samuae ba nunaan Kao!" ²⁹ Ja Yesus: "Aku bakata ka kao, sasidie satiap urakng nang karna Aku ba karna Injil ningaatn rumahhe, saudarae nang laki ge'k pun saudarae nang bini, uwe'k e ge'k apa'k e, anak-anakke ge'k uma e, ³⁰ urakng koa angkitn ka waktu nyian uga'k akan narima agi'k saratus kai lipat: rumah, saudara e nang laki, saudara e nang bini, anak ba uma e, sakaipun harus ngalami'k bamacam siksaan, ba ka jaman nang akan atakng ia akan narima'k idup nang kekal. ³¹ Tapi manya'k urakng nang doho'k ana jaji nang dudi ba nang dudi ana jaji nang doho'k." ³² Yesus ba murit-murit-Te agi'k bajaatn ka Yerusalem tarus Yesus bajaatn ka paling depan. Murit-murit marasa garikng gamas ba dangan uga'k nang nunaan Ia dari balakang marasa gai'k. Sakai agi'k Yesus nyaru'k kaduabalas murit-Te ba Ia mulai'k ngataatn ka kabatnne ahe nang ana akan tajadi kadirik-E, ³³ jakata-E: "Angkitn diri'k ampus ka Yerusalem ba Anak Manusia akan disarahatn ka imam-imam kapala ba ahli-ahli Taurat, ba kabatnne akan ngukum Ia ba ukuman mati. Ba kabatnne akan nyarahatn Ia ka bangsa-bangsa nang nana'k kanal Jubata, ³⁴ ba Ia ana akan diolo'k-oloan, diujahi'k, dipangkong ba dibunuh, ba apas talu ari Ia akan bangkit. ³⁵ Tarus Yakobus ba Yohanes, anak-anak Jebedeus, nyamaki'k Yesus tarus bakata ka Ia: "Guru, kami ngarap supaya Kao kira'e ngabulatn pamintaan kami! ³⁶ Ja Yesus ka kabatnne: "Ahe nang kao maoan Aku minjawat untu' kao?" ³⁷ Tarus jakata kabatnne; "Ijinanlah kami duduk ka daapm kamuliaatn-Nyu ana, nang seko'k duduk ka sabalah kanan-Nyu ba nang seko'k duduk kasabalah keba'k-Nyu." ³⁸ Tapi jakata Yesus ka kabatnne: "Kao ina'k nauan ahe nang kao minta. Bisa me kao nyocok cawan nang harus Kucocok ba dibaptis ba baptisan nang harus Kutarima'k?" ³⁹ Ja kabatnne: "Kami bisa." Yesus bakata ka kabatnne: "Memang, kao ana akan nyocok cawan nang harus Kucocok ba ana akan dibaptis ba baptisan nang harus Ku tarima'k. ⁴⁰ Tapi parihal duduk ka sabalah kanan-ku ge'k ka sabalah keba'k-Ku, Aku ina'k ba hak mareatn ia. Koa akan dibareatn ka urakng-urakng untu' sae koa udah dinyiapatn. ⁴¹ Nangar kao kasapuluh murit nang lain jaji bera ka Yakobus ba Yohanes. ⁴² Tapi Yesus nyarui'k kabatnne tarus bakata: "Kao nauan, kade'k kabatnne nang disabut pamarentah bangsa-bangsa marentah rakyatte ba kokot basi, ba panguasa-panguasae koa majaanan kuasae ka dangan koa karas. ⁴³ Ina'klah ayakoa kade'k kaantara kita'k. Barang sae nang mao'k jaji nang aya'k kaantara kita'k, haruslah ia jaji palayan kita'k, ⁴⁴ ba sae mao'k jaji nang penting kaantara kita'k, haruslah ia jaji amba untu' samua e. ⁴⁵ Barang Anak Manusia uga'k atakng buke'k untu' dilayani'k tapi untu' ngalayani'k ba untu' mareatn nyawa-E jaji panabusatn untu' urakng samua. ⁴⁶ Tarus sampelah Yesus ba murit-murit-Te ka Yeriko. Sawaktu Yesus kauar dari Yeriko, Ia ba murit-murit-Te ba uga'k urakng nang rami sidi, ada seko' pangemis buta'k, badama Bartimeus, anak Timeus, duduk ka sisi maraga. ⁴⁷ Sawaktu ia nangar, kade'k koa Yesus urakng Nasaret, mulai'klah ia ngampak: "Yesus Anak Daut, kasihatni'klah aku!" ⁴⁸ Manya'k urakng nagor supaya ia diam. Tapi samangkin kuat ia ngampak: "Anak Daut, kasihatni'klah aku!" ⁴⁹ Tarus Yesus baranti lalu bakata: "Saru'klah ia!" Kabatnne nyaru'k urakng buta'k koa tarus bakata ka ia: "Kuatatn atinyu, badirilah, Ia nyarui'k kao." ⁵⁰ Lalu ia nangaan jubahhe, ia langsung badiri ba ampus namui'k Yesus. ⁵¹ Yesus batanya'k ka ia: "Ahe nang kao maoan biar Aku pabuat untu' nyu? Ja urakng buta'k koa: "Rabuni, biar aku bisa nee'k!" ⁵² Lalu ja Yesus ka ia: "Puaknglah, imannyu udah nyalamatatn kao!" Sawaktu koa uga'k ia bisa nee'k, tarus ia nunaan Yesus daapm pajaanan-Ne.