¹ Jakata-E agi'k ka kabatnne: "Aku bakata ka kao, sasidie kaantara urakng nang ada nyian ada nang ina'k akan mati sanape'k kabatnne koa nee'k kade'k Kerajaan Jubata udah atakng ba kuasa." ² Anam ari apas koa Yesus ngicakng Petrus, Yakobus ba Yohanes basama-sama ba Ia naik ka sabuah bukit nang tingi. Dikoa kahe Ia ba kabatnne maan. Tarus Yesus barubah rupa ka adapatn mata kabatnne, ³ ba pakean-Ne putih bakilat-kilat. Ina'k ada seko'k urakng pun nang mutihatn baju aya koa. ⁴ Lalu kateeatnlah di kabatnne Elia ba Musa, kadua e agik bakatai'k ba Yesus. ⁵ Ja petrus ka Yesus: "Rabi, sidi repoe kami ada ka tampat nyian. Baiklah kami diriatn talu kemah, sete'k untu' Kao, sete' untu' Musa ba sete' untu' Elia." ⁶ Ia bakata yakoa barang ia ina'k nauan agi'k ahe nang harus ia kataatn, barang kabatnne kagaianan sidi. ⁷ Tarus ataknglah rahu'k nonoi'k kabatnne ba dari daapm rahu'k koa kadangaratn suara: "Nyianlah Anak nang Kungasihi'k dangaratnlah Ia." ⁸ Langsung pas koa uga'k kabatnne nee'k sakulilingnge, kabatnne ina'k nee'k seko' urakng pun agi'k nang ada ba kabatnne, kacuali Yesus babaro. ⁹ Sawaktu kabatnne turutn dari bukit, Yesus bapasatn ka kabatnne ame bacurita ka saepun ahe nang dah udah kabatnne nee'k koa, sanape'k Anak Manusia bangkit dari antara urakng mati." ¹⁰ Kabatnne megang pasatn koa sambi batanya'k-tanya'k ka antara kabatnne ahe nang dimaksut "bangkit dari antara urakng mati." ¹¹ Tarus kabatnne batanya'k ka-Ia: "Ngahe ahli-ahli Taurat bakata, bahwa Elia harus atakng doho'k?" ¹² Ja Yesus: "Memang Elia akan atakng labih doho'k ba maiki'k samua e. Kahe, ayamae gek ba nang ada tatulis parihal Anak Manusia, kade'k Ia akan manya'k menderita ba akan dihina? ¹³ Tapi Aku bakata ka kao: "Memang Elia udah atakng ba urakng memperlakukan ia sasuai kamaoan kabatnne, sasuai ba nang ada tatulis parihal ia." ¹⁴ Sawaktu Yesus, Petrus, Yakobus, ba Yohanes muakng agi'k ka murit-murit lain, kabatnne nee'k urakng manyak ngarumutni'k murit-murit koa, ba sangahe urakng ahli Taurat agi'k mempersoalkan sesuatu ba kabatnne. ¹⁵ Sawaktu urakng manya;k koa nee'k Yesus, tacanganglah kabatnne koa samua ba nyambut Ia. ¹⁶ Tarus Yesus batanya'k ka kabatnne: "Ahe nang kita'k persoalatn ba kabatnne?" ¹⁷ Seko'k dari urakng manyak koa bakata: "Guru, anakku nyian ku ngicakng ka-Kao, barang ia karasukan roh nang minjawat ia awa'k. ¹⁸ Ba satiap kai roh koa nyarang ia, roh koa ngampasatn ia ka tanah; tarus mootte babusa, gigie bakaratuk ba tubuhe jaji kejang. Aku udah minta'k ka na'k murit-murit-Nyu, biar kabatnne ngoser roh koa, tapi kabatnne ina'k bisa." ¹⁹ Tarus ja Yesus ka kabatnne: "Hei kao angkatan nang ina'k picaya'k, sangahe lama agi'k Aku harus diapm kaantara nyu? Sangahe lama agi'k Aku harus sabar ka kao? Icaknglah kamuda'k koa kadian!" ²⁰ Tarus kabatnne ngicakng ka-Ia. Waktu roh koa nee'k Yesus, kamuda'k koa langsung dinguncakng-nguncakng, kamuda'k koa tapalanting ka tanah ba taguling-guling, sedang moote babusa. ²¹ Tarus Yesus batanya'k ka apa'k kamuda'k koa: "Udah sangahe lama ngalami'k aya nyian?" Ja apa'k kamuda koa: "Dari ia masih gi'k ene'k. ²² Ba sering sidi roh koa narikatn ia ka daapm api gek pun ka daapm ai'k mao'k munuha'k ia. Untu' koa kade'k Kao bisa babuat sasuatu, tolonglah kami ba kasihatni'klah kami." ²³ Ja Yesus: "Janyu: Kade'k Kao bisa? Ina'k ada nang mustahil bagi urakng nang picaya'k!" ²⁴ Langsung apa'k kamuda'k koa ngampak: "Aku picaya'k. Tolonglah aku nang ina'k picaya'k nyian!" ²⁵ Sawaktu Yesus nee'k urakng manya'k makin atakng bakarumun, Ia nagur roh jahat koa basuara karas, jakata-E: "Hei kao roh nang minjawat urakng jaji awa'k ba banga, Aku marentahatn kao, kaluarlah dari kamuda'k nyian ba ame namai'k ia agi'k!" ²⁶ Tarus kauarlah roh koa sambi ngampak ba nguncakng-nguncakng kamuda'k koa kuat sidi. Kamuda'k koa aya tolen urakng mati, sampe manya'k urakng nang bakata: "Ia udah mati." ²⁷ Tapi Yesus nyingii'k kokot kamuda'k koa ba ngumpatatn ia, tarus kamuda'k koa umpat babaro. ²⁸ Sawaktu Yesus udah sampe karumah, Ia ba murit-murit-Te kahe, batanya'klah kabatnne: "Ngahe kami ina'k bisa ngoser roh koa?" ²⁹ Ja Yesus ka kabatnne: "Jenis nyian ina'k bisa diusir kacuali di usir ba doa." ³⁰ Yesus ba murit-murit-Te barangkat dari koa ba ngalewati'k Galilea, tarus Yesus bai' hal koa ditauatn di urakng; ³¹ barang Ia agi;k ngajar murit-murit-Te. Ia bakata ka kabatnne: "Anak Manusia akan disarahatn ka daapm kokot manusia, ba kabatnne koa akan munuh Ia, ba katalu ari e apas Ia dibunuh Ia akan bangkit." ³² Kabatnne ina'k ngarati pakataatn koa, tapi segan nanyaan na'k ka-Ia. ³³ Apas koa sampelah Yesus ba murit-murit-Te ka Kapernaum. Sawaktu Yesus udah sampe ka rumah, Ia batanya ka murit-murit-Te: "Ahe nang kita'k ngomongan ka maraga tadi?" ³⁴ Tapi kabatnne badiaman, barang katangah maraga tadi kabatnne matangkaratn sae nang paling penting ka antara kabatnne. ³⁵ Tarus Yesus duduk ba nyarui'k kaduabalas murit-Te koa. Jakata-E ka kabatnne: "Kade' urakng mao'k jaji nang paling penting, haruslah ia jaji nang paling ina'k penting dari samuae ba ia harus jaji pelayan untu' samua e." ³⁶ Tarus Yesus naap seko'k kamuda ene'k ba nampatatn ia ka tangah-tangah kabatnne, apas koa Ia ngoho'k kamuda'k koa lalu bakata ka kabatnne: " ³⁷ Saepun nyambut kamuda'k ene'k nyian daapm dama-Ku, ia nyambut Aku. Ba saepun nyambut Aku, buke'k Aku nang ia nyambut koa, tapi Ia nang ngutus Aku." ³⁸ Ja Yohanes ka Yesus: "Guru, kami nee'k seko' urakng nang buke'k pangikut diri'k ngoser setan demi dama-Nyu, tarus kami maian urakng koa, barang Ia buke'k pangikut diri'k." ³⁹ Tapi ja Yesus: "Ame kao baiatn ia! Barang ina'k seko'k pun urakng nang ngadaatn mujijat demi dama-Ku, bisa pas koa ugak bakata buruk ka Aku." ⁴⁰ Saepun ina'k ngalawan diri'k, ia ada ka pihak diri'k. ⁴¹ Aku bakata ka kao: Sasidie saepun mare'k kao nyocok sacawan ai'k barang karna kao pangikut Karistus, ia ina'k akan kailangan upahhe." ⁴² "Saepun nyasatatn salah seko'k dari kamuda'k-kamuda'k ene'k nang picaya'k nyian, labih baik untu' ia kade'k sabuah batu kilangan diikatatn ka tege'k e tarus ia dibuakng ka daapm laot. ⁴³ Ba kade' kokotnyu nyasatatn kao, tataklah, barang labih baik kao taama'k kadaapm idup ba kokot kudukng dari pada kadua kokot nyu utuh dibuakng ka daapm neraka, kadaapm api nang ina'k tapadaman; ⁴⁴ [katampat koa uatte ina'k akan mati, ba api ina'k akan padapm.] ⁴⁵ Ba kade'k pahanyu nyasatatn kao, tataklah, barang labih baik kao taama'k kadaapm idup ba paha timpakng, dari pada utuh pahanyu ditabakatn kadaapm neraka; ⁴⁶ [katampat koa uatte ina'k akan mati, ba api e ina'k akan padapm.] ⁴⁷ Ba kade'k matanyu nyasatatn kao, sungkitlah, barang labih baik kao taama'k kadaapm Kerajaan Jubata bamata sege'k dari pada bamata dua ditabakatn ka daapm neraka, ⁴⁸ dimae uat-uat bangke ina'k mati ba api ina'k padapm. ⁴⁹ Barang satiap urakng ana mao'k digare'ik ba api. ⁵⁰ Gare'k memang baik, tapi kade'k gare'k jaji panat, ba ahe ge'k kao mao'k madaatna'k ia? Haruslah kao sau ada ba gare'k daapm dirik'knyu ba sau idup babaikatn ba dangan nang lain.