^{2 1} arus Yesus mulai'k bakata ka kabatnne daapm parumpamaan: "Ada seko' urakng muka'k kabon anggur ba minjawat pagar ka sakulilingnge. Ia namukng ubakng tampat maras anggur ba madiriatn tampat bajaga. Apas koa ia nyewaatn kabonne koa ka panggarap-panggarap tarus barangkat ka nagari lain. ² Sawaktu udah sampe munsim panen, ia nyuruh seko'k amba e ampus ka pangarap-pangarap koa untu' narima'k sabagian dari hasil kabon koa dari kabatnne. ³ Tapi kabatnne koa nangkap amba e koa ba mangkong ia, tarus nyuruh ia puakng ba kokot kosong. ⁴ Apas koa ia nyuruh uga'k amba e nang lain ampus ka kabatnne koa. Urakng nyian kabatnne mangkokng sampe uka'k kapala e ba di kabatnne koa masupe'ik sidi. ⁵ Tarus ia nyuruh amba e nang lain agi'k, ada nang kabatnne koa mangkong ba ada nang dimunuh. ⁶ Ampeatn kahe sisa'k seko'k anakke nang ia nyayakngi'k. Ahire ia nyuruh ia ampus ka kabatnne koa, jare: Anakku akan dikabatnne koa hormati'k. ⁷ Tapi panggarap-panggarap koa bakata ka sabayaatnne: Ia nyian ahli waris, je'k diri'k munuh ia, ana warisanne nyian jaji nu'k diri'k. ⁸ Kabatnne nangkap ba munuh ia, lalu dinabakatn ka luar kabon koa. ⁹ Ampeatn ahe nang mao'k dipinjawat di tuan kabon anggur koa? Ia akan atakng ba munuh panggarap-panggarap koa, tarus micayaatn ia ka urakng-urakng lain. ¹⁰ Ina'k suah me kao maca nas nyian: Batu nang dimuang di tukang-tukang bangunan udah jaji batu panjuru: ¹¹ hal koa tajadi dari pihak Tuhan, suatu perbuatan ajaip ka mata diri'k." ¹² Tarus kabatnne barusaha untu' nangkap Yesus, barang kabatnne nauan, kade'k kabatnne koalah nang dimaksut-Dihe daapm paumpamaan koa. Tapi kabatnne gai'k ka urakng rami, jadi kabatnne dari ba miaratn Ia. ¹³ Apas koa sangahe eko'k urakng Farisi ba Herodian atakng ka Yesus untu' menjebak Ia ba suatu pertanyaan. ¹⁴ Urakng-urakng koa atakng tarus bakata ka Ia: Guru, kami nauan, Kao koa urakng jujur, Kao ina'k gai'k ka saepun uga'k, barang Kao ina'k ngago'k muha, tapi jujur ngajaratn maraga Jubata ka daapm sagala kajujuran. Muih ge'k mayar pajak ka Kaisar? Kami harus babayar ge'k ina'k?" ¹⁵ Tapi Yesus nauan kamunafikatn kabatnne koa, tarus Ia bakata ka kabatnne: "Ngahe kao nyobai'k Aku? Icaknglah kadian sete'k dinar biar Ku nee'k ia! ¹⁶ Tarus kabatnne ngicakng. Lalu Ia bakata ka kabatnne: "Gambar ba tulisan sae gek nyian?" Ja kabatnne: "Gambar ba tulisan Kaisar." ¹⁷ Tarus ja Yesus ka kabatnne: "Bareatnlah ka kaisar ahe nang wajip kao bareatn ka Kaisar ba bareatnlah ka Jubata ahe nang wajip kao bareatn ka Jubata!" Kabatnne heran sidi nangar Ia. ¹⁸ Ataknglah ka Yesus sangahe eko'k urakng Saduki, nang bapandapat, kade'k ina'k ada kabangkitan. Kabatnne batanya'k ka-Ia ¹⁹ "Guru, Musa nulisatn parentah nyian untu'k diri'k: Kade'k ada urakng nang ada ba sodara nang laki, lalu mati ba ningaatn seko'k bini e tapi ina'k ningaatn anak, sodara e koa harus panganten ba bini e ba narusatn katurunan untu'k sodarae koa. ²⁰ Ada batujuh urakng adi'k baradi'k. Nang doho'k panganten ba nang bini koa lalu mati ba ina'k ningaatn katurunan. ²¹ Tarus nang kadua uga'k manganteni'k ia mati uga'k ina' ningaatn katurunan. Yakoa uga'k nang katalu. ²² Ayakoalah satarusse, batujuhhe koa ina'k ningaatn katurunan. Ahire, apas kabatnne koa samua, nang bini koa pun mati uga'k. ²³ Ka ari kabangkitan, kade'k ana kabatnne koa bangkit, sae ge'k nang jaji aki nang bini koa? Barang batujuhhe koa udah manganteni'k ia." ²⁴ Ja Yesus ka kabatnne: "Kao sasat, justru karna kao ina'k ngarati Kitap Suci ge'k pun kuasa Jubata. ²⁵ Barang kade'k urakng bangkit dari antara urakng mati, urakng ina'k panganten ba ina'k dipangantenan tapi idup aya tolen malaekat ka saruga. ²⁶ Ba uga'k parihal bangkitte urakng-urakng mati, ina'k me kao maca daapm kitap Musa, daapm curita soal tompoatn duri, ayamae bunyi firman Tuhan ka ia: Akulah Jubata Abraham, Jubata Isak ba Jubata Yakup? ²⁷ Ia buke'klah Jubata urakng mati, tapi Jubata urakng idup. Kao banar-banar sasat!" ²⁸ Tarus seko'k ahli Taurat, nang nangar Yesus ba urakng-urakng Saduki batanya'k jawap ba nahui'k, kade'k Yesus mare'k jawapan nang tepat ka urakng-urakng koa, atakng ka Ia tarus batanya'k: "Ukum mae ge'k nang paling utama?" ²⁹ Ja Yesus: "Ukum nang paling utama: Dangarlah, hei urakng Israel Tuhan Jubata diri'k, Tuhan koa asa'k. ³⁰ Kasihi'klah Tuhan, Jubatanyu ba saganap atinyu ba saganap jiwanyu ba saganap akal budinyu ba saganap kakuatannyu. ³¹ Ba ukum nang kadua: "Kasihi'klah sabayanyu manusia aya kao ngasihi'k diri'knyu babaro. Ina'k ada ukum lain nang labih utama dari pada kadua ukum nyian." ³² Tarus ja ahli Taurat koa ka Yesus: "Batol sidi, Guru, banar kata-Nyu koa, kade'k Ia koa esa, ba kade'k ina'k ada nang lain kacuali Ia. ³³ Memang ngasihi'k Ia ba saganap ati ba saganap pengertian ba saganap kakuatan, ba uga'k ngasihi'k sabaya manusia aya diri'k babaro koa jauh labih utama dari pada samua korban bakaran ba korban sambalehatn." ³⁴ Yesus nee'k, ayamae bijaksanae jawapan urakng koa, lalu Ia bakata ka ia: "Kao ina'k jauh dari Kerajaan Jubata!" Tarus seko'k urakngpun ina'k barani agi'k nanyaan ahe-ahe ka Yesus. ³⁵ Apas koa sawaktu Yesus ngajar ka Bait Suci, Ia bakata: "Ayamae ahli-ahli Taurat bisa ngataatn, kade'k Mesias koa anak Daut? ³⁶ Daut babaro dipimpinan Roh Kudus bakata: duduklah ka sabalah kanan-Ku sampe munsuh-munsuh-Nyu Ku tarohatn ka babah paha-Nyu. ³⁷ Daut babaro nyabut Ia Tuanne, ayamae mungkin Ia anakke pula'?" Urakng rami nang jumbalahhe manyak nangaratn Ia sidi baminat. ³⁸ Daapm pangajaratn-Ne Yesus bakata: "Ati-atilah ka ahli-ahli Taurat nang suka bajaatn-jaatn make jubah panyakng ba suka narima'k penghormatan ka pasar, ³⁹ nang suka duduk ka tampat nang paling kadepan ka rumah sambayang ba ka tampat terhormat daapm gawe, ⁴⁰ nang naatn rumah janda-janda, sedang kabatnne koa ngalabui'k mata urakng ba doa nang panyakng-panyakng. Kabatnne nyian pasti akan narima'k ukuman nang paling barat." ⁴¹ Sawaktu Yesus duduk ngadapi'k pati persembahan ba maratiatn urakng manyak namaan duit ka daapm pati koa. Manyak urakng kaya mare'k jumbalah nang aya'k. ⁴² Tarus ataknglah seko'k janda nang miskin lalu ia namaan dua peser, nang nilaie sadikit. ⁴³ Tarus Ia nyaru'ik murit-murit-Te lalu bakata ka kabatnne: "Aku bakata ka kao sasidie, janda miskin nyian mare'k labih manyak dari pada samua urakng nang namaan duit ka daapm pati persembahan koa. ⁴⁴ Barang kabatnne koa mare'k dari kalabihatnne, tapi janda nyian mare'k dari kakuranganne, samua nang ada ka ia, yakoa samua untu' pamakananne.