¹ Lalu umpatlah saluruh sidang koa tarus Yesus dingicakng ngadap Pilatus. ² Dikoa kabatnne mulai nuduh Ia, bakata: "Udah kadapatan di kami, kade' urakng nyian nyasatatn bangsa kami, ba maian kami mayar pajak ka Kaisar, ba parihal diri'-E Ia ngataatn, kade' Ia koa Karistus, yakoa Raja." ³ Pilatus batanya'k ka Ia: "Kao ge'k raja urakng Yahudi" Ja Yesus: "Kao babaro nang bakata." ⁴ Ja Pilatus ka imam-imam kapala ba samua urakng manyak koa: "Aku ina' namui'k kasalahatn ahe pun ka urakng nyian." ⁵ Tapi kabatnne mangkin kuat maksa, kata e: "Ia ngasot rakyat ba ajaran-Ne ka saluruh Yudea, Ia mulai'k ka Galilea ba udah sampe ka dian. ⁶ Sawaktu Pilatus nangar koa ia batanya'k, ahe ge'k ia urakng Galilea? ⁷ Ba sawaktu ia nauan, kade' Yesus urakng dari wilayah Herodes, ia ngirim Ia ngadap Herodes, nang waktu koa ada uga'k ka Yerusalem. ⁸ Sawaktu Herodes nee'k Yesus, ia repo sidi. Barang udah lama ia maok nee-Ia, barang ia sering nangar parihal Ia, ia pun ngarapatn ayamae Yesus ngadaatn suatu tanda. ⁹ Ia ngajuatn manyak pertanyaan ka Yesus, tapi Yesus ina'k mare jawapan ahe pun. ¹⁰ Samintara koa imam-imam kapala ba ahli-ahli Taurat maju kadepan ba ngaluaratn tuduhan-tuduhan nang barat ka Ia. ¹¹ Lalu mulai'klah Herodes ba pasukanne nyaci ba ngolo'k-ngolo'k Ia, ia makeatn jubah kebesaran ka Ia tarus ngirim Ia agi'k ka Pilatus. ¹² Ka pada ari koa uga'k Herodes ba Pilatus barayukng, sanape'k koa kabatnne bamunsuhatn. ¹³ Lalu Pilatus ngomoan imam-imam kapala ba pamimpin-pamimpin rakyat, ¹⁴ tarus bakata ka kabatnne: "Kao udah ngicakng urakng nyian ka aku sabagai urakng nang nyasatatn rakyat. Kao nee'k babaro kade'k aku udah mareksa-Ia, ba kasalahan-kasalahan nang udah kao nuduhatn ka Ia ina'k ada nang ku napati'k ada ka-Ia. ¹⁵ Herodes pun ina'k , barang ia ngiriman Ia agi'k ka kami. Sasidie ina'k ada sete' pun nang Ia mabuat nang satimpal ba ukuman mati. ¹⁶ Jadi aku maok ngajar Ia, tarus ngalapasatn Ia." ¹⁷ [Barang ia wajip ngalapasatn seko' untu'k kabatnne pas ari raya koa.] ¹⁸ Tapi kabatnne koa ngampak barage-rage: "Bunuh Ia, lapasatn Barabas untu' kami!" ¹⁹ Barabas nyian dinamaan ka daapm pinjara barang suatu pembarontakan nang udah tajadi ka daapm kota' ba karna pembunuhan. ²⁰ Sakai agi'k Pilatus bakata ba suara nang nyarekng ka kabatnne, barang ia mao'k ngalapasatn Yesus. ²¹ Tapi kabatnne ngampak malas ia, ja kabatnne: "Salipatn lah Ia! Salipatnlah Ia!" ²² Ja Pilatus untu' ka talu kai e ka kabatnne: "Kajahatan ahe nang sabanare udah diminjawat di urakng nyian? Ina'k ada sete' pun kasalahan nang ku namui'k ka Ia, nang satimpal ukuman mati. Jadi aku maok ngajar Ia, tarus ngalapasatn Ia." ²³ Tapi kabatnne ngampak ba nuntut, biar Ia disalipatn, tarus ahire kabatnne koa manang di kampak koa. ²⁴ Lalu Pilatus mutusatn, supaya tuntutan kabatnne koa dikabulatn. ²⁵ Ba ia ngalapasatn urakng nang dinamaan ka daapm pinjara karna pamberontakan ba pambunuhan koa sasuai ba tuntutan kabatnne, tapi Yesus dinyarahatn ka kabatnne untu' dipabuat samo'k-maok e. ²⁶ Sawaktu kabatnne ngicakng Yesus, kabatnne nahan seko'k urakng nang badama Simon dari Kirene, nang baru'k atakng dari luar kota', lalu dingakaatn salip koa ka atas bahue, biar ia mikut ia sambi nunaan Yesus. ²⁷ Sajumbalah urakng rami nunaan Ia; kaantara manyak nang bini nang nagisi'k ba ngaratapi'k Ia. ²⁸ Yesus malek ka kabatnne lalu bakata: "O nang bini-bini Yerusalem, amelah kao nangisi'k Aku, tapi tangisi'klah diri'knyu babaro ba anak-anaknyu! ²⁹ Barang tee'k, akan sampe waktu e urakng bakata: "Babahagialah nang bini nang mandu' ba nang paranakatnne ina' suah baranak, ba nang susu' ina'k suah nyusui'k. ³⁰ Tarus urakng ana akan mulai' bakata ka gunung-gunung: Roro'klah napo'k kami! ba ka bukit-bukit: Timbuni'klah kami! ³¹ Barang kade' urakng babuat ayakoa ka kayu nang idup, ahe ge'k nang akan terjadi ka kayu nang karikng?" ³² Ba ada uga'k dingiring dua urakng lain, yakoa dua panjahat untu' diukum mati ba sama-sama ba Ia. ³³ Sawaktu kabatnne sampe ka tampat nang badama Tangkorak, kabatnne nyalipatn Yesus dikoa ba uga'k badua urakng panjahat koa, nang seko' ka sabalah kanan-Ne nang lain ka sabalah keba'k-E. ³⁴ Yesus bakata: "O Apak, amponiklah kabatnne, barang kabatnne ina'k nauan ahe nang udah kabatnne koa mabuat." Tarus kabatnne muang undi untu' magiatn pakean-Ne. ³⁵ Urakng manyak badiri dikoa ba nee'k samuae. pamimpin-pamimpin nyaci Ia, katae: "Urakng lain Ia salamatatn, biarlah ampeatn Ia nyalamatatn diri'k E babaro, kade'k Ia koa Mesias, urakng nang di milih Jubata." ³⁶ Uga'k prajurit-prajurit ngolo'k-ngolok'an Ia: kabatnne nyocoatn anggor asapm ka-Ia ³⁷ lalu bakata: "Kade'k Kao raja urakng yahudi, salamatatnlah diri'k-Nyu!" ³⁸ Ada uga'k tulisan ka atas kapala-E: "Nyianlah raja urakng Yahudi". ³⁹ Seko'k dari panjahat nang dingantukng koa menghujat Ia, jare: "Buke'k me Kao koa Karistus? Salamatatnlah diri'k-Nyu ba kami!" ⁴⁰ Tapi nang seko'k nagur ia, jare: "Ina'k ge'k kao gai'k, uga'k ina'k gai'k ka Jubata, sedang kao narima'k ukuman nang sama?" ⁴¹ Diri'k memang sapantase diukum, barang diri'k narima' balasan nang satimpal ba pabuatan diri'k, tapi urakng nyian ina'k babuat sasuatu nang salah." ⁴² Lalu ia bakata: "Yesus, ingatlah ka aku, kade'k Kao atakng jaji Raja." ⁴³ Ja Yesus ka ia: "Aku bakata ka kao, sasidie ari nyian uga'k kao ada basama-sama ba Aku ka daapm Firdaus." ⁴⁴ Waktu koa ari udah kira-kira jam dua balas, tarus abut galap ka saluruh daerah koa sampe jam tiga, ⁴⁵ barang mataari ina'k basinar. Ba tirai Rumah Jubata tabalah dua. ⁴⁶ Tarus Yesus ngampak ba suara nang nyarekng: "O Apak, ka daapm kokok-Nyu Ku nyarahatn nyawa-Ku." Apas bakata yakoa Ia nyarahatn nyawa-E. ⁴⁷ Sawaktu kapala pasukan nee'k ahe nang udah terjadi, ia muliaatn Jubata, jare: "Sasidie, urakng nyian urakng banar!" ⁴⁸ Ba apas samua urakng manyak, nang atakng bakarumun ka dikoa untu' tontonan koa, nee'k ahe nang udah terjadi koa, bapuanganlah kabatnne sambi noko'k-noko'k diri'k e. ⁴⁹ Samua urakng nang nganal Yesus dari samak, termasok nang bini-bini nang nunaan Ia dari Galilea, badiri jauh-jauh ba nee'k samuae e koa. ⁵⁰ Ada seko'k urakng nang badama Yusuf, Ia anggota Majelis Aya'k, ia urakng nang baik ba banar. ⁵¹ Ia ina'k satuju ka kaputusan ba tindakan Majelis koa. Ia barasal dari Arimatea, sabuah kota' Yahudi ba ia nganti-ngantiatn Kerajaan Jubata. ⁵² Ia ampus ngadap Pilatus ba minta mayat Yesus. ⁵³ Apas ia nurunan mayat koa, ia ngapani'k ba kaikng lenan, lalu nguringan ia ka daapm kuburan nang di namukng ka daapm bukit batu, dikoa nape'k suah dinguringan mayat. ⁵⁴ Ari koa ari persiapan ba sabat amper mao'k mulai'k. ⁵⁵ Lalu nang bini-bini nang atakng barage-rage ba Yesus dari Galilea, nunaan uga'k ba kabatnne nee'k kuburan koa ba ayamae mayat-Te dinguringan. ⁵⁶ Apas puakng, kabatnne nyiapatn rampah-rampah ba binyak mur. Ba ka ari Sabat kabatnne baistirahat sasuai ukum Taurat.