¹ Ari raya Roti Ina' Baragi, nang disabut Paskah, udah samak. ² Imam-imam kapala ba ahli-ahli Taurat ngago'k maraga, ayamae kabatnne bisa munuh Yesus, barang kabatnne gai' ka urakng rami. ³ Tarus taama'klah Ibalis ka daapm Yudas, nang badama Iskariot, seko' dari kadua balas murit koa. ⁴ Tarus ampuslah Yudas ka imam-imam kapala ba kapala-kapala pangawal Rumah Jubata ba runding ba kabatnne, ayamae ia bisa nyarahatn Yesus ka kabatnne. ⁵ Kabatnne karepoatn sidi ba sapakat mao' marea'k sajumbalah duit ka ia. ⁶ Ia satuju, ba mulai' dari koa ia ngago'k kasempatan nang baik untu' nyarahatn Yesus ka kabatnne ina' ditauatn urakng rami. ⁷ Lalu sampelah ari raya Roti Ina' Baragi, yakoa ari dimae urakng harus nyambaleh domba Paskah. ⁸ Tarus Yesus nyuruh Petrus ba Yohanes, jakata-E: " ampuslah, siapatnlah pajamuan Paskah untu' diri'k biar diri'k makatn. ⁹ Jakata kabatnne ka Ia: "Dimae ge'k Kao mao'k kami nyiapatn ia?" ¹⁰ Sahut-Te: "Kade' kao taama'k ka daapm kota', kao ana batamu ba urakng nang ngicakng tapayatn nang barinsi'k ai'k. Tunaanlah ia kadaapm rumah nang ia namai'k, ¹¹ ba kataatnlah ka tuan rumah koa: Guru batanya ka kao: dimae ge' ruangan tampat Aku ba na'k murit-murit-Ku ana makatn Paskah? ¹² Lalu urakng koa ana akan nojokatn ka kao sabuah ruangan atas nang aya'k nang udah langkap, dikoalah kao harus nyiapatn ia," ¹³ Tarus barangkatlah kabatnne ba kabatnne napati'k samua aya nang dingataatn Yesus ka kabatnne. Tarus kabatnne nyiapatn Paskah. ¹⁴ Sawaktu atakng arie, Yesus duduk makatn ba na' rasul-rasul-Te. ¹⁵ Jakata-E ka kabatnne: "Aku rindu sidi makatn Paskah nyian ba rage-rage ba kao, sanape' Aku menderita. ¹⁶ Barang Aku bakata ka kao" Aku ina' akan makatn agi'k sampe ia ganap daapm Karajaan Jubata." ¹⁷ Apas koa Ia naap sabuah cawan, ngucap sukur, tarus bakata: "Taaplah nyian ba bagiatnlah ka antara kao. ¹⁸ Barang Aku bakata ka kao: mulai dari ampeatn nyian Aku ina' akan agi'k nyocok asil puhutn anggor sampe Karajaan Jubata udah atakng." ¹⁹ Lalu Ia naap roti, ngucap sukur, macah-macahatn ia ba mareatn ia ka kabatnne, jakata-E: "Nyianlah tubuh-Ku, nang dinyarahatn untu' kao; pabuatlah nyian jaji paringatan ka Aku." ²⁰ Yakoa ugak Ia mabuat ba cawan koa apas makatn; Ia bakata: "Cawan nyian koa pajanjian barahu di darah-Ku, nang dinumpahatn untu' kao. ²¹ Tapi, tee'klah, kokot urakng nang nyarahatn Aku, ada ba Aku ka meja nyian. ²² Barang ana Anak Manusia memang akan ampus aya nang udah dinatapatn, tapi cilakalah urakng nang dihe Ia dinyarahatn!" ²³ Tarus mulai'klah kabatnne batanya-tanya, sae kaantara kabatnne nang maok babuat yakoa. ²⁴ Tajadilah uga'k patangkaratn ka antara murit-murit Yesus, sae ge'k nang bisa dianggap paling aya'k kaantara kabatnne. ²⁵ Yesus bakata ka kabatnne: "Raja-raja bangsa-bangsa mamarentah rakyatte ba urakng-urakng nang majaanan kuasa atas kabatnne dinyabut palindung-palindung. ²⁶ Tapi kao ina'klah yakoa, tapi nang paling ayak ka antara kao haruslah jaji nang paling muda ba pamimpin sebagai palayan. ²⁷ Barang sae gek nang labih aya'k duduk makatn, gek nang malayani'? Buke me ia nang duduk makatn? Tapi Aku ada katangah-tangah kao jaji palayan. ²⁸ Kaolah naang tatap ada ba Aku daapm sagala pancobaan nang Aku alami'. ²⁹ Ba Aku nantuatn hak-hak Kerajaan untu' nyu, aya tolen Apak-Ku nantuatn ia untu'-Ku, ³⁰ kade' kao ana akan makatn ba nyocok sameja ba Aku ka daapm Kerajaan Ku ba kao akan duduk ka atas tahta untu' ngakimi' badua balas suku Israel. ³¹ Simon, Simon, tee'k, Ibalis udah nuntut untu' nampi'k kao aya gandum, ³² tapi Aku udah badoa untu' kao, biar imannyu ame gugur. Tarus kao kade' kao udah sadar, kuatatnlah ayukng-ayukngnyu." ³³ Ja Petrus: Tuhan, aku basiap sedia taama' pinjara ba mati sama-sama ba Kao!" ³⁴ Tapi Yesus bakata: "Aku bakata ka kao, Petrus, ari nyian manok ina' akan nyingkokok, sanape' kao talu kai basangka, kade' kao nganal Aku." ³⁵ Tarus Ia bakata ka kabatnne: "Sawaktu Aku ngutus kao ina' ada ba duit, bahata ba sandal, ada ge'k kao kakurangan ahe-ahe?" ³⁶ Ja kabatnne: "Sete' pun ina'k" Jakata-E ka kabatnne: "Tapi ampeatn nyian, sae nang ada ba duit, haruslah ia ngicakng ia, yakoa uga'k nang ada ba bahata; ba sae nang ina ada ia harus nyua jubahhe ba mali pedang. ³⁷ Barang Aku bakata ka kao, kade' nas Kitap Suci nyian harus diganapi' ka-Aku: Ia ana termasuk ka antara panjahat-panjahat. barang ahe nang tatulis parihal Aku agi'k diganapi'. ³⁸ Ja kabatnne: Tuhan, nyian dua pedang." Ia nyahuti'k: " Udah cukup." ³⁹ Tarus ampuslah Yesus kaluar kota lalu aya biasae Ia notok Bukit Jaitun. Murit-murit-Te uga'k nunaan Ia. ⁴⁰ Udah sampe ka tampat koa Ia bakata ka kabatnne: "Badoalah biar kao ame jantu' ka daapm pancobaan." ⁴¹ Apas koa Ia nyauhatn diri' E dari kabatnne kira-kira sapanabak batu jauhhe, tarus Ia balutut ba badoa, jakata-E: ⁴² "O Apak-Ku, kade' sakira'e Kao mao'k taaplah cawan nyian dari Ku; tapi buke'klah kamaoan-Ku, tapi kamaoan-Nyu nang terjadi. ⁴³ Tarus seko' malaekat dari angit neeatn diri'e ka-Ia untu' mare kakuatan ka-Ia. ⁴⁴ Ia kagaianan sidi ba makin sidi-sidi badoa. Pauh-He jaji aya titik-titik darah nang batetesatn ka tanah. ⁴⁵ Tarus Ia umpat dari doa-E ba muakng ka murit-murit-Te, tapi Ia napati'k kabatnne agi'k tidur barang sedih. ⁴⁶ Jakata-E ka kabatnne: "Ngahe kao tidur? Umpatlah ba badoalah, biar kao ame jantu' daapm pencobaan." ⁴⁷ Waktu Yesus masih bakata ataknglah sarombongan urakng, tarus murit-Te nang badama Yudas, seko' dari kadua balas murit koa, bajaatn ka depan kabatnne. Yudas nyamaki'k Yesus untu' ngidung-Ia. ⁴⁸ Tarus kata Yesus ka ia: "Hei Yudas, kao nyarahatn Anak Manusia ba idungan?" ⁴⁹ Sawaktu kabatnne, nang ba sama-sama ba Yesus, nee' ahe nang akan terjadi, bakatalah kabatnne: "Tuhan, harus gek kami nyarang kabatnne koa ba pedang?" ⁵⁰ Tarus seko' urakng dari kabatnne nyarang amba Imam Aya'k sampe jaji putus tarenyekng kananne. ⁵¹ Tapi Yesus bakata: " Udahlah koa." Tarus Ia nyangkam tarenyekng urakng koa ba nyamuhan ia. ⁵² Lalu yesus bakata ka imam-imam kapala ba kapala-kapala pangawal Rumah Jubata ba tua-tua nang atakng untu' nangkap Ia, jakata-E: "Sangkanyu Aku nyian panjahat, lalu kao atakng lengkap ba pedang ia ba tungkat? ⁵³ Padahal tiap-tiap ari Aku ada ka tangah-tangah nyu daapm Rumah Jubata, tapi kao ina' nangkap Aku. Tapi nyianlah saat nyu, ba nyianlah kuasa kagalapan koa. ⁵⁴ Tarus Yesus dinangkap ba dingicakng dari tampat koa. Ia dingicakng ka rumah imam Aya'k. Tarus Petrus nunaan dari jauh. ⁵⁵ Ka tangah-tangah botang rumah koa urakng masang api ba kabatnne duduk ngulilingi'k ia. Petrus ugak duduk ka tangah-tangahhe. ⁵⁶ Seko' pambantu nang bini nee' ia duduk samak api; ia maratiatn ia, tarus bakata: "Urakng nyian uga'k sama-sama ba Ia." ⁵⁷ Tapi Petrus basangka, jare: "Buke', aku ina' kanal ka Ia!" ⁵⁸ Ina' sangahe lama apas koa urakng nang lain nee'k ia lalu bakata: "Kao uga'k seko' dari kabatnne!" Tapi Petrus bakata: "Buke', aku ina'k! ⁵⁹ Kira-kira sajam apas koa urakng lain bakata tagas: "Sasidie, urakng nyian uga'k ada basama-sama ba Ia, barang ia uga'k urakng Galilea." ⁶⁰ Tapi Petrus bakata: "Buke', aku ina' nauan ahe nang kao ngataatn." Sakoa uga'k, samintara ia bakata, nyingkokoklah manok. ⁶¹ Lalu maleklah Tuhan nee' Petrus. Lalu taringatlah Petrus kade' Tuhan udah bakata ka ia: "Sanape manok nyingkokok ari nyian, kao udah talu kai masangkaatn Aku." ⁶² Lalu ia dari kaluar ba nangis sedih sidi. ⁶³ Ba urakng-urakng nang nahan Yesus, ngolo'k-ngolo'kan Ia ba mangkongi'k Ia. ⁶⁴ Kabatnne nutupi' muha-E tarus batanya': "Cobalah kataatn sae ge'k nang mangkong Kao?" ⁶⁵ Ba manyak agi'k caciaatn nang dingucapatn kabatnne ka Ia. ⁶⁶ Lalu pas dah ari siakng bakomo'klah sidang na' tua-tua bangsa Yahudi ba imam-imam kapala ba ahli-ahli Taurat, tarus kabatnne ngadapatn Ia ka Mahkamah Agama e, ⁶⁷ jare: " Kade' Kao koa Mesias, kataatnlah ka kami," Ja Yesus: "Sakaipun Aku ngataatn ia ka kao, tapi kao ina' akan picaya'; ⁶⁸ ba sakaipun Aku batanya'k sesuatu ka kao, tapi kao ina' akan nyawap Aku. ⁶⁹ Mulai' ampeatn Anak Manusia udah duduk ka sabalah kanan Jubata Nang Mahakuasa." ⁷⁰ Jakata kabatnne samua: "Kade' yakoa Kao nyian Anak Jubata?" Ja Yesus: "Kao babaro ngataatn ia, kade' Akulah Anak Jubata." ⁷¹ Tarus ja kabatnne: "Untu' ahe diri'k pararu kasaksian agi'k? Diri'k nyian udah nangaratn dari moot-Te babaro."