¹ Sawaktu Yesus ngangkat muha-E, Ia nee'k urakng-urakng kaya masokatn persembahan ne ka daapm pati persembahan. ² Ia nee' uga'k seko' janda miskin namaan dua peser ka daapm pati koa. ³ Tarus Ia bakata: "Aku bakata ka kao, sasidie janda miskin nyian mare' labih manyak dari pada samua urakng koa. ⁴ Barang kabatnne samua mare'k persembahanne dari kalimpahatnne, tapi janda nyian mare' dari kakurangnganne, bahkan ia mare' saluruh nafkahhe." ⁵ Waktu sangahe urakng bakata parihal Rumah Jubata ba ngagumi' bangunan koa nang di ngiasi' ba batu nang gagas-gagas ba macam-macam barang persembahan, bakatalah Yesus: ⁶ "Ahe nang kao nee' dikoa- akan atakng ari e dimae ina' sege' pun batu akan dibiaratn basusun ba batu nang lain; samua akan diroroatn. ⁷ Tarus murit-murit batanya ka Yesus, jare: "Guru, kamie ge' koa akan terjadi? Ba ahe ge' tanda e, kade' koa akan terjadi? ⁸ Ja Yesus: "Waspadalah, biar kao ame disasatatn. Barang manyak urakng akan atakng ba make dama-Ku lalu bakata: Akulah Ia, ba: Waktue udah samak. Amelah kao nunaan ia. ⁹ Ba kade' kao nangar parihal paparangan ba pemberontakan, amelah kao takajut. Barang samuae koa akan terjadi doho', tapi koa ina baarti akhir e akan atakng. ¹⁰ Ia bakata ka kabatnne: "Bangsa akan bangkit ngalawan bangsa ba karajaan malawan karajaan, ¹¹ ba akan terjadi gempa bumi nang aya'k ka sagala tampat akan ada panyakit sampar ba kaparatn, ba akan terjadi uga' hal-hal nang ngajuti'k ba tanda-tanda nang aya'k dari angit. ¹² Tapi sanape samuae koa, kao akan ditangkap ba dipalasah; kao akan disarahatn ka rumah-rumah ibadah ba pinjara-pinjara, tarus kao akan diadapatn baraja-raja ba panguasa-panguasa oleh karna dama-Ku. ¹³ Hal koa akan jaji kasempatan nyu untu' basaksi. ¹⁴ barang koa tatapatnlah ka daapm atinyu, biar kao ame mikiratn labih doho' pembelaannyu. ¹⁵ Barang Aku babaro akan mare' ka kao kata-kata hikmat, jaji kao ina' bisa ditantakng ge' dibantah lawan-lawannyu. ¹⁶ Ba kao akan disarahatn uga' di urakng tuhanyu, saudara-saudaranyu, kamaru'knyu, ayukng-ayukngnyu ba sangahe urakng nang ka antaranyu akan dibunuh ¹⁷ ba kao akan ditegetatn samua urakng karna dama-Ku. ¹⁸ Tapi ina' saamar pun buu'k kapalanyu akan ilang. ¹⁹ Kade' kao tatap batahan, kao akan namuan idupnyu. ²⁰ "Kade' kao nee' Yerusalem dingipong di tantara-tantara, tauatnlah kade' karuntuhan udah samak. ²¹ Sawaktu koa urakng-urakng nang barada ka Yudea harus dariatn diri' e ka bukit, ba urakng-urakng nang barada ka daapm kota' harus ngungsi, ba urakng-urakng nang barada ka kampokng ame taama'k agi'k ka daapm kota', ²² barang koalah masa pembalasan nang menggenapi samua nang ada tatulis. ²³ Cilakalah nang bini-bini nang gi'k babuntikng ge' nang gi'k nyusui'k kamuda' ola ka pada waktu koa! Barang akan atakng kasasakatn nang aya'k ka atas samua nagari ba murka ka atas bangsa nyian, ²⁴ ba kabatnne akan mati dimata pedang ba dingicakng jaji tawanan ka sagala bangsa, ba Yerusalem akan ditinyak-tinyak di bangsa-bangsa nang ina' kanal Jubata, sampe ganaplah jaman bangsa-bangsa koa." ²⁵ "Ba akan ada tanda-tanda ka mataari ba buatn ba bintakng-bintakng, ba ka bumi bangsa-bangsa ana gai' ba mangap ngadapi' bunyi ba guruh laot. ²⁶ Urakng akan mati kagaiatn di garikng gamas bahubung ka sagala ahe nang nimpa bumi nyian, barang kuasa-kuasa angit akan baguncang. ²⁷ Waktu koa urakng ana akan nee' Anak Manusia atakng ka daapm rahu' ba sagala kakuasaan ba kamuliaan-Ne. ²⁸ Kade' samuae koa mulai tajadi, umpatlah ba angkatlah muhanyu, barang panyalamatan nyu udah samak." ²⁹ Lalu Yesus ngataatn paumpamaan nyian ka kabatnne: Paratiatnlah puhutn ara ge' puhutn ahe maan. ³⁰ Kade kao nee' puhutn-puhutn koa udah ba tarok, kao nauan babaro kade' munsim angat udah samak. ³¹ Yakoa uga'k, kade' hal-hal koa tajadi, tauatnlah kade' Karajaan Jubata udah samak. ³² Aku bakata kakao: Sasidie angkatan nyian ina' akan balalu, sanape' samua koa terjadi. ³³ Angit ba bumi akan baahir, tapi pakataatn-Ku ina' akan balalu." ³⁴ "Jagalah diri'knyu, biar atinyu ame dipanuhi pesta pora ba kamabuk ba kapentingan-kapentingan duniawi ba biar ari Tuhan ame tiba-tiba jantu'k ka atas diri'knyu aya suatu jerat. ³⁵ Barang ia akan napo'k samua panduduk bumi. ³⁶ Sau bajaga-jagalah sambi badoa, biar kao namu kakuatan untu' lapas dari samua nang akan tajadi koa, ba biar kao tahan badiri ka adapatn Anak Manusia. ³⁷ Waktu siakng ari Yesus ngajar ka Rumah Sambayang ba maam ari Ia kaluar ba bamaam ka bukit nang badama Bukit Jaitun. ³⁸ Ba bakaapm ari samua urakng manyak atakng ka Ia ka daapm Rumah Sambayang untu' nangaratn Ia.