¹ Ka sote' ari sawaktu Yesus ngajar urakng manyak ka Rumah Jubata ba maritaatn Injil, ataknglah imam-imam kapala ba ahli-ahli Taurat ba tua-tua dikoa, ² tarus kabatnne bakata ka Yesus: "Kataatnlah ka kami ba kuasa mae kao minjawat hal-hal koa, ba sae nang mare' kuasa koa ka-Kao? ³ Ja Yesus ka kabatnne: "Aku uga'k mao' ngajuatn sete' pertanyaan ka kao. Kataatnlah ka-Aku: ⁴ Baptisan Yohanes koa, dari saruga ge'k dari manusia?" ⁵ Kabatnne barukupm ba sabayaatne, tarus bakata: "Kade' diri'k bakata: Dari saruga, Ia ana bakata: Ngahe gek kao ina picaya ka ia? ⁶ Tapi kade' diri'k bakata: Dari manusia, samua rakyat ana nabaki' diri'k babatu, barang kabatnne koa yakin kade' Yohanes koa nabi." ⁷ Tarus kabatnne nyawap, kade' kabatnne ina'k nauan dari mae baptisan koa. ⁸ Tarus ja Yesus ka kabatnne: "Kade' yakoa, Aku uga'k ina'k akan ngataatn ka kao ba kuasa mae Aku minjawat hal-hal koa." ⁹ Tarus Yesus ngataatn sete' paumpamaan nyian ka urakng manyak: "Ada urakng muka' kabon anggor; apas koa ia nyewaatn ka panggarap-panggarap tarus barangkat ka nagari lain untu' waktu nang aga'k lama. ¹⁰ Tarus sawaktu udah sampe munsim panen ia nyuruh seko' ambae atakng ka panggarap-panggarap koa, biar kabatnne koa nyarahatn sabagian dari asil kabon anggor koa ka ia. Tapi panggarap-panggarap koa mangkong amba koa ba nyuruh ia puakng ba tangan kosong. ¹¹ Apas koa ia nyuruh seko' amba nang lain , tapi amba koa ugak dimangkong ba dimasupe'ik di kabatnne koa, tarus di nyuruh puakang ba tangan kosong. ¹² Apas koa ia nyuruh ambae nang katalu, tapi urakng koa dingukai'k uga'k dikabatnne, tarus dinabakatn ka luar kabon koa. ¹³ Lalu jakata tuan kabon anggor koa: Ahe ge'k nang harus ku pabuat? Aku mao nyuruh anakku nang kungasihi'k; pasti ia kabatnne koa tanguan. ¹⁴ Tapi sawaktu panggarap-panggarap koa nee' anakke koa, kabatnne barukupm, jare: Ia koa ahli waris, je'k diri'k munuh ia, biar warisanne nyian jaji milik diri'k. ¹⁵ Tarus kabatnne nabakatn ia ka luar kabon anggor koa ba munuh ia. Ampeatn ahe nang akan dipabuat tuan kabon anggor koa ka kabatnne? ¹⁶ Ia akan atakng ba munuh panggarap-panggarap koa, ba micayaatn kabon anggor koa ka urakng lain." Nangar koa kabatnne bakata: "Ame sampe! ¹⁷ Tapi Yesus nee' kabatnne lalu bakata: "Kade' yakoa ahelah ratie nas nyian: Batu nang dimuang di tukang-tukang bangunan udah jaji batu panjuru? ¹⁸ Sae nang jantu' ka atas batu koa, ia akan ancur, ba sae nang dinapo'k dibatu koa akan ancur." ¹⁹ Lalu ahli-ahli taurat ba imam-imam kapala barusaha nangkap Ia pada waktu koa uga'k, barang kabatnne koa nauan kabatnne koalah nang dimaksut-Dihe daapm paumpamaan koa, tapi kabatnne gai' ka urakng rami. ²⁰ Ahi-ahli Taurat ba imam-imam kapala maratiatn Yesus. Kabatnne nyuruh urakng nang bapura-pura jujur ka Yesus, biar kabatnne bisa mijarat Ia ba pertanyaan ba nyarahatn Ia ka nang bakuasa ba kakuasaan wali nagari. ²¹ Urakng-urakng koa ngajuatn pertanyaan nyian ka-Ia: Guru, kami nauan, kade' samua pakataatn ba pangajaratn-Nyu banar ba Kao ina' ngago'k muha, tapi Kao jujur ngajaratn maraga Jubata. ²² Muih ge'k ina' kami mayar pajak ka Kaisar?" ²³ Tapi Yesus nauan maksut kabatnne nang licik koa, tarus bakata ka kabatnne: ²⁴ "Tojokatnlah ka Aku sote' dinar; gambar ba tulisan sae ge' dikoa?" Ja kabatnne: "Gambar ba tulisan Kaisar." ²⁵ Tarus ja Yesus ka kabatnne: "Kade' yakoa bareatnlah ka Kaisar ahe nang wajip kao bareatn ka Kaisar ba ka Jubata ahe nang wajip kao bareatn ka Jubata. ²⁶ Tarus kabatnne ina' bisa mijarat Ia daapm pakataatn-Ne ka adapatn urakng rami. Kabatnne heran ka Jawapan-Ne koa tarus kabatnne badiaman. ²⁷ Lalu ataknglah ka Yesus sangahe urakng Saduki, nang ina'k ngakoi'k adae kabangkitan. Kabatnne batanya' ka Ia: ²⁸ "Guru, Musa nulisatn parentah nyian untu' diri'k: Kade' urang, nang ada ba adik baradi'k nang laki mati sedangkan bini e masih ada, tapi ia ina ningaatn anak, saudarae harus panganten ba bini e koa ba mangkitan katurunan untu' saudara e koa. ²⁹ Ada tujuh urakng adik baradi'k. Nang pertama panganten ba nang bini lalu mati ina ina barana'k. ³⁰ Tarus nang bini koa dimanganteni'k di nang kadua, ³¹ tarus nang katiga uga', lalu yakoa taruslah baturut-turut di ba tujuh adik baradi'k koa, kabatnne koa samua mati ina barana'k. ³² Ahire nang bini koa pun mati. ³³ Aya mae ampeatn nang bini koa, sae ge' ka antara urakg-urakng koa nang jaji akie ka ari kabangkitan ana? Barang batujuh urakng koa udah panganten ba ia." ³⁴ Ja Yesus ka kabatnne: "Urakng-urakng dunia nyian panganten ba dimangantenan, ³⁵ tapi kabatnne nang dinganggap pantas untu' namu bagiatn daapm dunia nang lain ba daapm kabangkitan dari antara urakng mati, ina' panganten ba ina' dimangantenan. ³⁶ Barang kabatnne ina' bisa mati agi'k, kabatnne sama aya malaekat-malaekat ba kabatnne koa anak-anak Jubata, barang kabatnne udah dimangkitan. ³⁷ Parihal bangkitte urakng-urakng mati, Musa udah mare nauan daapm nas parihal tompoatn duri, dimae Jubata dinyabut Jubata Abraham, Jubata Isak, ba Jubata Yakub. ³⁸ Ia buke' Jubata urakng mati, tapi Jubata urakng idup, barang ka adapatn Ia samua urakng idup. ³⁹ Nangar koa sangahe urakng ahli Taurat bakata: "Guru , jawapan-Nyu koa batol sidi." ⁴⁰ Barang kabatnne ina' barani agi' nanyaann'ak ahe-ahe ka Yesus. ^{42 41} pi Yesus bakata ka kabatnne: "Ayamae urakng nang bakata kade' Mesias koa Anak Daut? ⁴² Barang Daut babaro bakata daapm kitap Masmur: Jubata udah bafirman ka Tuanku: duduklah ka sabalah kanan-Ku, ⁴³ sampe Ku minjawat munsuh-munsuh-Nyu jaji paninyakatn paha-Nyu. ⁴⁴ Jadi Daut nyabut Ia Tuanne, ayamae mungkin Ia anakke uga'k?" ⁴⁵ Sawaktu samua urakng rami nangaratn, Yesus bakata ka murit-murit-Te: ⁴⁶ "Waspadalah ka na' ahli-ahli Taurat nang suka bajaatn-jaatn make jubah panyakng ba suka narima'k penghormatan ka pasar, nang suka duduk ka tampat terhormat daapm pesta, ⁴⁷ nang naatn rumah janda-janda ba nang ngaloki'k mata urakng ba doa nang panyakng-panyakng. Kabatnne koa pasti akan narima' ukuman nang labih barat."