¹ Yesus taama'k ka kota' Yeriko tarus bajaatn ngalewati' kota' koa. ² Di koa ada seko'k urakng nang badama Sakius, kapala pamungut pajak, ia urakng kaya. ³ Ia barusaha untu' nee'k urakng sae ge'k Yesus koa, tapi ia ina'k barasel barang urakng rami, barang badaanne babah. ⁴ Tarus batalama'klah ia nohoi'k urakng rami koa, tarus naiki'k puhutn ara mao'k nee'k Yesus, nang maok lewat dikoa. ⁵ Sawaktu Yesus sampe ka tampat koa, ia nee'k ka atas lalu bakata: "Sakius bijaklah turutn, barang ari nyian Aku harus taama'k ka rumahnyu. ⁶ Tarus Sakius bijak turutn ia repo narima'k Yesus. ⁷ Tapi samua urakng nang nee'k hal koa babisik-bisik, ja kabatnne koa: "Ia taama'k ka rumah urakng badosa." ⁸ Tapi Sakius badiri lalu bakata ka Jubata Yesus: " Jubata, satangah dari nu' ku mao'k aku bareatn ka urakng miskin ba sakira'e ada nang ku maras maok aku puangan ampat kai lipat. ⁹ Ja Yesus ka ia: "Ari nyian udah tajaji kasalamatan ka rumah nyian, barang urakng nyian pun anak Abraham. ¹⁰ Barang Anak Manusia atakng untu' ngagui'k ba nyalamatatn nang ilang. ¹¹ Untu' dangan nang nangaratn Ia dikoa, Yesus ngalanjutatn pakataatn-Ne ba sote' paumpamaan, barang Ia udah samak Yerusalem ba kabatnne nyangka, kade' Kerajaan Jubata mao' bijak kateaatn. ¹² Tarus Ia bakata: "Ada seko' urakng bangsawan barangkat ka sabuah nagari nang jauh untu' di jajiatn raja dikoa ba apas koa ia maok muakng agik. ¹³ Ia nyarui'k sapuluh urakng ambae ba mareatn sapuluh mina ka kabatnne koa, jare: pakelah nyian untu' badagakng sampe aku atakng agi'k. ¹⁴ Tapi urakng-urakng sabangsa e teget ka ia, tarus ngiriman utusan nyoso ia untu' ngataatn: Kami bai' urakng nyian jaji raja kami. ¹⁵ Ba jajilah, sawaktu ia muakng apas ia dinyajiatn jaji raja, ia nyuruh nyarui'k amba-amba e, nang udah ia mare' duit koa, untu' nauan sangahe asil badagakng masing-masing kabatnne koa. ¹⁶ Urakng nang pertama atakng tarus bakata: Tuan, mina tuan nang sete'k koa udah ngasilatn sapuluh mina. ¹⁷ Jakatae ka urakng koa : Baik sidi pabuatannyu koa, o amba nang baik, kao udah setia daapm pakara ene'k, untu' koa tarima'klah kakuasaan atas sapuluh kota'. ¹⁸ Ataknglah nang kadua lalu bakata: Tuan, mina tuan udah ngasilatn lima mina. ¹⁹ Jakatae ka urakng koa: Kao kuasai'klah lima kota. ²⁰ Tarus amba nang ka talu atakng lalu bakata: Tuan, nyianlah mina tuan, aku udah narohi'k ia kadaapm saput tangan. ²¹ Barang aku gai'k ka tuan, barang tuan manusia nang karas, tuan mebet ahe nang ina'k suah tuan tanam ba tuan naap ahe nang ina'k suah tuan tabur. ²² Jakatae ka urakng koa: hei amba nang jahat, aku mao' ngakimi kao sasuai pakataatnnyu babaro. Kao udah nauan kade' aku koa urakng karas, nang naap ahe nang ina'k suah aku tanam ba mebet ahe nang ina'k suah ku taburatn. ²³ Kade' yakoa, ngahe duit ku ina'k kao bareatn maan ka urakng nang majaanan duit? ana kade' pas aku puakng aku bisa naap ia ba bungae. ²⁴ Tarus jakatae ka urakng-urakng nang badiri dikoa: Taaplah mina nang sete' koa dari ia ba bareatnlah ka urakng nang ada sapuluh mina koa. ²⁵ Jakata kabatnne ka ia: Tuan, ia udah ada ba sapuluh mina. ²⁶ Jakatae: Aku bakata ka kao: Satiap urakng nang ada, ka ia akan dibareatn, tapi sae nang ina ada, dari ia ana mao'k ditaap, samua ahe nang ada ka ia. ²⁷ Tapi samua munsuhku nyian, nang ina'k suka aku jaji raja e, icaknglah kabatnne koa ka dian ba bunuhlah kabatnne koa ka adapatn mataku. ²⁸ Apas ngataatn samua koa Yesus nohoi'k kabatnne ba narusatn pajaanan-Ne ka Yerusalem. ²⁹ Sawaktu Ia udah samak Betpage ba Betania, nang ada ka bukit Jaitun, Yesus nyuruh dua urakng murit-Te ³⁰ pasatn-Ne: "Ampuslah ka kampokng nang ka adapatnnyu koa: Sawaktu kao taama'k dikoa, kao akan namui'k seko'k keledai muda' nang dingikat, nang ina suah di taiki'k di urakng. Lapasatnlah keledai koa ba icaknglah ka dian. ³¹ Ba kade' ada urakng batanya'k ka kao: Ngahe kao lapasatn? sahuti'klah yaiyan: Tuhan mararuatn ia." ³² Lalu ampuslah kabatnne nang dinyuruh koa, ba kabatnne koa namui'k samuae sasuai aya nang udah Yesus ngataatn. ³³ Sawaktu kabatnne ngalapasatn keledai koa, bakatalah ampu' keledai koa: "Ngahe kao ngalapasatn keledai koa?" ³⁴ Jakata kabatnne: "Jubata mararuatn ia." ³⁵ Kabatnne ngicakng keledai koa ka Yesus, tarus ngalasi'k ia ba pakean kabatnne ba nolong Yesus naik ka atasse. ³⁶ Ba samintara Yesus naiki'k keledai koa kabatnne ngamparatn pakean ka maraga. ³⁷ Sawaktu Ia samak Yerusalem, ka maraga nang nurutn dari Bukit Zaitun, mulai'klah samua murit nang nunaan Ia karepoatn ba muji Jubata ba suara nang nyarekng barang samua mujisat nang udah kabatnne koa nee'k. ³⁸ Ja kabatnne: " Dibarakati'klah Ia nang atakng nang jaji Raja daapm dama Jubata, damai sejahtera ka saruga ba kamuliaan ka tampat nang sidi tingi!" ³⁹ Sangahe urakng Farisi nang nunaan urakng manyak koa bakata ka Yesus: "Guru, tagurlah murit-murit-Nyu koa." ⁴⁰ Jakata-E: "Aku bakata ka kao: kade' kabatnne koa diam, ana batu nyian nang akan ngampak." ⁴¹ Ba sawaktu Yesus udah samak ba nee'k kota' koa, Ia nangisi'k kota' koa, ⁴² jakata-E: "O, sidi baikke pada ari nyian uga'k kao ngarati ahe nang dipararuatn untu' damai sejahtera nyu! Tapi ampeatn hal koa ina kateaatn di matanyu. ⁴³ Barang akan atakng arie, kade' munsuhnyu mao' ngulilikngi'k kao, tarus ngipong koa ba ngapet kao dari sagala arah, ⁴⁴ ba kabatnne mao' munuh kao ba samua panduduk ba temboknyu kabatnne ina akan miaratn sege'k batupun ada basusun ka atas batu nang lain, barang kao ina'k nauan waktue, kamie Jubata ngampusi'k kao. ⁴⁵ Tarus Yesus taama'k ka Rumah Jubata ba mulai'klah Ia ngoser samua nang badagakng dikoa, ⁴⁶ jakata-E ka kabatnne: "Ada tatulis "Rumah-Ku nyian rumah doa. Tapi kao nyajiatn sarakng panjahat." ⁴⁷ Tiap-tiap ari Ia ngajar ka daapm Rumah Jubata. Imam-imam kapala ba ahli-ahli Taurat ba urakng-urakng terpandang dari bangsa Israel barusaha untu' munuha Ia, ⁴⁸ tapi kabatnne ina nauan, ayamae carae, barang samua rakyat suka ka Ia ba mao'k nangaratn Ia.