¹ Tapi bakaapm sidi ka ari pertama minggu koa kabatnne ngicakng rampah-rampah, nang udah dinyiapatn dikabatnne koa. ² Kabatnne namui'k batu udah taguling dari kubur koa, ³ ba apas taama'k kabatnne ina'k namuan mayat Tuhan Yesus. ⁴ Samintara kabatnne badiri kaheranan di parihal koa, tiba-tiba ada dua urakng badiri samak kabatnne make pakean nang bakilau-kilau. ⁵ Kabatnne sidi kagaianan ba nundukatn kapala, tapi badua urakng koa bakata ka kabatnne: "Ngahe kao ngagui'k Ia nang idup, kaantara urakng mati? ⁶ Ia ina'k ada kadian, Ia udah bangkit. Ingatlah ahe nang udah dingataatn di-He ka kao, sawaktu Ia masih ka Galilea, ⁷ yakoa kade'k Anak Manusia harus disarahatn ka kokot urakng-urakng badosa ba disalipatn, ba akan bangkit ka ari nang ka talu." ⁸ Lalu taringatlah kabatnne ka pakataatn Yesus koa. ⁹ Ba apas kabatnne puakng dari kubur, kabatnne nyuritaatn samuae koa ka basabalas murit ba ka samua nang lain. ¹⁰ Nang bini-bini koa Maria dari Magdala, ba Yohana, ba Maria uwe'k Yakobus. Ba nang bini-bini lain uga'k nang basama-sama ba kabatnne mare'k nauan ka rasul-rasul. ¹¹ Tapi bagi kabatnne pakataatn-pakataatn koa saolah-olah omong kosong ba kabatnne koa ina'k picaya'k ka nang bini-bini koa. ¹² Biarpun yakoa Petrus umpat, lalu bijak-bijak ampus ka kuburan koa, Sawaktu ia nee'k ka daapm, ia nee'k kahe kaikng kapan maan. Lalu ia ampus, tarus batanya'k ka daapm atie ahe kira'e nang udah terjadi. ¹³ Ka ari koa uga'k dua urakng dari murit-murit Yesus ampus ka sabuah kampokng nang badama Emaus, nang tampatte kira-kira tujuh mil jauhhe dari Yerusalem, ¹⁴ kabatnne baromongi'k parihal sagala hal nang udah tajadi. ¹⁵ Sawaktu kabatnne gi'k baromongi'k ba batukar pikiran, ataknglah Yesus babaro nyamaki'k kabatnne, tarus bajaatn basama-sama. ¹⁶ Tapi ada hal nang nutupi'k mata kabatnne koa, jaji ina'k kanal ka Ia. ¹⁷ Yesus bakata ka kabatnne: "Ahe ge'k nang kao ngomongan samintara bajaatn koa?" Lalu barantilah kabatnne ba muha nang sedih. ¹⁸ Seko'k dari kabatnne koa, Kleopas damae, nyahuti'k Ia: Ada ge'k kahe kao seko'k-seko'k e urakng asing ka Yerusalem, nang ina nauan ahe nang tajadi di koa ka dudi-dudi ari nyian?" ¹⁹ Jakata-E ka kabatnne: "Ahe me ia koa?" Ja kabatnne: "Ahe nang tajaji ka Yesus urakng Nasaret. Ia koa nabi, nang bakuasa daapm pakarajaatn ba pakataatn ka adapatn Jubata ba ka adapatn samua bangsa kami. ²⁰ Tapi imam-imam kapala ba pamimpin-pamimpin kami udah nyarahatn Ia untu' diukum mati ba kabatnne udah nyalipatn Ia. ²¹ Padahal kami dee ngarapatn, kade'k Ialah nang akan atakng untu' mebasatn bangsa Israel. Tapi samintara koa udah lewat tau ari, dari ari koa samua tajaji. ²² Tapi sangahe urakng nang bini dari kami udah ngajuti'k kami: Aapm-aapm ari sidi kabatnne udah amous ka kuburan, ²³ ba ina'k namuan mayat-Te. Lalu kabatnne atakng ba barita, kade'k udah kateeatn di kabatnne malaekat-malaekat, nang ngataatn, kade'k Ia idup. ²⁴ Ba sangahe dari ayukng kami udah ampus ka kuburan koa ba namui'k, kade'k memang banar nang dingataatn di nang bini-bini koa, tapi kabatnne ina'k nee'k Ia. ²⁵ Tarus Ia bakata ka kabatnne: "Hei kao urakng bodo, sidi lamahe atinyu, sampe kao ina'k picaya'k sagala hal, nang udah dingataatn di na' nabi-nabi! ²⁶ Buke'k me Mesias harus menderita samuae koa untu' taama'k ka daapm kamuliaan-Ne. ²⁷ Lalu Ia nyalasatn ka kabatnne ahe nang tatulis soal Ia daapm saluruh Kitap Suci, mulai' dari kitap-kitap Musa ba sagala kitap nabi-nabi. ²⁸ Kabatnne nyamaki'k kampokng nang dinuju, lalu Ia babuat saolah-olah mao'k narusatn pajaan-Ne. ²⁹ Tapi kabatnne maksa Ia sidi, jakatae: "Diapmlah basama-sama ba kami, barang ari udah mao'k maam ba mataari amper tingaapm." Lalu taama'klah Ia untu' diapm basama-sama kabatnne. ³⁰ Waktu Ia duduk makatn ba kabatnne, Ia naap roti, ngucapatn barakat lalu macah-macahatn roti, lalu mareatn ia ka kabatnne. ³¹ Sawaktu koa uga'k tabuka'klah mata kabatnne ba kabatnne nganali'k Ia, tapi Ia ngilang dari tangah-tangah kabatnne. ³² Ja nang seko'k ka ayuknge: "Buke'k me ati diri'k gabuh-gabuh sawaktu Ia bakata ba diri'k sawaktu ka maraga ba waktu Ia narangan Kitap Suci ka diri'k?" ³³ Lalu umpatlah kabatnne ba tarus muakng ka Yerusalem. Dikoa kabatnne napati'k sabalas murit koa. Kabatnne gi'k bakomo'k basama-sama ba ayukng-ayukng nge. ³⁴ Ja kabatnne koa: "Sasidie Tuhan udah bangkit ba udah neeatn diri'k-E ka Simon." ³⁵ Tarus badua urakng koa pun nyuritaatn ahe nang udah tajadi ka maraga ba ayamae kabatnne koa nganali'k Ia pas waktu Ia macah-macahatn roti. ³⁶ Lalu samintara kabatnne baromongi'k parihal koa, Yesus tiba-tiba badiri ka tangah-tangah kabatnne: "Damai sejahtera untu'k nyu!" ³⁷ Kabatnne takajut ba gai'k ba nyangka kade'k kabatnne nee'k antu. ³⁸ Tapi Ia bakata ka kabatnne: "Ngahe kao takajut ba ahe sabappe timu karagu-raguan ka daapm atinyu? ³⁹ Tee'klah kokot-Ku ba paha-Ku: Aku babarolah nyian; jangkamlah Aku ba tee'klah, barang antu ina'k ba dageng ya ba tuakng, aya nang kao nee'k ada ka Aku. ⁴⁰ Sambi bakata yakoa, Ia neeatn kokot ba paha-E ka kabatnne ⁴¹ Ba sawaktu kabatnne nape'k picaya'k barang saking karepoatnne ba masih kaheranan, bakatalah Ia ka kabatnne: "Ada ge'k pamakanan kadian?" ⁴² Lalu kabatnne mareatn ka Ia satatak ikatn goreng. ⁴³ Lalu Ia naap ikatn koa ba makatni'k ia ka adapatn mata kabatnne. ⁴⁴ Ia bakata ka kabatnne: "Nyianlah pakataatn-Ku, nang udah Kungataatn ka kao sawaktu Aku masih basama-sama ba kao, pakoa harus diganapi'k samua nang ada tatulis parihal Aku daapm kitap Taurat Musa ba kitap nabi-nabi ba kitap Masmur." ⁴⁵ Lalu Ia muka'k pikiran kabatnne, sampe kabatnne koa ngarati Kitap Suci. ⁴⁶ Jakata-E ka kabatnne: "Ada tatulis ayanyian: Mesias harus menderita ba bangkit dari antara urakng mati ka ari nang ka talu, ⁴⁷ ba uga'k: daapm dama-E barita parihal pertobatan ba pangampunan dosa harus disampeatn ka sagala bangsa, mulai'k dari Yerusalem. ⁴⁸ Kaolah saksi dari samuae nyian. ⁴⁹ Ba Aku mao'k ngiriman ka kao ahe nang dinyanjiatn di Apak-Ku. Tapi kao harus diapm ka kota' nyian sampe kao dipalangkapi' ba kakuasaan dari tampat tingi." ⁵⁰ Lalu Yesus ngicakng kabatnne ka luar kota' sampe samak Betania. Dikoa Ia ngangkat kokot-Te ba marakati'k kabatnne. ⁵¹ Ba sawaktu Ia agi'k marakati'k kabatnne, Ia bapisah ba kabatnne ba tarangkat ka saruga. ⁵² Kabatnne sujut nyambah ka-Ia, tarus kabatnne puakng ka Yerusalem repo sidi. ⁵³ Kabatnne sau ada ka Rumah Jubata ba muliaatn Jubata.