¹ Saulus, tarus ngancam mao' munuha' murid-murid Jubata Yesus. Ia ampus namui Imam Aya', ² onto minta' surat dari sinagog-sinagog ka Damsik. Tujuane, kade' ia batamu ba urak'ng-urak'ng nang jaji pengikut Maraga koa, antah koa nang laki ge' bini, mao' ia ikata' ba ia icak'gnga kabat'ne koa ka Yerusalem. ³ Saulus tangah ka maraga, atak'nglah ia ka samak Damsik. Tiba-tiba, muok sinar tarak'ng dari angit ka sakalilinge. ⁴ Nee koa, ia jantu' ka tanah ba nangar suara bakata ka ia, "Saulus, Saulus, ngahe me kao nyeksa Aku? ⁵ Saulus nyahut, "Sae me Kita' Jubata. Jubata bakata, "Aku Jubata Yesus nang kao nyeksa koa". ⁶ Tapi, taama'lah ka daamp kota, ka naun ana mao Kubare' nauan ka kao ahe nang arus kao pinjawat. ⁷ Urak'ng-urak'ng nang sakarayungan ba Saulus daamp pajaanan koa jaji ta diamp. Kabat'ne nagar suara koa, tapi ia ina nee seko' urak'ngpun ka sakalilingie. ⁸ Saulus pun umpat ba badiri. Waktu ia muka' matae, ia ina mampu nee ahepun; kabat'ne ngejengan kokote, aka koa ngicak'ng ia ka Damsik. ⁹ Salama tau ari lamae, ia ina' bisa nee, ina b isa makat'n ba ina bisa nyocok. ¹⁰ Ada seko murid ka Damsik, damae Ananias. Jubata bakata ia ka daam sabuah mimpi, "Ananias". Ia lalu nyahuti, " Tee' ba, aku ka dian Jubata. ¹¹ Aka koa, Jubata bakata ka ia agik, "Umpatlah, ampus ka maraga nang badama 'Maraga Ocor'. Ka kadiaman Yudas batanya'lah seko' urangk dari Tarsus nang badama Saulus; jukut ga' ia koa gi' badoa. ¹² Ia udah nee' ka daamp sabuah mimpi urak'ng nang badama Ananias koa taama'. Ia nyooat'n kokote ka mata urak'ng koa supaya ia bisa nee'. ¹³ Ananias pun nyahut, "O, Jubata, aku udah manyak nangar parihal urak'ng nyian, talalu manyak sidi kajahatat'n nang suah ia minjawat ka urak'ng-urak'ng kudus nang ada ka nagari Yerusalem nyian ¹⁴ . Ia udah namu kakuasaan dari Imam Kapala onto' nangkapi' samua urak'ng ka dian nang suah nyaru' dama-Nyu. ¹⁵ Tapi Jubata bakata ka Ananias, "Ampuslah, ia koa alat pilihan-Ku onto' ngicak'ng ba maritaat'n damaku ka urak'ng-urak'ng nang ina picaya, ka raja-raja ba piturut'n Israel. ¹⁶ Aku mao' nojokat'n ka ia ayamae aya'e kasingsaraan'tne ana karena dama-Ku nang ia maritaat'n. ¹⁷ Aka' koa, Ananias pun ampus barangkat, taama' ka daamp kadiaman urak'ng koa. Ia nyooat'n kokote ka Saulus sambi bakata, "Pageku Saulus, Jubata Yesus nang kao namui' ka maraga nang kao ngalalui' waktu koa, Ia udah nyuruh aku namui' kao supaya kao bisa nee' agi' ba udah dinginsii' Roh Kudus. ¹⁸ Saat kuihan uga' aya salaput muok dari mata Saulus, ahire ia bisa nee' agik; aka koa ia badiri ba di baptis. ¹⁹ Saulus makat'n lalu kuat agi'. Aka' koa, ia badiap'm ba murid-murid ka Damsik salama dua tau ari. ²⁰ Aka' koa, ampuslah ia maritaat'n Jubata Yesus ka sinagog-sinagog, ba matakat'n bahwa Jubata Yesus koa Anak Jubata. ²¹ Samua urak'ng nang nangar barita koa sidi takagum sambi bakata, "Gajah, ga' urak'ng nyian ihan see dee nang ngancuran urak'ng-urak'ng picaya nang ka Yerusalem? Angkit'n ia dah atak'ng ka dian onto' nangkapa' ba ngicak'ng kabat'ne ka imam-imam kapala. ²² Tapi Saulus jaji labih bakuasa agi', ia jaji panyabab kasulitan ka antara urak'ng-urak'ng Yahudi nang diap'm ka Damsik malalui' bukti kade' Jubata Yesus koa Karistus. ²³ Sangahe ari aka' koa, urak'ng-urak'ng Yahudi sakongkol mao' munuha' Saulus. ²⁴ Tapi rancana koa udah dinahui' doho' dihe. Kabat'ne ngawasi gerbang siak'ng maam onto munuha' ia. ²⁵ Tapi samua murid ngicak'ng ia maam ari, lalu nurunan ia malalui dinik'ng ka daap'm sabuah sobo' aya'. ²⁶ Saatak'nge ka Yerusalem, Saulus nyoba onto bagabung ba samua murite, tapi kabat'ne gai' batamua ba ia, gai' ina' picaya kade' ia koa murit. ²⁷ Tapi Barnabas nyamaki' ia ba ngicakng ia ka rasul-rasul. Ia bakata ka kabant'ne àyamae Saulus nee Jubata ka maraga koa ba Jubata udah bakatai' ba ia, ayamae ka Damsik Saulus ngajar ka daap'm nama Jubata ba sidi barani. ²⁸ Ia batamu ba kabat'ne waktu kabat'ne muok taama ka Yerusalem. Ia ngajar sidi barani ka daap'm dama Jubata Yesus. ²⁹ Ia badabat ba urak'ng-urak'ng Yahudi nang babahasa Yunani; tapi kabat'ne masih tarus barusaha munuha' ia. ³⁰ Waktu page kamaru'e nauan parihal nyian, kabat'ne ngicak'ng ia ka Kaisarea, tarus ka Tarus. ³¹ Ahire, Gareja ka Yudea, Galilea ba Samaria samua'e idup tantaram ba numuh; idup gai' ka Jubata daap'm pangiburan Roh Kudus. Garejapun tumuh sia' aya'. ³² Waktu koa Petrus bajaat'n ka saluruh nagari, ia atak'ng uga ka urak'ng-urak'ng picaya' nang diap'm ka kota Lido. ³³ Ka naun, ia batamu ba urak'ng nang badama Eneas, nang tagurik'ng ka tampat tidure udah lapan tahut'n lamae karana engkok'ng. ³⁴ Petrus bakata ka ia, "Eneas, Jubata Yesus Karistus nyamuhat'n kao. Umpatlah ba rapiat'n pangkengnyu. Sakuihan uga, umpatlah urank'ng koa. ³⁵ Ahire, samua urank'ng nang diam'p ka Lido ba ka Saron nee nang laki koa, lalu kabat'ne pun atak'ng ka Jubata. ³⁶ Waktu koa, ka Yope ada seko murit nang bini badama Tabita, nang kade' diratiat'n koa ratie 'Dorkas'. Nang bini nyian baik mati urak'nge, sidi bakaseh sayan'k ka urak'ng-urak'ng nang kodo saranta'. ³⁷ Waktu koa ia jantu rongko' lalu mati; waktu kabat'ne manii' bangke'e, lalu nguringan ia ka biik atas. ³⁸ Kota Lida koa samak ba kota Yope. Murit-murit udah nangar kade' Petrus ada ka naun, lalu kabat'ne ngirim dua urak'ng nang laki ka sambi bakata baarap sidi, "Ijakilah atak'ng angkit'n ka tampat kami". ³⁹ Lalu Petrus badiri tarus langsung ampus ba kabat'ne. Waktu ia sampe, kabat'ne ngicank'ng ka biik atas. Samua janda badiri sambi batangisat'n ka sampinge, sambi nojokat'n ka ia samua baju pakean nang suah ia minjawat waktu ia masih idup. ⁴⁰ Petrus nyuruh kabat'ne samua muok dr biik koa lalu ia batuut sambi badoa; aka' koa ia nee ka bengke nang bini koa sambi bakata, "Tabita, umpatlah"! Tamih Tabita muka matae, lalu nee ka Petrus, aka' koa ia duduk. ⁴¹ Petrus nyangi'i kokote sambi nuuk'ngi' ia badiri; aka' koa ia nyaru' urak'ng-urak'ng picaya ba janda-janda, aka' koa ia nojokat'n ka kabat'ne kade' nang bini koa idup agi'. ⁴² Kajadian koa sidi ijak tasabar ka saluruh Yope, ba manyak urak'ng nang jaji picaya ka Jubata. ⁴³ Petrus diam'p salama dua tau ari ka Yope ba seko urak'ng laki badama Simon.