¹ Paulus atakng uga ka Derbe ba ka Listra. Ka koa ada seko'k murid badama Timotius; uwe' e koa urakng Yahudi dan udah jaji picaya, sedangkan apa'e urakng Yunani. ² Timotius nyian dikanal baik oleh kamaru-kamaru ka Listra ba ka Ikonium, ³ dan Paulus mao', supaya ia ngayukngi ia ka daapm pajaanan. Paulus nyuruh maak ia barang urakng-urakng Yahudi ka daerah koa, barang satiap urakng nauan kade apa' e koa urakng Yunani. ⁴ Daapm pajaanan nguliling dari kota ka kota Paulus ba Silas nyampeatn kaputusan-kaputusan nang dinaap na rasul ba na panatua ka Yerusalem ba pasatn, biar jemaat nuruti ia. ⁵ Yakoalah jemaat di neguhatn daapm iman dan mangkin lama mangkin batambah aya'k jumbalahe. ⁶ Kabatne ngaintasi tanah Firgia ba tanah Galatia, jukute Roh Kudus nyegah kabatne untu' maritaatn Injil ka Asia. ⁷ Dah sampe e ka Misia kabatne nyoba taama' ka daerah Bitinia, tapi Roh Yesus ina' ngijinan kabatne. ⁸ Salapas ngaintasi Misia, kabatne sampe ka Troas. ⁹ Ka maam arie kateatnlah di Paulus suatu paneanan: ada urakng Makedonia badiri ka koa ngampaki ia, jare : " nyabaranglah ka keatn dan tolonglah kami! " ¹⁰ Salapas Paulus nee paneanan koa, bijaklah kami ngago' kasempatan untu' barangkat ka Makedonia, barang dari paneenan koa kami narik kasimpulan, kade Jubata udah nyaruk kami untu' maritaatn Injil ka urakng-urakng ka dikoa. ¹¹ Lalu kami muakng dari Troas dan tarus langsung balayar ka Samotrake, lalu kaampagi ari e ataknglah kami ka Neapolis; ¹² umpat dikoa kami ka Filipi, kota pertama ka bagian Makedonia nyian, suatu kota parantauan urakng Roma. Ka kota koa kami diapm untu' sangahe ari. ¹³ Pas ari Sabat kami ka uwas pintu gerbang kota. Kami nutuatni' sisi sunge lalu namuan tampat sambayang Yahudi, nang udah kami duga ada dikoa; apas duduk, kami ngomong ka nang bini-bini nang ada bakomo' dikoa. ¹⁴ Seko' urakng dari nang bini-bini koa nang badama Lidia nangar ugak. Ia urakng nang nyua kaikng warna kurebakng, dari kota Tiatira, nang sambayang ka Jubata. Tuhan Jubata muka atie, sampe ia maratiatn ahe nang dingataatn di Paulus. ¹⁵ Salapas ia di maptis barage-rage ba sa insi rumahe, ia maba kami, jakatae : " kade kao bapandapat, kade aku nyian sidi-sidi picaya ka Jubata, ijeklah numpakng taama ka rumahku." ia maksa sampe kami narima iya. ¹⁶ Pas waktu-waktu koa kami ampus ka tampat sambayang koa, kami batamu seko' urakng amba nang bini nang tolen roh tenung; ba tenung-tenugane koa tuan-tuane koa namu pangasilan nang aya'. ¹⁷ Ia nunaan Paulus ba kami dari balakang sambi ngampak, jare: "urakng-urakng nyian adalah amba Jubata Nang Mahatingi. Kabatne mare nauan ka kao maraga kasalamatatn." ¹⁸ Hal koa ia ngalakukan sangahe ari lamae. Tapi waktu Paulus ina tahan agik ka ganguan koa, ia malek ba bakata ka roh koa: " Demi dama Yesus Karistus aku nyuruh kao ka uwar dari nang bini koa." Pas waktu koa ugak kauwas lah roh koa. ¹⁹ Waktu tuan-tuan nang bini koa nee, kade harapan namu pagasilatn ilang, kabatne koa nangkap Paulus ba Silas, lalu narikatn kabatne ka pasar untu' ngadap ka panguasa. ²⁰ Saudah kabatne ngicakng kaduae ngadap ka pangurus-pangurus kota koa, bakatalah kabatne koa, jare:" Urakng-urakng koa ngaco kota' nyian, jukute kabatne koa urakng Yahudi, ²¹ kabatne koa ugak ngajar adat istiadat ,nang dirik salaku urakng Rum ina muih narima gek nuruti iya." ²² Pun urakng manyak umpat nantakng kabatne. Tarus pangurus-pangurus kota koa nyuruh ngarojekatn pakean ka tubuh kabatne ba malasah kabatne koa. ²³ Apas sangahe kai di malasah, kabatne dinabakatn ka daapm pinjara. Kapala pinjara dimarintahatn untu' nyaga kabatne sidi-sidi. ²⁴ Sasuai parentah koa, kapala pinjara namaan kabatne karuang pinjara nang paling tangah ba masokng paha kabatne daapm pasungan nang kuat. ²⁵ Tapi pas kira-kira tangah maam Paulus ba Silas badoa ba ngalaguatn lagu puji-pujian ka Jubata, dan urakng-urakng ukuman nang lain nangaratn kabatne. ²⁶ Tapi pas koa tajadilah gempa bumi nang hebat, sampe rangka-rangka pinjara koa goyah ; pas barage koa ugak tabuka'lah samua pintu ba lapasatnlah pangikat kabatne samua koa. ²⁷ Waktu kapala pinjara koa tadohani dari tidure ba nee pintu-pintu pinjara koa tabuka, ia ngaleletatn pedangnge maok munuha diri' e, barang ia nyangka, kade urakng-urakng ukuman koa udah dariatn diri' e. ²⁸ Tapi Paulus bakata nyarekng, jare: "ame cilakaatn diriknyu barang kami samua masih ada kadian!" ²⁹ Kapala pinjara koa nyuruh ngicakng suuh, lalu bateleh taama' gangatar ta songkop ia ka muha Paulus ba Silas. ³⁰ Ia ngantat kabatne ka uwas, sambi bakata: " tuan-tuan, ahe gek nang harus aku pinjawat biar aku salamat? " ³¹ sahut kabatne :" picayalah ka Jubata Yesus Karistus dan kao akan salamat, kao ba sainsi rumahnyu." ³² Lalu kabatne maritaatn firman Tuhan ka ia ba kasamua urakng nang ada ka rumahe. ³³ Pas jam koa ugak kapala pinjara koa ngicakng kabatne ba nyasah uka' kabatne koa. Sakoa ugak ia ba kaluargae mareatn diri' e dibaptis. ³⁴ Lalu ia ngicakng kabatne ka rumahe ba ngidangan pamakanan ka kabatne. Ia karepoatn sidi, barang ia basainsi rumahe udah jadi picaya ka Jubata. ³⁵ Apas ari siakng pangurus-pangurus kota nyuruh pajabat-pajabat ampus ka kapala pinjara ba pasatn: "lapasatnlah kadua urakng koa!" ³⁶ Kapala pinjara narusatn pasatn koa ka Paulus, jare: pangurus-pangurus kota udah nyuruh ngalapasatn kao; jaji ka uwaslah kao angkitn ka uwarlah dengan salamat!" ³⁷ Tapi Paulus bakata ka urakng-urakng koa: "tampa diadili' kabatne koa udah nyiksa kami, warga negara-warga negara Roma, ka muha umum lalu nabakatn kami ka daapm pinjara. Ampeatn kabatne maok ngauaratn kami diam-diam? ina mungkin yakoa! biarlah kabatne atakng babaro icakng kami kauwas. " ³⁸ Pajabat-pajabat koa nyampeatn pakataatn koa ka pangurus-pangurus kota'. Waktu kabatne nangar, kade Paulus ba Silas koa urakng Rum, gai'lah kabatne. ³⁹ Kabatne atakng minta maaf tarus ngicakng kadua rasul koa ka uwas lalu mohon, biar kabatne ningaatn kota koa. ⁴⁰ Lalu kabatne ningaatn pinjara koa, ampus karumah Lidia; salapas batamu ba kamaru-kamaru e ka koa ba ngiburatn kabatne, barangkatlah kadua rasul koa.