¹ Aku nyian boh kamaru', waktu koa aku ina bisa bakatai' ba kita barang ga' kita waktu koa gi' nape picaya ka Jubata, jadi nang kuihanlah nang minjawat kita' nape' nuha ka daamp Kristus. ² Aku mareat'n susu ka kita', buke' pamakanan nang karas, barang ga' kita' gi' nape mampu narima' pamakanan nang ayakoa. Sampe angkit'n pun kita' gi' nape mampu makat'ni' pamakanan nang karas. ³ Barang ga' kita' masih disabut talino nang nape picaya ka Jubata. Kade' misale ada ka antara kita' nang badangkiat'n ba bataisih pandapat, nang kuihanlah nang nojokat'n kita' koa talino nang ina picaya ka Jubata. Idup kita' pun sabaya ba talino nang ina' picaya ka Jubata. ⁴ Kade' ada misale ka antara kita' nang bakata, "Aku nyian pangikut Paulus", lalu nang seko' agi' bakata, "Aku nyian pangikut Apolos", parihal kuihanlah nang nojokat'n kade' kita' talino nang nape nuha secara rohani. ⁵ Jaji, sae Apolos? Sae Paulus? Kabat'ne kuihanlah nang jaji amba-ambae Jubata, sampe kita' samua jaji urak'ng nang picaya' ka Jubata, samuae' koa nunaan maraga nang Jubata dah mare' ka kabat'nne. ⁶ Aku nang nanam, Apolos nang nyirami'nya, tapi Jubata nang mare'nya sampe idup numuh. ⁷ Nang paling utama koa buke'nya sae nang nanam atau ge' sae nang nyirami'nya, tapi Jubata lah nang mare'nya idup numuh. ⁸ Baik nang nanam, baiknya nang nyirami'nya, nang koa saba' sabaya; samua'e siang narima' upahe sasuai ba pakarajaat'ne babaro. ⁹ Kami nyian ayuk'ng sakarayungan Jubata; kita' koa uma ba radak'nge Jubata. ¹⁰ Sesuai ba pangasihat'n nang udah dimare' Jubata ka aku, aku nang dah jaji ahlie minjawat sagala bangunan ahe maan, udah naruhi' pondasi nang banar sampe urak'ng lain mangun tarus ka atase. Tapi ana, satiap urak'ng harus maratiat'n ayamae ia harus minjawat ahepun ka atase. ¹¹ Ina' ada seko' urak'ngpun nang mampu naruhi' pondasi lain, salain dari pondasi nang udah dinaruhi', nang dinyabut Yesus Kristus. ¹² Antahlah urak'ng minjawat radak'nge ba pondasi amas, perak, batu baraga, kayu, atau rumput karik'ng, ¹³ sakai ana pakarajaat'n dangan pasti kateeat'n. Ari kiamat ana nang nojokat'nnya, barang ga' ana bisa kateeat'n ba api, ayamae pakarajaat'n urak'ng dinguji ba api koa. ¹⁴ Kade pakarajaat'n nang diminjawat dangan koa sidi koat ujian, ia ana namu upahe. ¹⁵ Kade' pakarajane tatunu, memang rugi sasidie ia, tapi ia babaro salamat dari api koa. ¹⁶ Nauan ge' ina kita' kade kita' koa Radak'nge Jubata, dikuihanlah Roh Jubata badiap'm? ¹⁷ Kade' ada urak'ng nang ngancurat'n Radak'ng Jubata koa, maka Jubata pun ana pasti munuh ia. Radak'ng Jubata koa kudus, Radak'ng Jubata koa kita' kuihanlah nang dimaksut. ¹⁸ Ame seko' urak'ngpun ka antara kita' nang ngaloki' diri'e babaro. Kade' ada ka antara kita' nang matakat'n diri'e paling caradik ka taino nyian, biarlah ia sia' baga, supaya ia ada hikmat nang atak'ng dari Subayat'n. ¹⁹ Samua kapintarat'n nang atak'ng dari taino nyian samua'e koa ina' ada ratie ka adapat'n Jubata. Dee are' dah ada nang nulis jare: Ia nang naap urak'ng nang ngarasa diri'e pintar. ²⁰ Ada agi' nang nulis jare: "Jubata siang nahui' samua rancana urak'ng nang pintar; samua'e koa siang ina ada gunae. ²¹ Angke kuihanlah ame seko' urak'ngpun nang ngarasa diri'e paling caradik dari samua urak'ng, barang ga' samua koa dah siang nu' kita', ²² baike nya Paulus, Apolos atau ge' Kefas, baiknya taino nyian, idup ge' mati, baiknya angkit'n atau ge'nya ana. Samua'e nu' kita'. ²³ Kita' koalah ampu' Kristus, Kristus ampu'e Jubata.