¹ Sunsung kiat bujur, imam-imam panga entu ngulah isa kapakat nihi ire tuha-tuha, nihi ahli-ahli Taurat, nihi kaluhan Sanhedrin. Dan, ire nuruk Yesus, nunda-Aye tulak, de manyareh-Aye gi Pilatus. ² Lahui, Pilatus nane gi-Aye, " Inonkah Kayo Raja ulun Yahudi?" Balalu, Aye ngajawab, " Kayo sa mara'e." ³ Udi hio, ire iman panga entu nuduh Yesus pol-polan. ⁴ Balalu, Pilatus nane "Inonkah kayo bakoi ngajawab aye ? indi, papire ajoh tuduhan ire de ngalawan_Kayo." ⁵ Tapi, Yesus bakoi lagi ngajawab sehingga Pilatus kawauh. (Yesus nihi Barabas) ⁶ Waktu Andrau Paskah, Pilatus biasa mampabebas pakai ire erangkulun tahanan sa ire lako. ⁷ balalu, naan erangkulun baaran Barnabas haot detahan sasama ire pembarontak sa ngunu huang waktu pemberontakan. ⁸ Ulun ajoh hawi balalu mulai lako gi Pilatus de ngulah sameh kebiasaan sa aye ulah gi ire. ⁹ Balalu, Pilatus ngajawab ire nihi bapander, "Inonkah kayo kakan supaya kuki mampabebas gi kayo Raja ulun Yahudi iti?" ¹⁰ Ulah, aye karasa bahwa ire imam panga entu haot manyarahkan Yesus ulah bahiri. ¹¹ Tapi, imam-imam panga entu malah mangurapi ulun ajoh pakai lako Pilatus mampabebas Barabas. ¹² Lahui, Pilatus bapander lagi gi ire, "Jari, inon sa harus kuki ulah nihi Ulun sa kayo antuh Raja ulun Yahudi iti?" ¹³ Balalu, ire kamiak-kamiak lagi, "Salibkan Aye!" ¹⁴ Udihio, Pilatus bapander gi ire, "Uwahinon? Kajahatan inon sa haot Aye ulah?" Tapi, ire kamiak-kamiak labih mehet lagi, "Salibkan Aye!" ¹⁵ Ulah kakan mamuaskan aheng ulun ajoh, Pilatus mampabebaskan Barnabas gi ire, nihi udi nyambuk Yesus, aye nyarahkan-Aye pakai desalibkan. (Yesus Dekea nihi Desiksa) ¹⁶ Balalu, ire prajurit nunda Yesus huluk gi istana, ayehio gedung pengadilan, nihi ire nerau kaluhan pasukan bakumpul. ¹⁷ Lahui, ire makai-Aye jubah ungu, nihi udi mapundru sebuah mahkota barunrui, ire makai'e gi Yesus. ¹⁸ Udihio, ire mulai mara tabe gi-Aye, "Tabe, Raja ulun Yahudi!" ¹⁹ Balalu, ire ngompak ulu-E nihi isa paring balalu nura-Aye, lahui dukud nyembah-Aye. ²⁰ Udi ire ngalahulut Yesus, ire ngalapas jubah ungu teke Yesus, balalu nyuluk lamba Aye kakareb. Lahui, ire nunda Yesus kaluar de nyalipkan-Aye. (Penyaliban Yesus) ²¹ Balalu, ire maksa ulun sa rahat mitah, Simon ulun Kirene, sa rahat hawi teke tumpuk, ambah teke Aleksander nihi Rufus, de mikul salib-Aye. ²² Lahui, ire nunda Yesus gi uneng baran Golgota, sa arti'e "Uneng Tengkorak." ²³ Ire ngami-Aye anggur bacampur mur, tapi Aye bakoi nugo. ²⁴ Udihio, ire nyalib Aye lahui nyabagi lamba-Aye ta helang ire, sambil manting undian de menentukan bagian inin sa ta'u dealap ulah asing-asing. ²⁵ Balalu, waktu hio jam katelu ketika ire nyalip-Aye. ²⁶ nihi, tulisan mengenai tuduhan tahadap yesus detulis, "Raja Ulun Yahudi." ²⁷ Lahui, ire nyalib rueh ulun parampok sasama nihi-Aye, erangkulun ta tuhi kawan-Aye nihi erangkulun ta tuhi kawi-Aye. ²⁸ Jari, tergenapilah Kitab Barasih sa mara, "Nihi, Aye tahitung ta helang ulun-ulun durhaka." ²⁹ Udihio, ulun-ulun sa rahat mitah ngahujad Yesus sambil ngakilik ulu ire balalu bapander, "Oi! Kayo sa sagar pajujuh Bait Allah nihi ngabangun'e waleng huang telu andrau, ³⁰ salamatkanlah tenga-Kayo kakareb nihi minaulah teke salib!" ³¹ Kalahio lei iman-iman panga entu, sasama nihi ire ahli Taurat, nge'a Yesus nihi bapander isa sama lain, "Aye manyalamatkan ulun lain, tapi Aye bakoi ta'u manyalamatkan tenga-Aye kakareb! ³² Biar bo Mesias, Sang Raja Israel, wayah ti minau teke salib supaya taka ta'u ngindi nihi percaya." Ire sa desalibkan sasama nihi Yesus lei mencela Aye. (Kapatean Yesus) ³³ Waktu jam kaenem, terjadi kegelapan ta kaluhan tane hio hampe pada jam kasu'ei. ³⁴ Waktu jam ka-9, Yesus kamiak nihi bapander sa mehet, "Eloi, Eloi, lama sabakhtani," sa arti'e "Allah-Ku, Allah-Ku, uwahinon Kayo nanan Kuki?" ³⁵ Balalu, udi ngarengei aye, papire ulun sa mindri ta rite-Aye bapander, "Indi! Aye nera'u Elia." ³⁶ Lahui, erangkulun malempat, nihi ngisi erang spons nihi anggur asem, balalu pakuneng ta isa paring, nihi ngami'e gi Yesus de ko'ot, sambil bapander, "Elah bo taka ngindi inonkah Elia sagar hawi de pakinau Aye ." ³⁷ Udihio, Yesus bapander nihi suara mehet balalu ngitus hewuk terakhir-E. ³⁸ Waktu hio, tenda Bait Allah winsit jari rueh, teke ambau hampe gi leba. ³⁹ Balalu, waktu pamimpin pasukan, sa mindri nadap Yesus, ngindi kalawe Yesus ngitus hewuk terakhir-E, aye bapander, "Bujur, ulun ti ayehio Anak Allah !" ⁴⁰ Ta anai lei naan papire wawei sa ngindi teke lawit, de helang ire ayehio Maria Magdalena, Maria ine Yakobus Muda nihi Yoses, serta Salome. ⁴¹ WAktu Yesus naan ta daerah Galilea, ire nutah Aye nihi ngalayani Aye. Nihi, ta anai naan ajoh wawei lain'e sa hawi sasama Yesus gi Yesusalem. (Ngogang Yesus) ⁴² Waktu andrau haot malem, ulah andrau hio ayehio Andrau Persiapan, ayehio andrau samete andrau Sabat, ⁴³ Yusuf ulun Arimatea hawi, erangkulun anggota Majelis Habte sa dehormati, sa tenga'e lei ngandrei-ngandrei kehawian Kerajaan Allah, nyangkaleh tenga nihi tulak gi Pilatus balalu lako tenga Yesus. ⁴⁴ Pilatus kawa'uh ngarengei bahwa Yesus haot matei. Aye nerau pemimpin pasukan nihi nane Yesus haot matei. ⁴⁵ Udi Pilatus karasa teke pamimpin pasukan, aye ngami mayat hio gi Yusuf. ⁴⁶ Balalu, Yusuf midi kain lenan nihi pakinau mayat Yesus, udi ngabungkus-Aye huang kain lenan hio, aye mampakading-Aye ta huang ogang sa dekadi ta bontot watu. Balalu, aye ngaguling sebuah watu gi banawang huluk ogang. ⁴⁷ Maria Magdalena nihi Maria ine Yones ngindi uneng mayat Yesus depakading.