¹ Dan, waktu andrau Sabat haot nangkah, Maria Magdalena, Maria ine Yakobus, serta Salome, haot midi rempah-rempah sehingga ire induh tulak dan ngaminyak Yesus. ² Sunsung kiat ta andrau pertama minggu hio, waktu mate andrau hulet, ire hawi ge ogang. ³ Ire bapaner sama ire, "Hie sa induh ngaguling watu hio nike banawang ogang?" ⁴ Namun, udi ngindi gi entu, ire ngindi watu kangante hio haot de galing. ⁵ Dan, udi suluk ge huang ogang, ire ngindi erangkulun pamuda sapakai jubah mahilak rahat maharung ta tuhi kawan, dan ire embah. ⁶ Lahui, aye ngantuh ge ire, "ada embah, kaon ngelo Yesus ulun Nazaret sa haot na salib. Aye haot mambai. Aye bakoi naan tanggar ti. Indi tanggar uneng ire sapakading Aye. ⁷ Akan tetapi, tulaklah, antuhlah ge murid-murid-E dan gi Petrus bahwa Aye rahat ngadahulu kaon ge Galilea. Anggar anai, kayo bakahalu Aye, ngalut sadewara-E ge kayo." ⁸ Udi hio, ire balua dan buyo neke ogang gana ire tarewen, dan ire bakoi ngantuh inon-inon ge hie bo gana ire tamam katakut e. [Dan, kaluhan sa haot dehunyu supaya ire mara ge Petrus lawan kawal e, ire mara e singkat bo. Udi hio, Yesus kakarepe sanun yu ire neke Timur hampe ge Barat, de mara kabar sa maeh dan sabakoi induh binasa tentang keselamatan kekal. Amin. ] ( Yesus Nyantarang Arepe ge Murid-Murid-E ) ⁹ Waktu Yesus mambai susung kiat ta andrau pertama huang minggu hio, Tuku e Aye hulet ge Maria Magdalena saneke aye Yesus lahui pakuyo pitu roh raat. ¹⁰ Aye lahui tulak de mara ge ire sa hayak Yesus, sementara ire rahat berduka dan nangis. ¹¹ Dan waktu ire ngarengei bahwa Yesus welum dan haot de indi ulah aye, ire bakoi percaya. ¹² Udi kajadian hio, Yesus hawi ge ire huang rupa salain rahat ire rueh takia ge tumpuk. ¹³ Lahui, ire waleng de mara ge ire salain, tapi ire salain bakoi percaya. ( Yesus Bapaner lakun Murid-Murid ) ¹⁴ Udi hio, Aye hawi kakarep ge sabalas murid-E rahat ire maharung kuman dan Aye nagur ire gana ire bakoi percaya dan makeng. Sebab, ire bakoi yakin ge ire sa haot ngindi Aye udi aye muan. ¹⁵ Dan, Aye ngantuh ge ire, "Tulaklah ge kaliling dunia dan waralah Injil ge kaluhan ciptaan. ¹⁶ Hie sa haot percaya dan haot de pandrus cagar de selamatkan, tapi hie sa bakoi percaya cagar dehukum. ¹⁷ Dan, tanda-tanda iti kakan umba ire sa percaya: Huang aran Kuki ire kakan pakuyo roh-roh raat; ire kakan bapaner pakai bahasa-bahasa bio; ¹⁸ ire kakan nyaput nipe, de ire ko'ot wisa sa ta'u pakatei, tapi ire bakoi ta'u celaka; ire kakan nondok tangan ta hambau ulun-ulun sa bareten, dan ulun-ulun hio ta'u ranai." ( Yesus Pakenat ge Surga ) ¹⁹ Lahui, udi Tuhan Yesus ngantuh ge ire, Aye pakenat ge surga dan maharung tuhi kawan Allah. ²⁰ Lahui, ire tulak dan berkhotbah ta awe-awe, sementara Tuhan bagawi sasama ire dan de pakuat firman-E nangkah ciri-ciri sa umba-e.