¹ Sucedeu que despois destas cousas, o copeiro e o panadeiro do rei de Exipto delinquiron contra o seu señor, o rei de Exipto. ² Faraón estaba anoxado cos seus dous oficiais, o xefe dos copeiros e o xefe dos panadeiros, ³ e púxoos baixo custodia na casa do capitán da garda, na mesma prisión onde Xosé estaba confinado. ⁴ E o capitán da garda encargoullos a Xosé, e el servíalles, e estiveron baixo custodia por algún tempo. ⁵ E ámbolos dous, o copeiro e o panadeiro do rei de Exipto, que estaban arrestados na prisión, tiveron un soño, cada un tivo o seu propio soño nunha mesma noite, cada soño coa sua propia interpretación. ⁶ Xosé foi onda eles pola mañá e decatouse de que estaban tristes. ⁷ E preguntoulles a estes dous oficiais que estaban con el baixo custodia na casa do seu señor: "¿Por que tedes tan mala cara?" ⁸ Eles dixéronlle: "Soñamos un soño e non hai quen o interprete". E díxolles Xosé: "¿Acaso non son de Deus as interpretacións? Contádemo agora. ⁹ Entón o xefe dos copeiros contoulle o seu soño a Xosé, e díxolle: "No meu soño había unha videira fronte a min, ¹⁰ e na videira tres pólas e, como brotando, a videira botaba flor e os seus acios de uvas maduraban. ¹¹ E a copa de Faraón estaba na miña man e eu collín as uvas e as espremía na copa de Faraón, e puxen a copa na man de Faraón". ¹² E díxolle Xosé: "Este é o seu significado. As tres pólas son tres días. ¹³ Dentro de tres días levantará Faraón a túa cabeza, e restaurarache a túa posición e daraslle a copa de Faraón na súa man, como acostumabas cando eras o seu copeiro. ¹⁴ Pois agora lémbrate de min cando che vaia ben. Por favor, ten comigo graza, e lémbrame ante Faraón e faime saír desta casa. ¹⁵ Pois eu fun arrebatado da terra dos hebreos, e tampouco aquí fixen nada para que me abandonen no cárcere. ¹⁶ Vendo o xefe dos panadeiros que a interpratación fora favorable, díxolle a Xosé: "Tamén eu soñei que tiña tres cestas de pan na miña cabeza. ¹⁷ Na cesta de arriba había toda clase de manxares de pastelaría para Faraón, e os paxaros comían da cesta sobre a miña cabeza." ¹⁸ Xosé respondeu e dixo: "Este é o seu significado: as tres cestas tres días son. ¹⁹ Dentro de tres días quitarache Faraón a túa cabeza e colgarache dunha árbore, e comerán os paxaros a túa carne." ²⁰ Ao cabo de tres días foi o aniversario de Faraón, quen fixo un banquete para todos os seus servos, e levantou a cabeza do xefe dos copeiros o do xefe dos panadeiros na presenza dos seus servos. ²¹ E devolveulle a súa posición ao xefe dos copeiros, e este deu a copa na man de Faraón. ²² Pero aforcou ao xefe dos panadeiros, conforme lles interpretara Xosé. ²³ E o xefe dos copeiros no se lembrou de Xosé, senón que esqueceuse del.