¹ Faloulle Iaveh a Moisés e a Aarón na terra de Exipto, dicindo: ² "Este mes é para vós comezo de meses, que sexa para vós o primeiro dos meses do ano. ³ Faládelle a toda a congregación de Israel, dicindo: "O día dez deste mes que cada quen colla un año, segundo as familias dos pais, un año por fogar. ⁴ E se a casa é pequena, entón collan un año el e o veciño máis preto á súa casa, segundo o número de persoas. Habedes dividir o año en función do que coma cada quen. ⁵ O cordeiro será sen defecto, un macho dun ano. Habédelo coller das ouvellas ou das cabras. ⁶ Gardarédelo até o día catorce deste mes, e toda a congregación o sacrificará á tardiña. ⁷ Despois habedes tomar do sangue e poñelo sobre as xambas e o dintel das casas no que o comades. ⁸ Esa noite comeredes a carne asada ao lume con pan sen lévedo; habédelo comer con herbas agres. ^{9 11} Non comades del nada cru nin fervido en auga, senón asado ao lume, coa cabeza, as patas e as entrañas. ¹⁰ Non deixaredes nada del para a mañá seguinte, e queimaredes no lume o que sobre del á mañá seguinte. ¹² Pois pasarei naquela noite pola terra de Exipto, e ferirei a todo primoxénito na terra de Exipto, así dos homes como das bestas, e en tódolos deuses de Exipto traerei xuizo, eu IaVeH. ¹³ O sangue será para vós por sinal nas casas nas que estedes, e verei o sangue e pasarei sobre vós, e non haberá en vós praga de destrucción cando fira a terra de Exipto.

¹⁴ Este día será para vós día de lembranza, e habédelo celebrar como festa solemne para IaVeH durante as vosas xeracións, por estatuto perpetuo o celebraredes. ¹⁵ Sete días comeredes pans sen lévedo. Dende o o primeiro día faredes que non haxa levadura nas vosas casas, porque quen coma pan levedado dende o primeiro día até o sétimo, esa persoa será cortado de Israel. ¹⁶ O primeiro día haberá xuntanza santa, e tamén o sétimo día teredes xuntanza santa. Neses días non faredes traballo ningún, agás preparar cada quen o que vaia comer. ¹⁷ E celebraredes a festa dos pans sen lévedo, porque neste mesmo día saquei as vosas multitudes da terra de Exipto, polo que coidaredes de celebrar este días nas vosas xeracións por costume perpetuo.

¹⁸ No mes primeiro comeredes o pan sen lévedo, dende o día catorce do mes pola tarde ata o vinteún do mes pola tarde. ¹⁹ Durante sete días non se atopará lévedo nas vosas casas, porque calquera que comere pan levedado será cortado da comunidade de Israel, así sexa estranxeiro como natural do país. ²⁰ Non habedes comer nada levedado, en todas as vosas casas comeredes pan sen lévedo. ²¹ Logo convocou Moisés a tódolos anciáns de Israel, e díxolles: escollede un cordeiro e tomádeo para as vosas familias, e sacrificade a Pascua. ²² E tomade un monllo de hisopo e molládeo no sangue que estará nun caldeiro, e untade o lintel e os dous postes co sangue que estará no caldeiro, e ningún de vós sairá da porta de casa ata a mañá. ²³ Porque IaVeH pasará a golpear aos exipcios e cando vexa o sangue no lintel e nos dous postes, pasará IaVeH sobre a porta, e non deixará ao destructor entrar nas vosas casas para golpear. ²⁴ Gardaredes isto por estatuto para vós e para os vosos fillos para sempre. ²⁵ E cando entredes na terra que IaVeH vos dará, como prometeu, garderedes esta cerimonia. ²⁶ E cando vos pregunten os vosos fillos: que significa este rito para vós? ²⁷ Vós responderedes: É o sacrificio da Pascua de IaVeH, o cal pasou sobre as casas dos fillos de Israel en Exipto, cando golpeou aos exipcios, e liberou as nosas casas. Entón o pobo inclinouse e adorou. ²⁸ E os fillos de Israel foron e fixeron como lle mandara IaVeH a Moises e a Aarón. ²⁹ E aconteceu que a medianoite IaVeH golpeou a todo primoxénito na terra de Exipto, desde o primoxénito de Faraón que se sentaba sobre o seu trono, até o primoxénito do cautivo que estaba no cárcere, e a todo primoxénito dos animais. ³⁰ E levantouse aquela noite Faraón, el e todos os seus servos, e tódolos exipcios. E houbo un gran lamento en Exipto, porque non había casa na que non houbera algún morto. ³¹ Faraón chamou a Moisés e a Aarón na noite e díxolles: levantádevos e saíde do medio do meu pobo, tanto vós como os fillos de Israel. ídevos, servide a IaVeH como dixestes. ³² Collede tamén as vosas ouvellas e as vosas vacas, como dixestes, e marchádevos, e bendicídeme tamén a min. ³³ E os exipcios apremiaban ao pobo, meténdolles présa para botalos fóra, pois dicían: "imos morrer todos". ³⁴ E levou o pobo a súa masa antes de que levedase, as súas maseiras envoltas en sabas sobre os seus ombreiros. ³⁵ E os fillos de Israel fixeron conforme á palabra de Moisés e pedíronlle aos exipcios utensilios de prata, de ouro e roupas. ³⁶ E IaVeH deulle graza ao pobo diante dos exipcios e déronlles canto pedían. Así despoxaron aos exipcios. ³⁷ Partiron os fillos de Israel de Ramsés para Sucot, uns seiscentos mil homes, a pé, sen contar aos nenos. ³⁸ Tamén subiron con eles unha gran multitude, e ovellas e vacas, e moito gando. ³⁹ E da masa que sacaran de Exipto, coceron tortas sen lévedo, pois non levedara, porque ao botalos fóra os exipcios non puideran demorarse, nin tiveran tempo para prepararse comida. ⁴⁰ O tempo que os fillos de Israel habitaron en Exipto foi de catrocentos trinta anos. ⁴¹ Pasados catrocentos trinta anos, nun mesmo día, tódalas multitudes de IaVeH saíron da terra de Exipto. Noite de vixilias é para IaVeH por telos sacado da terra de Exipto. ⁴² Esta noite deben gardar vixilias para IaVeH todos os fillos de Israel ao longo das súas xeracións. ⁴³ E díxolle IaVeH a Moisés e a Aarón: esta é a ordenanza da pascua: ningún fillo de estranxeiro comerá dela, ⁴⁴ mais todo escravo varón mercado con diñeiro poderá comer dela despois de que o circuncidedes. ⁴⁵ Nin o estranxeiro nin o xornaleiro poderán comer dela. ⁴⁶ Ha de comerse nunha mesma casa, e non sacaredes nada de carne fóra da casa, nin lle quebraredes ningún óso. ⁴⁷ Toda a comunidade de Israel así o fará. ⁴⁸ Se algún estranxeiro reside contigo e celebra a pascua a IaVeH, sexa circuncidado todo varón e participe entón na celebración, xa que será logo como nativo da terra, pero que ningún incircunciso coma dela. ⁴⁹ A mesma lei será tanto para o nativo como para o estranxeiro que habite entre vós. ⁵⁰ E tódolos fillos de Israel fixeron como lle mandara IaVeH a Moisés e a Aarón, así fixeron. ⁵¹ E naquel mesmo día IaVeH fixo saír as multitudes dos fillos de Israel da terra de Exipto.