¹ Isa asiata si gumawalina Yeisu Capanaomi deinega i'lamaina, noya si ewaiyana edeto tauna leyawai. ² To deinega kaleya gwauwidi si egogonena medeinai, to nigeisai ebetowa, to Yeisu noya ikawa babadenana deidiyai. ³ Soibwata sieluwa sabasaba tokweno si poiyana si tauyenana Yeisu deinai. ⁴ Nige sawesawenai be si tauyei Yeisu deinai lesinaina giliyewa koiyawe tauna, to si anaena lobe deinai. To' guda si guinuwaiyana abwa tokweno mana ebe si yesalili soluwenana Yeisu deina. ⁵ Yeisu tokweno deinai igwaena igwae, "Natugu nogoyokao yate nua samuidi." ⁶ Aidi palisiyao be to etogawao medeinai si towana, to di nuwanua kwai atediyai si gwaeyenana. Si gwae, ⁷ "Me tauna sidoi i gwae i'sana? Mei etete! Edeto to goyokao ida nuwa samuidi to esige Yatodi taunamo." ⁸ Lomaniniyega Yeisu i mwalatoniana di nuwanuakwai tuwesi kaleya sabina si nuwanua. Yeisu i gwaena deinadiyai, "Tonuwanuwa namei atemiyai? ⁹ Tuwesi kamakamayaina deinai, 'no goyokao yate nuwasamuidi o i gwae 'u to'lo no ebeabui u poi ado u taya?" ¹⁰ Uda anapui edeto tau natuna mana loine baleuwai be goyoka sawesawenai i nuwa samuidi," i guenana tokwenoina, ¹¹ "Yagwae deinamwai, utolo, no ebe u poi, ado u taya no lobeyai." ¹² I to'lona lomaniniyega na ebe i poyana, to i latuna lobedega kaleya soladiyega, abwa nuwadi i yosena to Yatodi si epwatuwenana, "nigeya isai tuta yage nai si da i'taiyana." ¹³ Watei i munena awa deinai togiliewa si molienan, a to i eitana deidiyai. ¹⁴ Nataya deinai Libai i taiyana Alipio natuna i towana toibewa takesi maeyadi i guyenana, "u epoitaunigu," i to'lona to i yepoitauniyana. ¹⁵ Yeisu iyaiyai Libai na lobeyai to takesi ana toibewao be togoyokao si iyaiyai Yeisu natomoliyao maeyadiyao, lesinaina giliewa si moliedina. ¹⁶ Deinega toetogawao be palisiyao si itaiyana, Yeisu to goyokao be takesi ana toibewao maeyanao si iyaiyai, deinega si enaidena na tomoliyao deinadiyai, "Tuwesi sabina togoyokao be toibewa takesi maeyanao si iyaiyai?" ¹⁷ Tutaina Yeisu i yeneneyedina denega i guyedina i gwaena, "kaleyao gitamudi wapi deinega nigenuanuadi to abi egitam; to taudi to lowala nuwanuwadi kaikeda. Nigeya ya tauyama togitamuwao sabidi to esige togoyokao sabidi. ¹⁸ To ioni na to oliyao be palisao si eluelubosi. To kaleya aidi si tauyamaina to si gwaena deinai, "tuwesi sabina Yoni mana tomoliyao be palisiyao adi tomoliyao si eluelubosi, to you otomoliyao nigeyana si daelubosina?" ¹⁹ Yeisu i gwaena deinaidiyai, "sawesawenai totauwaola i luima i elubosi tutaina totawauolaina maitamuna maeyadi? Analaba totauolaina maeyadi, nige sawena be si elubosi. ²⁰ To ana tuta deinai totauwaulaina iyabe i ebesinaidi, mulinai si yelubosi. ²¹ Nigeisai tau kwama auwauna i yepaisewei kwama tulina deinai be i seibai, iyabe bwabwadaina ielabu deinega, mabwena elabu koiyawe tauna ilatu. ²² Nigeisai tau ana lobwene be waupa waiwaina i siwai bwagigoi tulina deinai, maebwena bwagigoi tulina iye bagali be waupa waiwaina be bwagigoi si kwai. Deinega waupa waiwaina u siwai bwagigoi auwauna deina. ²³ Sabate mweduduinai Yeisu i luina kaiwe uwauwa begulina deinai, ana tomoliyao si yeyalena be si bai ado si i'yaoi. ²⁴ Abwa Palisiyao Yeisu deinai si gwaena, "u ita, tuwesi sabina mei neisana si guiguinuwa lewa asiata Sabate deinai. ²⁵ I gwaena denadiyai, "isai, a' sawaiyana Deibida na guinuwao tutaina na towa mwau be na tuta bote deinai- tauna be nakaleyao maeyanao- ²⁶ sidoi to dega i tauyana Yatodi na lobe tabu deinai tutaina Abiata nae toanugeta deinai, to deinega beledi tabu i yaiyana, namei nigea tagwali be teitai iyai, nameinamo Yatodi na tauwao, to beledina i yewaiyan to teitaidi mayanao i bwaedina?" ²⁷ Yeisu i gwaena, "Sabate tomota sabina, to nigeya tomota sabate sabina. ²⁸ Tauna deinega, tau natuna tauna Inapwana, watei tauna Sabate ana Inapwana."