1
Nai Yeisu Keliso noyana na ebe eale, Yesu Keriso Yatodi natuna sabina.
2
Etogawa nai Isaiah Palopita deinega, igwae, "uita ya etuetune nugetenawa gu topili noya tauna mi aiwalo gibwai igibubui.
3
To ena kaikeda itautauyama mutawa poipoiyega igwae, "aiwalo a guinuwai taubada sabina, W'ataei aiwalo ina abi epaepalu."'
4
Tutaina Iyoni itauyana, i abiabi ebabitaiso mutawa poipoiyai, watei i kawa babadana babitaiso be nuwabui be goyoka adi nuwa samu sabidi.
5
Me Yudia gwawidimo be watei kaleya, Yerusalemega si latuna deinai. Si babitaisona waupa Yolidani deinai, to watai di goyokao si epwailidina.
6
Iyoni kameli ululuwana isowaiyana to ana gadiwe kameli wapina, ana bebai kwaipou be mwagagau.
7
To igwae latuna, "kaikeda gwauguwega i tautauyama tauna waiwai wawasae dega yau. Watei yau negeya gitamutaugu be ya pwalou ana kae dagugu ana walowalo yaliasi.
8
Yau ya babitaisoimiu waupega, to tauna gibwai yaluyaluwa tabunega i babitaisoimiu."
9
Mei tutainai Yeisu Nasaletiyega itauyana namai Galili deinai, to Iyoni Yeisu i babitaisoniyana waupa Yolidani deinai.
10
To tutainai Yeisu waupega i ula-anaena, i dunena galewa ie weyalina to yaluyaluwa tabuna i sagasagama tagwae mukumukuwa.
11
Mei deinega, enana galewega i solumaina igwae, "you natu taugu ya awa gitamuwegona."
12
Deinega kalukauwa tabuna lomaninieyega i pwaesenana mutawapoiyai.
13
Mutawapoiyai i towana mwedudu poti to seitani i to'toi ado mutawa lagulagudiyao maeyanao, to aneloseyao si lemaiyana.
14
Yoni si abisiyana mulianai, Yeisu iluina Galili to Yatodi noyana i kawababadenana,
15
I guyedina, "tuta i tetauyama, Yatodi naebeloine ite lo bwalibwalima. U nuwabui be uwemidi noya deinai."
16
Na tayaina wola Galili deinai, i taidina Saimoni aletana Andulu maeyana di panawa si uleulei taudi topanawa.
17
Yeisu deinadiyai i gwaena, "a' moliegu, be aekaleya adi topanawao."
18
Lomaniniega di panawao si ebesinaidina to si moliyenana.
19
Yeisu i basanaona, i 'taiyana Yemesa namei Sabedi natuna ado Yoni ma aletana di kaibwaiyai di panawao siule'ledi.
20
Lomaniniega i bwauwedina to tamadi Sabedi si ebesinaiyana kaibwaiyai na topaisewao maeyanao, to Yeisu si moliyenana.
21
Na taya Kapanaomi deinai, lomaniniyega sabeteyai, abwa iluina lobe tabu solanai to i yegwaisedina.
22
Deinega i naidi lo'na naegwaese tuwa manaloine. Nige neisana toetogawao.
23
Me geda lobe tabugamwanega tau kalukaluwa goyokana deinai i gwae latuna,
24
Igwae, "tuwesi gibwai i guinuwai deinamwai, Yeisu goma Nasaleti?" U tauyana sabi abi egoyokamai? Ya mwalatoniana you teitai. You tabu Yatodi deinega!"
25
Yeisu kalukalu goyokana i guyenana i gwae, "u mwagwa to u latuma tau deinega!"
26
Mulinai kalukaluwaina goyokana tau i ula soluwenana to kalukaluwa goyokana idou latuna enana koiyawenega, to tau deinega i latuna.
27
Kaleya gwaidimo inaidi i lo'na, abwa taudimo si enaida ileiledina, "tuwesi nai? Eita auauna ma waiwaina? Sasawenai watei kalukaluwa goyokadi i loineyedi be si omayabei.
28
Mei wasaina Yeisu sabina i latuna Galili ana maiboana deinai.
29
Tutaina lobe tabu dega si latuna, si tauyana Simon be Andulu di anuwai, Iemesa be Ioni maeyadiyao.
30
Mei deinai Saimoni lawana waineina walobe i talaiyana ite'no abwa Yeisu si guyenana sabina.
31
Deinega Yeisu nimanai abisina to i abi e toloiyana to; lewasi i gumwalina, ga i to'olona i lemaidina.
32
Ala ite duwe, lailaiyai , Tolewasi be taudi kalukaluwa goyokadi deinadiyai si tauyedina deinai.
33
Leyawa gwaidimo si egogonena kawakedai.
34
Malilewasi be malilewasi i abi egitamuidina to watega kalukaluwa goyokadi i ula latuwedina. To nigeisai i tagwatagwali be kalukaluwa goyokadi si awa gwae, lesinaina si onapuiyana.
35
Ma gigintanai, Yeisu ige meto'lona to i tauyana mwatui maisai i lo sidasidana.
36
Simon be teitadi Yeisu maeyanao Yeisu si ebesaiyana:
37
Abwa si lobaiyana to si guyenana "kaleya si ebe'besaiyo."
38
To Yeisu i guyedina, "anaoma be tataya mali leyawai, be deinadiyai ya kaobabada. Namei sabina ya tauyamaina."
39
Yeisu itauyana Galili solana, maiboana deinai i kawakawababada lobe tabu deina watei kalukaluwa goyokadi iyauwe pwaesidina.
40
Tolepelo kaikeda itauyana Yeisu deinanai. Iyae tulasana to i guyenana igwae, "utagwalina be u abi e gitamuigu?"
41
mana ateuweuwe nimana iyasitotoyana to iyabitoiyana to iguyenana tolepeloina "yatagwalina be ugitamu".
42
Me deinega lepeloina taunina deinega i gumwalibesona wate maimaidena.
43
Yeisu loina waiwainega i guyenana to iye tunenana.
44
Yeisu i guyenana, "u taya, to saebana teita u guyeguyei, to u taya be u eiteyo toyaleyale deinai, u ibwayei gwegweidiyao no gitamu sabina, nidoisana Mosese na loine no etala epwaepwali sabina .
45
To taunina i tauyana kaleya gwauidi iguyedina tuwesi Yeisu i guinuwaiyana deinai abwa Yeisu na ayausi aidi sena deinadiyai imwauna. Deinega itauyana leyawa mitawa deinai iloliyana to kaleya malisenega si tauyana deinai.