¹ Yeisu wete ihekale, ma ihegwesena, sewasewa deideina. ma boda sinabawana sihakauta ma sitoholo sakowasiyeya. Koinega, igeluwa wagai, ma silisisuluheya sewasewa koina sihakauta lekahwai. ² Koinega, hegwesena yahuna ihegwesediya, gwaekonakonagai koidiyega. Ma, ina hegwesenaina koina, koidiya, igwaeya. ³ Wahenono, tolelewana ilatuma ma ilelewana. ⁴ Ina lelewanaina koina, haina suwana sibekuwa keda tupi tupidiya, ma manuwe sitauyama ma sikaidiya. ⁵ Haidi suwana sibekuwa baleku gulegulewana koina. nage koina igeya baleku sinaabwana. Koinega suwanina ibwala maniniya, weyaina baleku igeya badonamo. ⁶ Ma, tutaina hala ihala silesowa, weyaina, igeya lamudi isulusulu baleku pwasapwasana ilobaloba. ⁷ Haidi suwana sibekuwa talitali koidiya, ma talitali nidi sibwala ma sididi hemwa wasidiya, koinega, suwanaina igeya huwainamo. ⁸ Haidi suwana sibekuwa baleku kausalana koidiya, koinega sibwala sihaneya, ma sihuwa huwaidi haina teti haina sikisiti ma haina, kaigeda hanaledi. ⁹ Yeisu igwae, taiya matenana inono, tagwala ma ihenono. ¹⁰ Nikatu tomotai sisawala, ma taunamo imiyami, koinega haidi tomotai ma wete ina tononowaho, sinaoma koina, ma sihenaideya, gwae konakonagai weyaina. ¹¹ Koinega Yeisu igwaeya koidiya, komi nikatu, yaubada koimiya ikebwaya, ina kebeloina sola kahikahilina kana tomwalatoiyaho, ma taudi tomiya katamana nuwahowahowanidi gwaekonakonagai sida nono. ¹² Nage koinega kemi sikedune, sawesawena sikedune, ma igeya kabwa sigebe gebe. Kemi wete sihenono yata sinono, ma igeya kabwa sinuwanuwa sabwaleni koinega kemi sinuwa bui, yaubada idigala inuwatahudi. ¹³ Ihegwaediya, gwae konakonagai keiga igeya nuwami isabwasubwalena? Togidega ma gwae konakonagai yahudi wanuwasabwalenidiya? ¹⁴ Tobegula, Yaubada ina gwae ilelewaneya. ¹⁵ Haidi sibekuwa keda papalidiya. Gidemusa Yaubada ina gwae tomotai sinoya, ma seitani itauyama ma koidiyega ikewayahuleya. ¹⁶ Wete gidemusa, suwanaidi sibekuwa baleku gulegulewana koidiya. Taudi Yaubada ina gwae sinonoya ma sigwahusowala, ma sitagwala. ¹⁷ Ma lamudi igeya isulusulu baleku solana. Koinega kemi Yaubada ina paisewa koina kebe toho siloba sibeku manini. ¹⁸ Ma, suwanaidi talitali koina sibekuwa. Tomotai nidi Yaubada ina gwae sinonoya. ¹⁹ Ma esaesa ma baleku kana gwegweyaho kadinuanua koinega igeya sawesawena ma sihuhuwa. ²⁰ Ma suwanaidi baleku kausalana koina, sibekuwa, gidemusa tomotai nidi, maidi kate tagwala, Yaubada ina gwae sinonoya, koinega huwaidi kausaladi ma yahudi sihuwaediya. Haidi teti haidi sikisiti, ma haidi, kaigeda analedi. ²¹ Yeisu igwaeya koidiya sawesawena utauweyama ino mayale hanua solana ma ulagu koneya gabulena, o kebekeno gabulena? Utauweyama ma ulagu kana kebe lagu koina. ²² Tonai ma dahwadahwaidi yata silo katamanedi, ma gwegwe yawuna kwaikwaihina yata silo hapwesedi. ²³ Kemi Taiya matenana ma ihe nono, ulagu ihenono. ²⁴ Ma koidia igwaeya, wa miya kala henono tonai wanonoya koina, mane kana sinabwa uhe paiseweya wete kana sinabwa ukewa, ma sinabwa wawasae yata ike bwaego. ²⁵ Weyahina taiya tuwa koina imiyami yata ikebwae sinabwana, ma kemi togoma igeya, tauna koinega ikewa yahule tonai koina. ²⁶ Yeisu igwaeya, "Yaubada ina kebe loina gidemusa tai ina hewana idauniya balekuwa. ²⁷ Ta hewanaina ihekalea ibwalabiwala boiboi ma kasiyata ma igeya imwalamwalatoni togidega hewanaina ibwalabwala kesa. ²⁸ Ta baleku iloinheya ina bwala ina sinabwa ma ina huwa. ²⁹ Ma tutaina huwaina ina ibwehalia, lomaniniega ilagu hapweweya ina goli weyahina nikatu lolagu kana tuta". ³⁰ Koinega Yeisu igwaeya, tonai sawesawena yahepaisewe ma yagi helehelelei Yaubada ina kebe loina, ma to gwae konakonagai sawesawena yahepaisewe ma ya gihe maedani? ³¹ Yaubada ina kebe loina gidemusa tewa kutuna tauna giyoku wawasae koinega haina wete suwana baleku bewa debana. ³² Ma kemi ubeguli ma ibwala hane ma ihekaiwe sinabwa muliega gwegwe yahuna begubegulidi tanoha solana. Laganaho sinabwadi, be sawewawena manuweyaho idi nehwa siguinuhe koina be ihelogulogudi hala koinega. ³³ Yeisu ina gwae konakonagaiyaho be ihe gwesedi ma sida nua sabwaleni. ³⁴ Yeisu ina kaha gwae tomota koidiya tuta mabwaiyana gwae konakonagai koinega. Ma kemi taudimo igihe maedane yage yahuyahuna ina tononowaho koidiya. ³⁵ Nage tutaina koina kasinuhanuha, Yeisu igwaeya kana tomuliyaho koidiya, " kanageba taha bala mali gayobalega". ³⁶ Boda sinabawana sikebe sinedia ma tononowaho Yeisu sikahukeweya baidadi wagai. Nikatu iluguma haina waga wete baidanao. ³⁷ Nage koina lisu ma yagila sinabwana ikeno hanema ma lisu itasitasiwa taona waga solana ta bwasi waga ilohe maheya. ³⁸ Ma Yeisu taunamo waga solana ikenokeno, ta silo hanohanoya itoholowa ma sihegwaeya. "Tohegeba, igeya unuanua weyahida? Tauda sebi mwawasa nikatu. ³⁹ Yeisu itaholoma ma yagila iheliyeya. ma lisu koina igwaeya. "Usiwaloha, ma ulosaku," koinega yagila ilosakuwa ma hola isiwaloha. ⁴⁰ Yeisu koidiya igwaeya, "Tonai weyaina wamatauta? Nuana igeya imi hemisamo?" ⁴¹ Ta mabwaiyadi nina matauta sinabuwana ilohemahediya ma kaigeda kaigeda toudimo koidiya sigwae gwae. "To tai sana bewa, ta yagila ma lisu kenana sihematamatana koina?"