¹ Wete Yeisu i lugu limana kebe delihegogona solana, nage koina kaigeda tai ma nima tabatabana . ² Haikadi tomotai si kekedune hekahekai be sida gebe kemi igihe bwebweyani sabatiya ma koinega si giyahi. ³ Yeisu i gwaeya tai nina tabatabana koina ku toholoma kebwa gamwagamwana mabwaiyadi koidiya. ⁴ Koinega Yeisu igwaeya tomota koidiya, toguinuha bwebweyana ta guhinuhe sabati koina ma ta lelema bo ta gihegala, ta gihe bwebweyani bo ta lohemwawasi ma tomota si miya kalahenonowa. ⁵ Yeisu i kedunehediya tomotai maina gamwasowala ma wete nuwana i mwahuwa tomotai katediyaho si gihepakalidi. I gwaeya tai nina koina, u yasitoto nima; tai nina nimana i yasitotoya ma i gihebwebweyaniya. ⁶ Lomaniniyega palisiyaho silatuwa ma sitauya, Elodi ina bodaho makiyadiyaho si loina ma tokedakeda koinega ma Yeisu si lohemwawasi. ⁷ Koinega Yeisu ma ina tomuliyaho si tauya holai. Ma boda sinabwana tomotai Galiliyega, Iudiyega si kwayabudiya. ⁸ Yelusalemega, Idumeya Yoridani i sakowasiyeya Taiya wete Saidoni kasanaho koidiya. Ma tomotai boda sinabwana si nonoya mabwaiyana tona Yeisu iguhiguhinuhe ma si tauyama koina . ⁹ Yeisu i gwaeya kana tomuliyaho koidiya waga sida gibubu weyaina, weyaina boda si heduidui madi si losepale. ¹⁰ Yeisu tomotai yahudi i gihebwebweyanediya ma si heduidui Yeisu koina ,. nuwanuwadi Yeisu si kabitoho. ¹¹ Haidi tomotai yaluluwa baibailidi koidiya Yeisu si gebeya ma si beku suluwa Yeisu kaena. Ma si dou hapwesa, ma si gwaeya, kowa Yaubada Natuna. ¹² Yeisu i loina pakalediya be geyakabwa si simasimana hapwesa. Ma Yeisu i kebwaediya loina waiwaina kabwanene gekabwa keta taiya si hehegwae tauna totai. ¹³ I haneya koya tabwana ma taudi i hesinuwediya i lobwauwediya si tauyama koina. ¹⁴ I hesinuwediya tuwelo kadiyahu ma kadiesana i kebwaediya kana tomuliyahonidi .koinega i lobweinediya ma sitauyama baidanaho ma i hetunedi ma si guguya. ¹⁵ Ma waiwai wakewa yaluyaluwa galadi wa paki hapwesedi tomota koidyega. ¹⁶ Si tetuwelo i hesinuwediya, ma Saimoni koina kana esana Pita. ¹⁷ Yemesa Sebedi Natuna, ma Ioni Iyemesa tasina ma Yeisu tononoidi kadi esana i kebwaediya Bowanega kana nuwasabwalena, gugula natuna. ¹⁸ Ma Anidulu, Pilipi, Batolomiu, Madiu, Tomasi, Iyemesa, Alipiyo natuna, ma Tadiiyasi, wete, Saimon Seloti. ¹⁹ Ma, wete Iudasa Isakaliyota tauna Yeisu kana toteba. ²⁰ Nage koinega itauya kasai, ma wete boda yahu wawasae sihakauta koina. Koinega igeya kana lobwaine ma sikakai. ²¹ Tutaina ina susuwaho sinonoya, Yeisu igeya ida heyawaikata, koinega sitauya sabitoeyema, weyaina, sinuweya, kabwanene ikabaleya. ²² Koina loina kana tohegwesenaho Yelusalemega sisuluma ma, Yeisu ina paisewa sinabwana, sigebeya, ma sigwaeya, tai keiga. Bielisibubi ina to paisewa kaigeda. Yauyaluwa galadi idi tai sinabwa. Ina waiwaiyega yaluyaluwa galadi iulaula latuhedi. ²³ Yeisu tomotai ibwauwedima koina ma ihegwaediya tomotoi gwae konaknagai koinega, "togide Seitani sawesawena ina kehe Seitani iula hapwese." ²⁴ Kemi kebeloina i weweyala taunamo, nage kebeloina ina igeya sawesawena itoholo. ²⁵ Kemi hada i weweyala taunamo, nage hada ina igeya sawesawena ma itoholo. ²⁶ Kemi Seitani itoholo limana taunamo, ma i weweyala, igeya sawesawena itoholo ma itauyama kebelosaloha koina. ²⁷ Ma igeya keta taiya sawesawena ilulugu tai waiwaina ina hada ma ikikipwala ina gwegweyaho kemi igeya tai waiwaina i paipai nugete. Muliyetega ina gwegwe ikipwalidi ina hadega. ²⁸ Ya gwae kahikahila koiuwa, tomota idi galaho ida nuwahuyosi ma wete idi gwae besobeso ma gwae gebagebala. ²⁹ Ma taiya kemi igwae besobeso yaluyaluwa tabuna koina gekabwa nuwahuyosa i lobaloba ma beno tomotai nina igala ma igala hataya." ³⁰ Yeisu keiga igwaeneya weyaina si gwaegwae, "tauna koina yaluyaluwa baibailina.'" ³¹ Yeisu sinana ma tasinaho si tauyama ma katamana sitoholowa. Si hetunediya koina ma si bwauwa weyaina. ³² Boda simiya sakowasiyeya ma koina si kahagwaeya, "Sina ma tasimwaho katamana, ma nuwanuwadi simwaratoni to kweha kowa." ³³ Yeisu ihenaideya, totai sinagu ma tasigwaho? ³⁴ I Kedune sakowasiya taudi si miya sakowasiyeya ma igwaeya, ma wa gebe keiga singu ma taisgwaho! ³⁵ Taiya keta tamagu ina nuwanuwa i guinuhe, beno tomotai nina tauna tasigu, ma nuhugu, ma sinagu.