¹ Tuta ina Yeisu i hilalimanama kapaneumi igeya kasiyata yahuyahuna tomoyai si nonoya kabwanene tauna hada solana. ² Boda yahudi si hegogona ma igeya keta sena weyaidi imiyami, hanuwa solana ma wete kahwakeda koina. ³ Haidi boda sitauya ma Yeisu koina tolekwasa sitauwediya ma site hata si kahaliya. i geya kana lobweine ma sitauyama, ⁴ weyaina boda wawasae. Katoha si bwaleya ma siheleleya Yeisu koina . ⁵ Igebeya idi hemisa, ma Yeisu i gwaeya, tolekwasa koina, natugu ino gala ya nuwahuyosiya . ⁶ Haidi loina kana tohekitaho si miyami taudimo si nuwanuwa katediya. Tonai weyaina tai keiga igwae hohopakala Yaubada koina. ⁷ Taiya sawesawena gala inuwatahu Yaubada tebwehuna. ⁸ lomaniniyega Yeisu imwalatoniya yaluluwana solana tonai sinuwanuwa taudimo soladiya. Yeisu i gwaeya tona weyaina wanuwanuwa gahu solamiya. ⁹ Togide yagwae kesa tolekwasa koina ino gala ya nuwahuyosi be ya gwae, utoholo ma ino kebekeno ukahali ma utauya. ¹⁰ Yeisu i gwaeya tolekwasa koina, umwalatoniya tomota natuna maina waiwai i tauyama balekuwa sawesawena gala i nuwahuyosidi. ¹¹ Yagwae koiuwa u toholo ma ino sita u kahali ma u tatauya ino hadai. ¹² I toholowa ma lomaniniyega ina sita i kahaliya ma hadeda i latuwa matadiyega yahudi i lohesalutuidiya ma Yaubada si tupuya ma sigwaeya igeyaketa tada gebeya keiga gidemusa. ¹³ Wete Yeisu i tauya limana Galili lekawina, ma tomota yahudi simuliyeya ma i hegwesena koidiya. ¹⁴ Ina hegwesena i losalohiya ma i tautauya igebeya kaigeda tai kana esana libai beno Alipio natuna. Libai ina kebemiya koina i miyatowa ma takesi i hegohegogonedi. Yeisu i gwaeya koina, ''kumuliyega'', koinega Libai i toholowa ma Yeisu imuliyeya. ¹⁵ Nage kasiyataina gwahuna Yeisu ma kana tomuliyaho sike masula Libai ina hada. Boda tohegogona takesi ma togala sikaikai baidadiyaho benwa taudi bodaidi Yeisu si muliyeya. ¹⁶ Koinega palisi idi loina kana tohegwesenaho si gebeya kabwanene Yeisu ikaikai togala baidanaho, tonai weyahina takesi kana tokewaho ma togala baidanaho si kaiya. ¹⁷ Tutaina Yeisu i nonoya si gwaeya koinega i gwaeya, taudi bwebweyadi i geya nuwanuwadi togilekwasa. Ma taudi tolekwasa nuwanuwadi togilekwasa. Taugu ya tauyama igeya tobwebweyana weyaidi, ma hesi togala weyaidi ya tauyama. ¹⁸ Ioni kana tomuliyaho ma palisiyaho si kekebotana, haina tomota si tauyama Yeisu koina ma si gwaeya tonai weyahina ioni kana tomuliyaho ma palisi kadi tomuliyaho si keke botana, ma kowa ka tomuliyaho i geya sida kebotana. ¹⁹ Yeisu koidiya i gwae limana. Sawesawena haikana toyokowaho si kebotana, kemi tohai lamoiyana kabwa baidadi simiyami igeya sawesawena weyahina tohai lamoiyana kabwa imiyami. ²⁰ Ma kana kasiyata yata i tauyama kemi to hai lamoiyana imiya hapwesa koidiyega kabwa sike botana. ²¹ Igeya sawesawena tomota kaigeda kaleko hauhauna ma kadekadelina baidana i saila hegogo, yata gidemusa sabu sinabwana i hapwesa. ²² Ma wete, igeya kana lobwene ma tomota kaigeda oine hauhauna i siwa oine kadekadelina koina, yata ikalasabu, ma hesi kana lobwene ma oine hauhauna tasiwa wadu hauhauna koina. ²³ Sabati koina Yeisu ma kana tomuliyaho tanoha gamwagamwanidiyega si tauya ma tonono witi kutuna si tuhudiya ma si kaidiya. ²⁴ Ma palisiyaho si gwaeya Yeisu koina, ''u kedune tonai weyaina tonono si guiguinuha gidemusa weyaina i geya keta wete loina i miami ma sabate koina ta gibeso. ²⁵ Yeisu i gwaeya koidiya, nuwana igeya wada saweya tonai Deibida i guhinuweya. Ma nuwanuwami bewa tuwa, weyaina i botana, tauna ma wete haina tomota baidanaho. ²⁶ To gide Yeisu ilugukesa yaubada ina hanuwa tabu koina, ma pwalawa ketoketo bodana i kahaliya ma i kaiya weyaina pwalawaina to taliyaho dimo kadi tagwala Ma sikai. Ma Yeisu pwalawa ina i kahaliya ma tomota nidi makiyanaho i kebwaediya. ²⁷ Yeisu i gwaeya, sabati Yaubada i laguya tomota weyaidi. ²⁸ Weyaina taugu tomota natuna, ma wete sabati kana Kinapwana.