¹ Maira' me ampen bei varura' everen orikan, mai vei eiyo varan iyampon kayo va' ano vakuren oremi'. ² Sinakoki Sabati yamu bantanasi Mono Baya siamin mai nanimanta ano iniren takha emi'. "Ma afova khayo intefake barenafino, semi'. Ma na'i khama inin na be'in amikhen nafino." Ma na'isa urena' enara'ukhein avu ava kasaen be ayampoke barian nafi. ³ "Ma i'da ma' uvaran banta Marian anin, Yemisi ma' Yosesi ma' Yudasi ma' inka Saimoni ma' ava'e fi. Inka i'da be aun kayo setima' banafi. Mai Yisasi ma varen aruven ein dana sinta ano vetisi ininta' i'da khama emi'. ⁴ Ma'an ikan Yisasi ma'asen betin tiamen mi', "Sakhanampa vanta mino' barufake'i ve'in amosian mifo overen be amapima vain danasinta va', be antuma' bei varuva' ano ida khamaen onene. ⁵ "I'da khanai'en akona yoran bararen in, ai' nanimbanta ana a'nonta ayan kauden amukuantan ai' kipemi'. ⁶ Ma'a iyaken mai nanimantai amino in danasan kakanta takharen barufimpa' eukian mono baya semi'. ⁷ Tiren maira bei tuerifi eyo iyampon kayo o aran kauden, takhanta' namu yana ma yo sianta'an karudan akona amiren, ⁸ inka' danka ana va' pakiyan, idava' dunan nafi, unan nafi, inka' idava' moni be amu'anan unan pin ba'ena' ⁹ arantan anamun kasaen ena' inka' i'dava' kankanan afuin iranovan temi' ¹⁰ "Inte namumpina' ese' umperantefo, maifin manava' bava' punta'e maifinke' me ampeno. ¹¹ Inte'a varuano' en ofen i'da inena' i'da aviranten nafi, mai varu me ampia va' arantan take me fupa' tirana' mai nanimanta va' mairasa' afova varano." ¹² Ma'a sikan iniren mai khayo orera en bantanasi fin mono baya siamian inka ume yana me ampen ara' beran baya siaken'. ¹³ Inka' ai' nanimanta amukuanta'den uveri fe'antan ese' ai' kipian inka' takhanta' ma au' peka'in dosianta'an karuden emi. ¹⁴ Yisasin avi' maman dakosi' ikan, Kin Erotin a'arenta' oremi'. Mana'a ano sen,"Non mamantan Yoni ma fuka'eimi everen mana'da orun mantakhan pasen be'impin i'da vain akona yorian mino." ¹⁵ Inka' mana'a khayo sian,"Be'i Iraisa ino," sikan inka' moeken kokhon mano sian,"Be'i sakhanampa vanta an mi dakhene." ¹⁶ Ma sikan Eroti ese mai vaya inian temi',"Mai ma se'i a'non ku'deruna Yonin everen orun mantakhen mino." ¹⁷ Paravara ma'asenai', pefa' Eroti ano (be ava'e Piripin ana') Erodiasin manta'ein umanta' tikan aruvin banta khayo ano Yonin pakaan karavusei' eimi', ¹⁸ Mai Yoni ano Erotin tiamiaken,"Eava'en ana' ma varan ida are ukhaya' kasae varia fono." ¹⁹ Mai ano Erodiasin aran e'avin Yonin arono van emifo i'da khanai' emi', ²⁰ paravarai' Erotimpin Yoninan perandana' ban pasemi; Eroti afova' ukhen Yoni ma vain punta'kein banta, Yambanta a'de' ban ben ta' kava ukhan mai vema siain baya amusin en inian manapake' i'da ara' kusin baren mi'. ²¹ Maira' Erotini khain damu' erikama yunan ta'den bei vompon doran banta khayo va', aruvin banta khayo ayafa va' inka Kareri' barui yafisin banta khayo va' aran ma e iyein mano mai ve'in arin aai' emi'. ²² Eroti ma' bei inupa' dunan nan arona khayo va' aufa' Erodiasin araun mano kama von den amusin amiran, mai Khin mano mai arinta siamiaken ten,"Inte yana sara' te vain inantintefo, sareanan e'in amentere." ²³ Ma'a siren everen akona en temi',"Inte yanasara' te vain inantinte fono, mama se'i yafikeru'na vara' au'ban daimino tintefo, mairake' ma aravukhein danasinta faran amente' uno." ²⁴ Ma'a siaimpin mai arinta ano everen be ano'en mo siamen, Na'i yana sa' inantenuno." sikan be ano'e siyan,"Non mamantan Yonin a'non neva' teno." ²⁵ Ma siaima' evere'nen ainen Kin bainta' oren mo sian,"Tare ana e'i yayokifin Non manantan Yonin a'non ku'duan timeno." ²⁶ Siaima' Kin aupin arun eren mifo mai i'da khanai'en be avayama vei arona khayo va' mino avora' ba' ma sikha'ein durafuriri' in pasen, ²⁷ Kin mano veyanta' ma yafisin aruvin banta Yonin a'non ku'en me aminovan tiantan orein karavuse finke a'non o khu'emi. ²⁸ Mai a'non ku'duan dokifin kauden baren mai arinta me amikan do varen be ano'en mo amemi'. ²⁹ Mai vei eyo varan iyampon kayo ano inen beni au e aman mo masien mi'. ³⁰ Yisasini eyo varan iyampon kayo overen be vain eren beti' ma varen aruven ein baya me siamen mi'. ³¹ Maira' be'i vetin tiamiaken,"Sireti ma'a ana eresi' bantama ivan akhempa' tana' ara' oman tivika' ifano," semi'. Mai faravarai', kokhon mano fa e onen oren iyan i'da aviken ma yunan nan afokhan amimi'. ³² Maira' beti ana mana votifin ka'osiven banta ivan akhempa' oremi'. ³³ Oriaima' kokhon mano onen mino' barufake' barara' tavaen mai ma orinain barura pe ovami i'nain beti oremi'. ³⁴ Mai nanin banta fe mai ankinafa' ba'in ma oniaken arun nan uantemi', paravarai' sipisipi khayo ma vetin ta' dafisin banta i'da vama yosein an dian pasemi'. Maira' moeken mono' baya siamen mi'. ³⁵ Siamiakan inupasi' ma iyaima' bei eyo iyampon kayo ano me siamiaken,"Mainka inupasi' iyan banta ivanta'i va' ife' umpo, ³⁶ ma nanin banta siantesina' ade' barufimpa' oreraen dunan miani' uren nano." ³⁷ Ma'a sikan Yisasi everen betin tiamen,"E'i va betin dunan amesin nano." Sikan mai khayo ano everen tiaken,"Mai khana' kan antareti siriva moni poke' bereti miani' uan me amekun nanten nafino." ³⁸ Sikan Yisasi vetin ina iyan,"Na'i ma'a vereti' denan ban nafi? Oria ona." Ma'a sikan o onen me siame,"Kan noya'ba dan manapa' bereti va' anan bane." ³⁹ Sikan maira' banasi daima'an kama khatara' iyuru' iyuru' en kumanemi'. Masiman uan kumanen mi'. ⁴⁰ Mai mana mana masiman pin, mana antareti ano khumanian inka' fiti ano khumanian uru' emi'. ⁴¹ Mikan noya' ba' dan manapa' bereti va' ka' inarufa' kakhaben amukuren maira' ki'a khi'a uan bei eyo iyampon kayo ra' kain mai nanin banta fin masiman ikan, ⁴² Mino' ano khanai' en nen mi'. ⁴³ Niaken ma antan bereti va' noyana va' ma oeke eeke ikan tuerifi samako viken mi'. ⁴⁴ Dan manapa' tauseni vanta khayo ano mai vereti nen mi'. ⁴⁵ Naren ma, mai nanin banta ma siantan oriakan mana manin bei eyo iyampon kayo nare siantan ena ufa', Betsaida oremi'. ⁴⁶ Mai khayo ma orera uvin, anufin amukinta' o'emi'. ⁴⁷ Beyaka' barara' pavan, un non auban bare vare mai voti ovakan inupasi'emi'. ⁴⁸ Mai inupake' onakan maen kakan tisiva ano mai voti mo avekan mifin ma vain kayo tasu sasu iyan mi ve'i kami kami a'aufa' non daro' daru' daru' en oremi' betin esante, oronovan. ⁴⁹ Mai khayo onakan ma ve'i non daro' ma yaru' daru' en erikan mai khayo ma inein ban mino siren ovaren mi'. ⁵⁰ Paravarai' mai vema oniaken kakan perari' iyakan onian Yisasi vetin tiamen,"Akonae manta! Se'i umpo iva' perano!" Sen be'i mai khayo siamen. ⁵¹ Ma'a siama mai khayo va' botifin un kumania ima',mai sisiva mo khipemi'. Mai yana' ma mai khayo oniaken moeken takhen mi'. ⁵² Paravarai' beti' au' akona ukhan i'da khanai'en maima beretira' ma ani'ein oman ta'pe' tikhan pasemi'. ⁵³ Maira' ena ankinafa' Yenasareti' barafin oren mo voti khau'den, ⁵⁴ ka'usen ma varara' eriyaima', bantanasi ano ese' Yisasin oniyaken, ⁵⁵ tavaen mai varufimpa' oreraen ai' nanimanta yuvasi' ba' dayo' uaren be'ima vainta' eremi'. ⁵⁶ Mai vema orein barufimpa, bantanasi ano ai' nanimanta avi'an ataruin barura' kau'den maen bei ona aton aruvinovan ina iyami' mai vema aruvein kayo ai' kipaantemi'.