¹ Yerusaremi'ke' ma erein Farasisi khayo va mam baya afovai' ukhein kayo ve'in a'de' iyen mi'. ² Mai Farisisi khayo ona kan Yisasini eyo iyampon kayo ayan i'da sese'in paima' bereti pakaren nakan ³ (Farasisi khayo va' Yiu nanin banta va' ayan naren anaren mi yunana ne'iyan mino, paravarai' betisi anafu ara'ompima ba'ein avu'ava pa fakakhen pasen. ⁴ Farisisi khayo ma makheti fimpake' ma overen mapin eren maen non naren me feden mi i'naimpa' dunan ne' iyan mi', inka beti mana'a kokhona' peyan avu'ava pa fakakhen pasemi'. Ma'an en kapi ma sese' inafi, kura fi, kopa khave va, dunan ma khauden nan dana sinta va') ⁵ Yisasin mai Farisisi khayo va' mambaya afova'ukhein banta khayo va' ano inaemi',"Paravara' ei eyo iyampon kayo i'da feyan avu'ava' bakurian na' ayan i sese'in bereti nian nafino?" ⁶ Yisasi ma'asen betin tiamen mi',"Tireti khampun kayo vami, Aisaia ano sakhanampai' ua'an baremi', 'Ma nanimanta ano ora' anan te'in timosian mifo vetin au' nenta' bami. ⁷ Mai i'da veni nena van mono'i veti siyaken inka' banta ano sia'an arevaya maman bei'na an daren dakhafian mi'. ⁸ E'i Ayarafenuni Arevaya me ampire ma vararake vantai feyan inin dakhafiao'. ⁹ Inka' ena vaya va' betin tiamen mi',"Inte' uake' Ayarafenuni Are vaya mo ifa' ureya' kasae siretisi feyan avu'ava dakhafintefo?" ¹⁰ Maivami Mosesi siaken, 'Tireti' ano'e afo'en ara'naosa' bano, inte'a nanin banta ano' be ano'e afo'en namu vaya se' asintefo mai furinono.' ¹¹ Sikhen mifo e'i inte'a vanta ano eano'e afo'e nan tiya', "Inte aya' tempinke varan tefo mai 'Kobani' ino." (Mai 'Ayarafenun Amenen' tiyami'). ¹² Ma'an ukha faseyai ida a'e nan be ano'e afo'eni yoran bare' iyan mino. ¹³ Sireti ma feyan avu'ava' pa fakare vama vare aruve iyaona' ano Ayarafenuni akona Arevaya mo anai'iyan mino. Inka kokhon dana' asuse iya ono." ¹⁴ Maira' be'i everen kokhon nanin banta aran kau'den ma'asen tiyame,"Ineno, mino' ano sen tivaya va' dai'de ineno. ¹⁵ Inte yana sinta maman ara'pin kaintefo, mai yana ano i'da khanaien banta maman paini' intemifo, inte yanasa' orum beren ara'pinke e'iyan nafi, mai yana' anon banta faini'e'iyane. ¹⁶ A'intina ataren ma vanain nanin banta ano va' inino." ¹⁷ Tiren Yisasi mai nanin banta me ampen ma'naun pin o'ivikan, bei eyo iyampon kayo ano, mai ma sian baeran baya ma sein nan ina ikan, ¹⁸ Yisasi sen,"Sireti' ba' pa amino ukhe fono? Banta ara'pima mama'an araviyain dana' ano ida mai vanta faini'e'iyane vaya i'da ontefo, ¹⁹ mai ma na'an araviain danasinta i'da khanai'en au'pin o feranten mifo, ara'pimi aravuaren arafa' oriten mi'." Mai vaya ra' mantaven mino' dunan maman kama yunani emi'. ²⁰ Ma'a uren ten,"Inte yanasa' orum beren ara'pinke' e'iyanafi, mai anon banta maman paini' iyan mi'. ²¹ Banta au'pinke'i vanta aruan purin avu'ava', umoyan avu'ava', pamuku avu'ava' safi, namu inin nafi, ²² ena ana' ena avafun ma famuku' en non avu'ava, ena ina yana' ma aran nan, baya i'da inin dana', ena makasin dana, inin arin dana, oyampa' baya sin dana', ena makasin avu'ava', beyan maman dani'in avu'ava' ba kampun tin dana' ba' eriyan mi'. ²³ Mino' namu yana' ma eriyain mai au'pinke'i eriyan pasen mai yana' kayo anon banta maman paini' iyan mi'. ²⁴ Mairake' e manten Taia' ba' Sidoni' ba' barafin orein mana namum pin, i'da vantanasi ano onano siren ovan mifo i'da khanai' en au'maniri'emi'. ²⁵ Maira' mana namu yana' au'pekein arinta ano'e ano ese' Yisasi evane vaya ma inian, eren be'in arantam pin e ankame mi'. ²⁶ Mai nanin mai Kiriki' varafin Fonesia' anan pinke'i'. Be araun au'pinke namu aunan do sianta'an karu'dano siren me inaikan, ²⁷ Be'i everen mai nanin tiamiaken,"A'esina iyampon kayo va' ese' dunana' nano. Mai iyampon kayoi vereti ma yo maman iyan amin i'da khama ukhen mino." ²⁸ Ma'a sikan mai nanin mano everen tiamen,"Kakanoe, fura siaono, iyampon mano ma sakhoka' kumamen nia kama ayam pinke' ma antan kakhufen eraveimi iyan mano ai'den ne'iya mino." ²⁹ Ma'asikan Yisasi mai nanin tiamen,"Ema ma'aseona vami siante' umpo khasaeva' orono. Mai namu aunan ma earaun au' peka'ein pe me ampen mino." ³⁰ Ma sikan everen be ama' be araun o onakan mai yana' ano me ampen orivin baran pin bakhami'. ³¹ Maira' Taia barafinke' everen Saidoni' oriaren, Kariri' Un non pa' ono'ben, Dekaporisi' barafin o'en mi'. ³² Mana a' kontan i'da vaya siain banta maira' kayo ano avi'an meren, ayan a'nonta' kau'den amu' kaantanovan inaemi'. ³³ Mai nanimanta aurake aviren mai vanta akhempa' mo khau'den ayafo' atarempin iyuanta'en, akhare siren, i'naimpa' amafin aruviaken, ³⁴ inarufa tana'ara' mun onian aun mamaren,"Efata!" sen tiamen mi',mai,"Divono!" temi'. ³⁵ Ese' ana ataren divikan, amafin puntaran kasaen punta'den baya semi'. ³⁶ Yisasi mai nanimanta van i'da va' ena siameno sen akonaen ma sikan, mai moeken mai vaya sen mi'. ³⁷ Mai nanimanta ano moeken takha iyaken temi',"Mino' dana' be'i khamaen baren aruven iyan mino. Kasaen ataren ma khonta' ein mano iniyakan inka' baya ma i'da sia'eimano sia mino."