¹ Avo uantan Oma', I'da Yisi khain Bereti ma nan inka khan damu' ana ukhan. Mono' doran banta khayoi a'non banta va' mambaya afova' ukhein keka' ba' ano iyuven Yisasin ma faken arin nain bayai' emi'. ² Mai khayo siyaken, "I'dava' oma' au'bana' be'in paka, mai i'dava a'esin banasi ara' arino." ³ Maira' betani' arantan ayan pamin ai' bain banta Saimonin amapin takhoka'ma khumanten ba'in, mana nanin mano khakan moni'ka' bain Natie sin parava'po uvaran, aunka uveri Arabasta anan pin baren e'ein mano mun duvaren Be'in a'nonpim banaemi'. ⁴ Banaikan mana'a khayo ano aranan uren beraran kakan baya sen, "Inte ana rasa' ma yana' pa'savifa' me inkaman afe iyan nafino? ⁵ Ma aunka uveri ma khanu'manau' dankara' sari' uren, mai moni' ona ivan kayo ma ameren mino." Ma'a sen mai nanin asen mi'. ⁶ Ma'asen asiya ima' Yisasi sen, "Kama yana'i senta' baren aruven ukhen mifo, Maira' ampeno. Fara' uman amiya' bafo? ⁷ Ona ivan kayo ena ena ema'i vanti khama avu'ava' ani' inompo, se'in ida sireti'ba' ayaka' bante'u'. ⁸ Bema khanai' en bararen afake'i sen tuu ma varafin masi'inain mi avu iyan mino. ⁹ Ma funta'e'i siya'u', Ma vara amupa' anafa' intefasa' mono' baya sintenafi, mai ma nanin mano ma varen aruven ein avu'ava' ba deren tiren inintemi'." ¹⁰ Mai tuerifi eyo iyampon kayo finke, Yudas Iskareti, mono' dorani a'non banta khayo vaipa' oremi',Yisasin avian betin amenovan. ¹¹ Mai mono' dorani a'non banta khayo khakan amusin iyaken maira' avi'ama amirantin moni' amenovan temi'. Ma'asiran mairake' arai'en bema avi'an amin aa van dosemi'. ¹² Maira' i'da yisi kain bereti nan, ese' damusi'ma i'kan, Avo uantan damu'kake sipisipi ma aruren ikun uan amiyakan, bei eyo iyampon kayo ano inaemi', "Teno, intefasa' mo setiyan utaresa', Avo unatan dunan na' ifanu?" ¹³ Sikan bei eyo iyampon kayo finke khankanan tiantemi', "Ma varufin orono, oriya onesin maen mana vanta khavefin non da'aren orintemi'. Mai vanta va avakure oro. ¹⁴ Inte namumpina' be'i um perantenafi, maifin o'iveva' ma' afo'en mum ma'aseva inao, 'Aru' ano sian, "Intesi' tesi afokhan e-ama'pin baina' tesi eyo iyampon kayo va' tetiyan Avo uantan dunan me nanuno." ¹⁵ Ma'an ma sesin be'i ve ama'pin dante mana kharafaran pe funta'an dan bain ani' intemi'. Maifina' tetisina utao." ¹⁶ Ma'asin iniren mai eyo varan banta kan barufin oremi'. Oriakan mai ma sikha'ein tikha'ein ikan onen mo mai namumpin Avo uantan dunan utaemi'. ¹⁷ Inupasi'ma ikan bei tuerifi eyo iyampon kayo va' eremi'. ¹⁸ Erein mai namumpin takhoka' kumanen eukukhema yunan nia kan Yisasi semi, "Ma fura vayan tiretin tiyamiya'u', Mama yunan tema' niaona khayo finke' mana ano se'in tivi'an namuro ayampin kainono." ¹⁹ Ma'ama sikan mino' ano ve'inan arunan iyaken, mana mana ano ve'in tiyame, "Purase' i'da se'i ma'an onte'uno." siru' emi'. ²⁰ Ma'asikan Yisasi everen betin tiyamen ma'asen, "Mama tuerifi eyo iyampon kayo ma vaona finke' mana anon mai avu'ava' inono, mama sare'a senama' mana yokifin bereti yaren niaimanoi'. ²¹ Banta Anin nama fe siya'an ba'eimi afoka' inte mifo, inte'a vanta ano Banta Anin avi'an namuro amintenafi, mai vanta vami sirunan ese. I'da ma ve'in ma varara' kaintin afoka'oremi'." ²² Tirama yunan nampinke' Yisasi vereti ma'den amu'kuren, ki'akhi'a uan betin amiren temi', "Ma se'in tuu ifo ma'e nano." ²³ Mai oyampake kapi orun pakaren, tusu siren, betin amikan maifinke niya kan, ²⁴ ma'asen tiyame, "Ma senti mumun in narema, mino' nanimanta vama vanaein mi'. ²⁵ Purase' i'da ma uvaini ya aran anu sireti'ba' nan ba'i, savosi' uvinti' mana' damu' Ayarafenuni inaruvarufimi nante'u'." ²⁶ Ma'a sirakama maira' i'daan kipian, mai khayo Orivsi' Anuyompa' oremi'. ²⁷ Maira' Yisasi vetin tiamiaken, "'Sipisipira' ma yafisin banta arureken maen sipisipi asuse intene,' siren pefa'i uvama'an bain pase mino' ano kharan orinono. ²⁸ Tema fu'ka' orumantare, te naren Kariri' ovantere." ²⁹ Sikan Pita siyaken, "Mireini en mino' ano kharan orera iyanti' te i'da orontere." ³⁰ Sikan Yisasi everen be'in tiamen, "Ma funta'e'i e'in tiamiyau', Tare ma inuran kanu'manau' dada te'inan i'da afova' ukhere siasimi khan dada' kokore asintemi'." ³¹ Ma'a sikan Pita sian, "I'da se'i e'in makasente', emasa' te'i o furono." sikan mino ano manai' baya ana sen orera emi'. ³² Maira'ke' Ketsemanise ma siyain barura' eriven maira' bei eyo iyampon kayo siamen, "Mara' kumantesisa' te'i simu'kono." ³³ Arai'en au'pin umanden inin amako' iyakan, Pita, Yemisi, Yoni siren aviremi'. ³⁴ Avi'an mo khau'den ma'asen tiyamen, "Mara' ba yafiseno, umamano furonunai' en tu'pin i'da khama iya' umpo." ³⁵ Tirema Yisasi vetin me ampen ma sana'a orian akhakhen barara' orun ankamen, kanai' ma ukhantin mai uman do maman tanovan amuken. ³⁶ Ma'asemi', "Tifo'e oe, mino' dana' e'impin asamana e'iyan mino. Ei anunura' ma khapi yo mantintano." ³⁷ Mai oyampa'ke' e onakan mai khanu' manau' aun bakha'in, Pitan me avoriyaken ten, "Saimoni, aumbare vae? I'da' tana a'aura' dafike' onante fono? ³⁸ Dafike amukia va' ban anoni akhenokain danasinta akhakhano, inin mano mantakhen baranovan iyamifo, au ano avesara iyane." ³⁹ Everen mo amukian ese' ma sein baya khayo ana everen tiayan amukemi'. ⁴⁰ Overema e onakan, aunan aiyin pasen baren orera ukhan orun mantaren baya van dosemi'. ⁴¹ Overen tipa' kanu'manau' da'dasi'en e oniyaken tiyame, "Aumbakhe ya' avikiya vafo? Inkae! A'aui' ene, mantave onano! Mainka Vanta Anin avi'an ume khayo amene. ⁴² Inka se'ima sivi'an namuro ayam pin amin banta a'de' eriyan mifo orun mantave oniyake eri' orono." ⁴³ Mai vaya siakan avenampake' Yudasi, mai tuerifi eyo iyampon kayo finke mana ano, mono doran a'non banta khayo, mambaya afova'ukhein banta khayo va' mono' ayafa khayo va' ano ma Yisasin pakanovama siantein kayo avi'aren, dambanka, bainati va' mamaren eren mi'. ⁴⁴ mai khayo ma ani' inaipake siamen mi', "Inte'a anon na' o fakare' amo'nanterafu, mai va' pakareva' akona yafisiri' ure va' avire orono." ⁴⁵ Maira' Yisasi vainta' ma Yudasi eno'ben, "Arusoe," sian mo amo'ma niyaima' ⁴⁶ onen ese be'in paken mi'. ⁴⁷ Pakiyaima' mana ano a'de baren ese bainati orun mamaren mono a'non banta i yoran iyampon a'taren do sikan karudan eraviyaima'. ⁴⁸ Yisasi mai khayo siyamiaken, "Sireti se'ina' umoyan banta ma fakanovan eini'eya', dambankan, bainati utaare' erefono? ⁴⁹ Sema mino' damu ema mono' namumpin mono baya siyaku i'da fakan bare ompo sare ma variyao'na avu'ava' ano a'esina' pe ma sia'an ba'ein bayava' purai'ino." semi'. ⁵⁰ Maira' ma vema' ba'ein kayo ven me ampiren karan oreraikan'. ⁵¹ Maifin mana fumara ano yavara'e ana ya'den Yisasin bakuren no'ikan, mai vanta khayo ano ma ve'in e fakiyaima' ⁵² mai yavara'e me yavama'en avapa kharan oremi'. ⁵³ Mai khayo ano Yisasin do faken mono a'nonta' bain banta vain orikan, maifin mono ka' ma yafikein kayo va, aufen karentein banta khayo va, mambaya afova' ukhein banta khayo va' bami'. ⁵⁴ Maifin Pita ma' dakhafen nomifo, mana'a nenta' mai mono a'non bantai khotin namun ankinafake' en noren. Aruvin banta khayo va' manafin e khumamen ira khanemi'. ⁵⁵ Maira' mono dafisin banta khayo va' mai Yiu yafisin kayo va' ano Yisasin ma anai' uren aruan purinain baya van dosen mifo i'da khanai' en mana yosemi'. ⁵⁶ Kokhon mano khampum baya ven amanina' uvaremifo mai yere i'da khanai'emi'. ⁵⁷ Mana'a ano orumantave kampun baya ven aufinke' iyan ma'asemi', ⁵⁸ "Seti inekun be'i siyan, 'Te'i mama ayampo' uvaran mono namun do varakuan karu'dare' mae' kanu manau' damu' pimana ena i'da ayampo' uvaran namun uvarante'uno.' semino." ⁵⁹ Mai vaya yere i'da khanai' emi'. ⁶⁰ Mono' a'non banta ano mai au'banake' orun mantaven Yisasin inaemi', I'da e'impin mana'a vaya van nafino? Inte' ma ukheo'na vara' ma khayo e'in oyampa' baya sian nafino?" ⁶¹ Ma'asen inaikan mifo ida' ve'i mana vaya sikan inka' everen inaiyaken temi', "E'i Khraisi, maima Avu ukhein Anin na fono?" ⁶² Ma'asikan Yisasi sen, "Mai se'i uno; mana' damu' onesin Banta Anin ma ve afo'eni ayan karu'dapa' bei akona va' kumamintin inaru khonan mano aviren erinten mino." ⁶³ Mai mono' a'non banta ano mai prisi ona ma ukha'ein dakiyaken ten, "Ena na'i yana sarafono? ⁶⁴ Mino anon iniyanami Ayarafenun aufen baya siyamino. Maira na'ie' tintefono?" Mino' ano ve'in aruan purino ana semi'. ⁶⁵ Mana'a khayo ano arai'en be'in aufen akhare siyan inka' aura' iyaden anka'en inaiyan, "Sakhanampai' ono!" sian, mai aruvin banta khayo ano ankame mi'. ⁶⁶ Ankamiyakan barapa' ko'barura' Pita va'ikan, mana mono' a'non bantai yoran arinta ano ve vainta' eremi'. ⁶⁷ Ira ankinafa' mantakhen kaniyan ba'ikan mai arinta ano a'de eriven me aufen pure fure en o'den, "E'ima' derei Nasareti vanta, Yisasin ma' nore ono." sikan. ⁶⁸ Beyan maman aupasi' iyan, "I'da onte', i'da afova' ukheruna vayai e'i siya ono." siaken mai kho' namun akhempake' eunen ko' barura' oremi'. ⁶⁹ Orikan mai arinta ano everen onen maira'ma mantakha'ein kayo siyamemi, "Ma vanta yere mai vei kheka'i vamino!" ⁷⁰ sikan everen i'da afova' ukhere semi'. Inka' tana'ara ban maira' ma mantakhein kayo ano Pitan tiyamiyan, "Purase e'i Khariri' banta vakeya, veu'pinke mana ono." ⁷¹ Ma'asikan maman tipa' akonaen umeriyan, "I'da afova' ukheru'na vanta vami siya ono." ⁷² Siyaima' ese' ana khan da'dasi' en kokore asemi'. Asikan Pitani inin diviyai ma' ovaren Yisasi ma ve'in tiyamika'ein baya khayo inen mi': "Kanu' manau' da'da' ma sen i'da afova' ukhere ma siresimi, kokore khan da'da' asinten mino," ma sikhaein baya iniyan barara' aravuven ifi'demi'.