¹ Yisasi ma mono' namun me ampiren maen bei mana eyo iyampon mano ve'in tiamemi', Aru soe, kama ona'mana' koya va' kama namun kayo va' onano. ² Ma'a sikan be'in tiamemi', Mama kakan namun kayo ma vain oniya fono. I'nain pake' mana ona'mana' ida ma'anten benta' benta' tupa' ukhen banten mino. Mino; un kauren eravinten mino. ³ Yisasi ma mono' namuni ena ufa' Orivi' anura' kumantare' ikan Pita Yemisi Yoni Anduru siren be'in aupake' inaemi'. ⁴ Tetin tisimeno, maima seona yana' inte yamusa' afoka' inten nafino. Mai yana' ma afoka' main mai inte'a ani' dana' ano' ani' iyan mai inka afoka' intene siyan tisa' afova' o'tifante rafuno. ⁵ Ma'asen inaikan Yisasi arai'en betin tiamemi', Mana'a ano aviren tavifa' orin nafo va' dafiseno. ⁶ Kokhona' ano se'in tivika' eriven tiyaken, Te'i ve'in ba' uno siren kokhona' aviren tavifa' orinten mino. ⁷ Tireti' ankan ma aruviyain baya khayo ma iniyake inka' kakan aruvin ban mino sema uva vaya khayo iniyake ida va' kokhon ineine ono. Mai yanasinta kasaen aoka' inten mifo ma vara ida akhen ukhen mino. ⁸ Para vara seyo mana varafin ma vain nanin banta ano ena varafin ma vain nanin banta va' mo aruvintin inka' mana yafisimpin ma vain keka' ano ena yafisimpin ma vain kekaba' mo aruvinten mino. Kokhona' baru khayofin bara khaya iyantin kakan arafan afoka' inten mi'. Mai yanasinta ano amu'ba nanin mano ma iyampon kaono van ai' doseini'i inten mino. ⁹ Eyana' dafi'an akona ono. Beti' ankan mano e'in pakaan kanisori khayo mo amintin banasi ataru uvinaimpin ankaminten mino. Te'in naro siren avi'an kakan banta khayo va' kin kayo kaudanti senti vaya sian ama' inono. ¹⁰ Ma'an tukhen mifo a'intin na' mono' baya siadantin mino' barafa' orera uvintin na' mai yanasinta afoka' ino. ¹¹ Tiretin ma fakaren aviren moranti sireti ma sinona vaya khayo van ida va' kokhon ine ine ono. Para vara seyo mai auvara' anan mai ma sinona vaya ineine fin aminten mino. E'i ano va vaya sinono. Kanta' Aunan manon tinten mino. ¹² Arintin purino van be afa' ava'e ano ve afa' ava'en amintin inka' be afo'e ano ve anin avi'an amintin inten mino. Inka iyampon mano ve ano'e afo'en arintin purino van duvun inten mino. ¹³ Ten tivi' ma saran nona van mino' ano khakhirun arinten mino. Ma'an tiyantin ma iye ano' akonaen mantakhare' inten nafi mai ano fara vanten mino. ¹⁴ Onesin uman maman afoka'in namu yana' ano ma ida mantaren barura' mantakhanti (a'in dankafin banta ano va' beni ana afova'i) maima Yudia' bare' inain keka' ano anu yon pimpasa' karan orera ino. ¹⁵ Ma' amonta' ma un ba'in nain keka ano ida va' mapin un peran novan iniyan inka' ma'naun pinke mana'a yana' un baran novan ino. ¹⁶ Inka' dunan anafa' ma o va'in nain mano ida va' evara'nen dante afuin o varan novan ino. ¹⁷ Ma'an tinten mifo ma'an damu' kayo ma afoka' inaimpin amuba' nain kayo va' arara' iyampon ma nan kuvin nain nanin kayo va sami sirunan uantiya' uno. ¹⁸ Iyon uaren ma yokhe'do inain damu' mai yanasinta ida afoka inovan muno sire va' amukono. ¹⁹ Maima Ayarafenu ano ma vara uvanta'ein take' ma eriya'ein ma'an uman kayo ida afoka ukhan mino. Ida afoka' ukhan mi mai damu' afoka uaren i'naimpake' ida uron mi evara'nen afoka' inten mino. ²⁰ Ayarafenu ano ma ma'an damu' kayo ida maman asikai' intin kokhon nanin banta ano o aiyoranten mino. Ma'an tinten mifo maima fara van oriyan ban aunan baran novan Ayarafenu ano ani' uran bain nanin banta vami iniyan ma'an damu' kayo maman asikai' inten mino. ²¹ Ma'an tiyantin mana'a kheka' ano siyaken, Onano, masi Karaisi van mino' tinten nafi a'a mesanti van mifo onano' tinten nafi ida va' mumunan ono. ²² Mai fara vara seyo fara van oriyan ban aunan barano van Ayarafenu ano ani' uran bain keka'i mai khanai' ma ukhantin kampun Karaisi khayo va' kampun sakhanampa khayo va' ano afoka' uven ani' dana' kayo va' enara' ukhein dana' kayo va' uvaren dararen iyaken aviranten mino. ²³ Pe o utu'be' mai yanasinta khayo vami siamiya' uno. ²⁴ Ma'an tukhen mifo mai uman kayo ma afoka' uvintin a'au ano mo sitipa intin biyon mano ida fanu sinten mino. ²⁵ Ofu khayo ano ayompinte' un kararen eraviyantin inka' inaru ayompin ma vain akona khayo ano antu antu inten mino. ²⁶ Ma'an tuvintin Banta Anin mano vei khakan akona va' kakhan ma' ba' eriyantin beti' ankan onanten mino. ²⁷ Oniyantin bei enisori khayo siantantin ma varai khami' kami' akhen mano ma inarura' mo khanai' ukheinta' oriven para van aunan baran novan ani' uran bain keka' o avi'an manafin ataru inten mino. ²⁸ Fiki yaa anafinke va' afova' varano. Arai'en auyen ana ma ayanta' kain orera iya mae mai inka a' kanten mino seya afova' e'iya ono. ²⁹ Ma'an manan emi maima afoka' inain danasinta khayo ano ani' inti oniyake mae mai inka Yisasi erikhen onara' ban mino seya afova' inono. ³⁰ Ma fura vayan tiretin tiamiya' uno. Mama vaona nanin banta fa vasin mi mai yanasinta afoka' inten mino. ³¹ Inaru va' bara va' kipanten mifo senti vaya khayo ida uron mi khipanten mino. ³² Ma'an tukhantin maen Yisasi ma erin nain damu safi a'a mai a'au fi ida mana ano fi inka' inarufa' ma vain enisori khayo va' be Anin ma' ano fi ida afova'in maen be afo'e anan afova' ukhen mino. ³³ Maima afoka' inain damu' e'i ida afova' ukha ompo yafi'an na' akona ono. ³⁴ Mana vanta ano ma aya' aipa' oriyan ma ve amaka' dafisin novan bei yoran banta khekaka' me yafi'antein an mi yakhemi'. Mana mana yoran me yaiman amidu' iyaken maima onara' dafisin banta van au sape' tikhe va' bano sen akonaen tiamen mino. ³⁵ Ma'an tukhein nara' dafi'an akona ono. Para vara seyo ma' afo'e ma avara'nen barufa' erinain damu' ida mana ano afova' ukha ono. Ma'anten inupake safi inuran au'bana safi kukaro safi a'a akura safi mai erinten mino. ³⁶ Be'i ma uimpin erinten maen ida va' aun bakhe vare' esin e onano. ³⁷ Inte yanasa' tiretin tiamiya' dafiseno siya rafu mai mino sami siya' uno.