¹ Yisu ginia wat kurinai gisunani, ''Nizun bingan zi ginia wat agam, agam hiruk gam gamunti gani, wi ma gisangk i yamamp ayang ka yararab parat mimungk Anutu gan yaba wat bumur. ² Gingan huguan 6 anai, Yisu gikua Pita ingka Jems ingka Jon kurinai rungan wat gihan ngaring hahuan basinta. Gubuak kurinai mpai ayang, Yisu rining gan gisup in gikas rugan mangan i kuri gan maran gan. ³ Bumpungk gan gibaruru gihan sap mimungk in rugan mangan abingk garam kitamp ani gan ma gisangk yakakuk i wah kakuk bumpungk iayah gamuk. ⁴ Gingan Ilaija wat Moses gikas pisit i bi abingk kurinai mpai aiyah in hirukangkua ginia hup wat Yisu. ⁵ Pita ginia wat Yisu gisuni, ''Kidungwaga, nani mimungk i agi mpai ani, in agai yagab tagur hirukangkua basinta i nani. Agua gam basinta, Moses gan basinta ingka Ilaija gan basinta.'' ⁶ (I rungan ma gararab wah aus rungan niahup igin anai gamuk, i aus kurinai gitatarat.) ⁷ Gabagah sap basinta giba ingka gahumpun kurinai sib. Ingka kuan basinta gikas giba i gabagah in ginia, ''Nani ganai gariak izi gangk abingk zi nuguangk gangk igin. Wayangua hup i gan.'' ⁸ gahigut aru tak, i kurinai ru rarab mbib ayang kurinai ma gararab kuri mangan mpai bi kurinai ka kurinai gararab Yisu basinta tak. ⁹ Gubuak kurinai ruk ngaring ba gayang, Yisu ginia bumur wat kurinai in ginia, wangkiti nia wat garam mangan i wah aus agam rarab ayang ani, yasangk Anutu gariak gan takirun zua i garam ru mamp sib parat gan. ¹⁰ Gisunai in kurinai gahumpun hup anai wasak i rungan tak. Ka kurinai ginia hup wasak i rungan tak, aus nanai hugun nizun hup arunani gan, ''mamp in takirun zua.'' ¹¹ Kurinai gikantui Yisu, aus hugun nizun in garam hahar hup bumur gan ginia gisu Ilaija yanungk yaba gayang? ¹² Yisu ginia wat kurinai gisuni, ''Ilaija yanungk yaba gayang i yampuru wah santan in yakab zua i bi abingk kurinai mpai aiyah gan. Ka aus hugun nizun kuri gahahar gisu Garam Gariak gan yabariang barabin santan ingka kuri yagab i rungan yasu garam basinta mami ku bingan igin? ¹³ Ka zi ginia wat agam gisuni, Ilaija ru giba ingka kuri gigab wah aus kurinai su nuguan igin i nanai gisu i hup Anutu gan nia igin.'' ¹⁴ I kurinai ba i kuri gan, kurinai gararab garamsagat marikum mpururun in mpaii bi kurinai ingka garam hahar hup bumur kurinai ma sampan basinta gamuk in ginia hup marikum i kurinai. ¹⁵ Gahigut aru tak kurinai gararab Yisu, garamsagat sib gabuzurun hantab in gahigut giba gitur nanai in kurinai gamaiik igin. ¹⁶ Yisu gakantui garam gan, ''I aus agam ginia hup ragiab wat kuri gani?'' ¹⁷ Basinta wi mpai wasak i garamsagat gisuntai Yisu hup gan, ''Kidungwaga, zi gigab gariak marub izi gangk giba i agua. Nanai gigab garam ganun mais basinta abingk nanai kab anai buningk i niahup. ¹⁸ Nanai garutu nanai wat kurukuan in girim i giruk gihan ingka hint gimpai i rahin in gihus ka gagara nihuan ingka gikab rining gan surung in gisuzah sib. Zi gikantui agua kuri gam i yakuapias garam ganun mais anai yahan sibi gin, ka agua kuri gam ma gisangk i yakua pias gamuk.'' ¹⁹ Yisu gisuntai hup kurinai gan, ''Agam kuri garamsagat abingk agam mami ku bumur, gubuak hurahua ganai zi ru yampai bi agam? Gubuak hurahua ganai zi ru yagab sunanai i agam? Wakua nanai waba i zi.'' ²⁰ Kurinai gigab samuak anai giba i gin. Gubuak garam ganun mais rarab Yisu, gahigut rim samuak anai puruk i kitamp in hint gan gihus. ²¹ Yisu gikantui gin i ramangk gan, ''Gubuak hurahua nanai gigab gisunai?'' Ka ramangk gan ginia wat Yisu gisuni, ''Gubuak nanai ta kurinarun. ²² Gubuak sibangu nanai girim samuak anai gihan wasak i zah ma i mpui ingka gini yawaya nanai. Ini agua maram huar wah mangan abingk nanai anai gisangk i agua, warang i agai ingka wakab bangkian gam i agai.'' ²³ Yisu ginia wat nanai gisuni, ini nanai sangk i agua? Wah santan anai gisangk i garam wi bumur i nanai.'' ²⁴ Gahigut aru tak gariak anai ramangk gan girang raham in gina, ''Zi bumur! Wakab bangkian gam izi i nangku raham izi mami bumur!'' ²⁵ Gubuak Yisu rarab garamsagat santan han i kurinai, rungan ginia wat garam ganun mais anai wat sampan kukuap in ginia, ''Agua garam ganun mais zaguzu hup ingka ringan hiang, zi ginia hup kurukuan i agua, wakas waba sibi gin ingka wangkiti han katang i nanai zua.'' ²⁶ Nanai gagasub garat wat rang ayang bumur in gingkiti samuak anai wat tatarat raham in gikas. Samuak anai gisubi garam mamp ayang mangan, gisunai in garamsagat marikum ginia, ''Nanai ru gimamp.'' ²⁷ Ka Yisu gigab i bangkian gan in gisapi gin i giba wagungk ingka samuak anai gamunti guziab. ²⁸ Gubuak Yisu ba katang tagur, kuri gan gimpai gipak in gakatui gin, ''Gisu aus in agai ma gisangk i yakupias ganun mais anai yahan kas ayang?'' ²⁹ Rungan ginia wat kurinai, rugan sunanai anai yabuningk i kuapias, ka i yugayang nanai yagan bapap i kuapias in i han ayang.'' ³⁰ Kurinai gingkiti nanai ingka gihan haiin i parat Galili. Rungan ma gini garamsagat ma kuri narun mangan yararab kurinai han mpai aiyah gan amuk, ³¹ I aus rungan ginia hagahagan wat kuri gan. Rungan ginia wat kuri gan gisuni, ''Kuri yakab Garam Gariak gan yahan i garam bangkian ingka kurinai yazumir nanai yamamp ayang. Gubuak garam zumir nanai mamp ayang, yangan i huguan hirukangkua basinta, nanai yatakirun ba zua.'' ³² Ka kuri gan ma gikua simpim hup wayant hugun gan amuk ingka kuri gan giguan i kantui gin. ³³ Gingan kurinai giba gikas parat Kapenaum. Gingan rungan giba gini yakatang tagur, rungan gikantui kuri gan gisuni, ''Agam ginia hup i wah aus i nangku raham wasak kah?'' ³⁴ Ka kuri gan ma ginia hup amuk. I aus, gubuak kurinai ru banua i nangku raham, kurinai gabazamp wat rungan gisu wi ganai suraham wasak i kurinai. ³⁵ Yisu gimpai hub, rungan gakayak i 12-anai yahuangk bi gin ingka rungan yania wat kurinai, ''Ini garam mangan gini yampai nungkayang, nanai rungan nampai kirikian i marikum ka nasu samuak gab gum garam hiruk gan.'' ³⁶ Rungan gikua gariak narun basinta ingka gikab i kurinai wasak. Rungan gabariang i bangkian wasak gan in ginia wat kuri gan gisuni, ³⁷ Wi ru gikua gariak narun sunani i zi bingan gangk, nanai gikua zi wat wi saguar izi ba gayang. ³⁸ Yuanis ginia wat Yisu gisuni, ''Kidungwaga, agai gararab garam hiruk gikuapias ganun mais i agua bingan gam in agai ginting kurinai i aus kurinai ma garagia agi gamuk.'' ³⁹ Ka Yisu ginia, ''Wangkiti nting anai. Ma garam basinta wi yangan yagab gum raham i zi bingan gangk ingka yangan nanai yania hup mais i zi. ⁴⁰ Wi nanai ma su buman wat agi nanai kuri agi gangk anai. ⁴¹ Wi wayant gan i yakab mpui kumpiak wat agua yanum ayang, i aus agua ganai kuri kirisi gan, nizun bingan zi ginia wat agam, nanai yangan ma gisangk yangkiti gar gan amuk. ⁴² Wi ru gigab kurinarun ani gan basinta; wi ru bumur i zi i yapuruk i mais, nanai gihuh basinta gisu garam basinta guzu sakuak raham i garam mangan kuan gan in rimuab nanai han warangk i mpui nkiak. ⁴³ Ini agua bangkian gam kab agua puruk i mais, waraya in wakuapias. Nanai yangan mimungk ini agua han katang i Parat mimungk Anutu gan wat bangkiam basinta, bangkian hirukangkua kagab in agua kahan i zah parat mami zugub ayang gan. ^{44 45} Ini agua hagam basinta kab agua puruk i mais, waraya in wakuapias. Nanai yangan mimungk ini agua yahan katang i Parat mimungk Anutu gan wat hagan basinta, agua hagam hirukangkua kagab in kuri yarim agua yahan i parat zah. ^{46 47} Ini agua maran gam kab agua puruk i mais, watus pias in warimuab, nanai ru mimungk i agua han wasak i Parat mimungk Anutu gan wat maran basinta tak, kangan garam yarim agua i parat zah wat maran hirukangkua. ⁴⁸ I bi nanai kamak kitamp gan kurinai mami mamp ayang ingka zah mami mamp ayang. ⁴⁹ I aus zah yagan kuampuak kuangian gihuh basinta gisu kuri kab nkiak hahuan i ganang kiruak. ⁵⁰ Nkiak nanai mimungk, ka ini ganingan gan su miayah, yasu aus in yangan agai yakab i ganingan gan yaba mimungk zua? Agam wagab nkiak wasak i rungam, ingka sampan nuh ayang yampai bi agam ingka hiruk awah.''