¹ I huguan aru nanai, garamsagat santan gihuangk zua, ingka ganang kiruak miayah i kurinai yagan ayang. Yisu gakayak i kuri gan in ginia kurinai, ² ''Zi sampangk gangk girang i kuampuak kuangian ani, i aus kurinai gimpai bi zi gubuak hirukangkua basinta in kurinai ma gikua ganang kiruak mangan amuk. ³ Ini zi saguar kurinai han zua i tagur gan wat marimp, kurinai yangan maran yazazar in yapuruk nangku raham wasak. Hiruk anai giba parat tamanak.'' ⁴ Kuri gan gisuntai gin, yangan agai yakua ganang i abingka in yakab wat kuampuak kuangian ani i parat miayah sunani?'' ⁵ Yisu gikantui kurinai, ''Agam gigab ganang hurahua?'' Kurinai ginia wat Yisu, ''7-anai.'' ⁶ Yisu gikab hup wat kuampuak kuangian i yampai hub kitamp. Rungan gikua ganang 7-anai, in gikab kuamuas mimungk wat Anutu. Ingka rungan garumpu ganang in gikab wat kuri gan i yasangk ayang. Gisunai in kuri gan gisangk wat kuampuak kuangian i gigan. ⁷ Kuri gan gigab bipi kutik hiruk awah, ingka Yisu ginia kuamuas mimungk i Anutu in ginia wat kuri gan yasangk wat kuampuak kuangian yagan ayang. ⁸ Kuampuak kuangian gigan in gahusuab nizun. Ingka kurinai gikua ganang puk ayang haiin in gimpuak i gihuangk i 7-kambih. ⁹ kuampuak kuangian anai guzun gan gisu 4,000. Ingka Yisu gasaguar kurinai gihan. ¹⁰ Gahigut rungan katuab i gaipangkap basinta bi kuri gan in kurinai gihan distrik Dalmanuta. ¹¹ Gigan kuri pis muan Farisi giba gikas in ginia hup hupyasrun wat Yisu. Kurinai ginia wat i yagab marahahiang basinta i ganungkun ini yakirib ayang. ¹² Yisu gikua gasap bumur wasak i ganun gan in ginia, ''Gisu aus in garamsagat i gubuak arunani kurinai gakantui gin i marahahiang? Zi ginia nizun wat agam, marahahiang mangan ma yakas i garamsagat i gubuak aruni gamuk.'' ¹³ Gingan, rungan gingkiti kuampuak kuangian anai in gakatuab i gai pangkap, ingka rungan gihan mpui huak marahaiin. ¹⁴ Kuri gan maran gisim ganang yakua yasangk i kurinai. Ganang basinta tak gimin gai pangkap wasak. ¹⁵ Yisu gikab hup manangk wat kurinai gisuni, agam manangk wampai in wararab i rungam tak i yis Farisi gan ingka Herot.'' ¹⁶ Kuri gan ginia hup wasak i rungan gisuni, ''Rungan ginia hup anai, i aus, agi ganang miayah.'' ¹⁷ Yisu ru gararab sib hup aus kurinai nia gayang, ''I aus in agam ru ginia hup i ganang mami min ayang? Agam ma gikua wayant ma ma gararab amuk? Agam wayant gam ru gagu zu run? ¹⁸ Agua maram gimin, in agua ma gararab amuk? Agam ringam gimin, in agua ma gayangua gamuk? Agua ma maram gihuar gamuk? ¹⁹ I zi rumpu ganang hirukangkua hirukangkua basinta wasak i 5,000 garamsagat, agam gampuru ganang i kambih hurahua?'' In kurinai ginia wat, ''12 anai.'' ²⁰ ''Ka i zi rumpu ganang 7-anai i wasak i 4000 garamsagat, agam gampuru ganang i kambih hurahua?'' Kurinai ginia wat, ''7-anai'' ²¹ ''In agam ma gararab amuk?'' Rungan gakantui kurinai. ²² Kurinai giba betsaida. Garamsagat anai gikua garam mangan maran puk ayang giba in gaparingk Yisu i yagab ayang. ²³ Yisu gigab i bangkian gan garam maran puk ayang anai, in gikua nanai in hirukangkua gazagari parat anai in gihan. Gubuak Yisu hinti gahurun i maran ingka kab bangkian i maran, rungan gakantui nanai, ''Agua gisangk yararab wah hiruk?'' ²⁴ Nanai garantab wagungk, in ginia, ''Zi gisangk i yararab garam. Ka gararab gisubi gai banua gayang.'' ²⁵ Gingan gikab bangkian i nanai maran, ingka garam anai maran gan gitak, nanai maran gan mimungk, karuni nanai gisangk i yararab pisit paiyat. ²⁶ Yisu gasaguar anai gihan parat in ginia wat nanai, ''Agua wangkiti han wasak i parat raham.'' ²⁷ Yisu wat kuri gan gikas gihan parat marikum wasak i Sisaria Pilipai. Wasak i nangku raham, rungan gikantui kuri gan, ''Garamsagat ginia Zi wiayah?'' ²⁸ Kurinai gisuntai gin i hup gan in ginia, ''Hiruk ginia Jon mpururub gan. Ka hiruk ginia, 'Ilaija,' ingka hiruk ginia, Propet basinta gan.' ²⁹ Ingka rungan gikantui kuri gan, ''Ka agam rungam ginia, Zi wiayah?'' Ingka Pita gisuntai gin in ginia, ''Agua Kirisi.'' ³⁰ Yisu ginia hup bumur i kurinai ma gisangk yania wat mangamangan yasu rungan wiayah. ³¹ Yisu ginungk i kab hup hagahagan wat kuri gan sunani, Garam gariak gan yahan i barabin santan. Garam guzun, ingka guzun pris ingka garam wayant hup bumur gan yazumir ayang. Ingka i huguan hirukangkua basinta nanai yatakirun ba zua. ³² Rungan ginia hup pisit gisunai. Gingan Pita gikua Yisu gihan banging in ginia Yisu. ³³ In Yisu ginik in gararab kuri gan ingka gingan gini Pita ingka ginia, ''Garam mais, waba han zi kirikiangk! Agua ma wayant gam i Anutu gamuk, agua wayant i wah garamsagat gan tak.'' ³⁴ Gingan gakayak i kuri gan ka garamsagat, ingka ginia wat kurinai, ''Ini garam mangan nuguan i santamp izi, nanai maran nasim rungan, in nabariang gai mpariruan gan in naba nasantamp izi. ³⁵ Wi nuguan i gab raguan maratak gan, nanai yangan miayah, ingka wi zagari maratak gan i hup mimungk izi gangk ingka zi bingan gangk, nanai maratak gan yangan yamin mimungk. ³⁶ Kab bangkian rugan suaus yangan garam yakua gayang ini nanai kua wah santan kitamp ani gan, ka nanai rungan gihan mais in gitusrun? ³⁷ Wah suaus nanai yangan yakab i kua zua maratak gan? ³⁸ Garamsagat wi nanai rinimaik izi ingka rinimaik izi hup gangk i gubuak arunanai, abingk garamsagat gab nangkuraham mais ingka kab kirikian wat izi, Garam Gariak gan awah yangan rinimaik i kurinai, gubuak nanai ba i bingan raham Ramangk gan gan wat angira mimungk.''