¹ Garam Farisi giba gihuangk bi Yisu, wat garam wayant hahar hup bumur wi mpai Jerusalem in bagayang. ² Kurinai gararab Yisu garam gan ga ganang wat bangki biki, nanai gisuni, kurinai ma gakakuk bangkian in gigan ganang amuk. ³ (Garam Farisi ingka jews santan, kurinai ma gigan ganang kiruak gisangk kurinai kakuk bangkian gan in, kurinai gigab hup rumpun was gan wat garam raharaham i kuri rumpun was gan. ⁴ Gubuak Farisi ba zua i parat maket, kurinai ma gisangk yagan ganang yasangk kurinai kampui in. Ingka kurinai gigab nangku raham hiruk awah kurinai mami rapua gayang in kurinai garagia simpim, nangku raham rugan su kakuk kumpiak, gur, wah kurinai gab i sakuak ingka gampan mpai aiyah.) ⁵ Garam Farisi ingka garam wayant hahar hup bumur gikantui Yisu gisuni, ''Gisu aus in agua kuri gam ma garagia surung nangku raham tahan was gan ka garam raham, gisu aus in kurinai gigan ka ma gakakuk bangkian gan amuk?'' ⁶ Yisu ginia wat kurinai gisuni, ''Aisaia ginia hup simpim sib gisu agam kuri zuhup ayang,' ingka rungan gahahar in ginia, garamsagat ani ginia hup tak i garam gan tak ka sampan gan wayant gan gimi tamanak i zi' ⁷ Kurinai gi is mint i rinin hahuan tak i zi, ka kurinai giha i nangkuraham hup bumur garam gan gisu Anutu hup gan.' ⁸ Agua gikab Anutu hup bumur gan giruk ka gigab sisib hup bumur rumpungk nangku raham garam gan. ⁹ Ka Yisu ginia, ''Agam garamsagat gab mais ka ninungk i yaragia hup bumur Anutu gan gisunai in agam gigab nangku raham wayant taham was gan ru gimin.'' ¹⁰ Moses ginia, 'Agam wampai ragurun i hup ramangk rinangk agam gam; ingka, garam wi nia hup mais wat ramangk rinangk gan, kurinai yamamp ayang.' ¹¹ Ka agua ginia, 'Ini garam basinta nia wat ramangk rinangk gan suni, bangkian kab ayang su aus agua gikua izi nanai gisu sampan Anutu kab ayang,''' (Nanai anai ginia gisunani, 'Wakab wat Anutu'), ¹² Gisunai in agua gisangk yazagarigin i yagab wah rugarugan ramangk gan ma rinangk gan gan. ¹³ ''Agua wagab hup bumur Anutu gan ka wakupias rumpungk nangku raham abingk agua wakab i naruk nahan. Ingka nangku raham rugarugan santan agua gab ayang awah.'' ¹⁴ Rungan gakayak i kuampuak kuangian zua in ginia wat kurinai gisuni, ''Wayangkua simpim hup izi gangk ani, in agam wakab sib i wayant agam gam. ¹⁵ Ma wah mangan mpai parat i garam gikab i rungan biki gubuak i han wasak i sampan gan amuk. Nanai wah aus mpai wasak in kas ba gayang gikab anai biki.'' ^{16 17} Karunai i Yisu zagari garamsagat in han katang i tagur, kuri gan gakantui gin i yania wat kurinai i hup ram ayang. ¹⁸ Ingka Yisu ginia, ''Agam gisubi garam mami wayant mimungk? Agam ma gararab gisu wah aus mpai parat i garam mangan in han katang iayah ma gisangk yakab anai biki gamuk, ¹⁹ I aus biki ganai ma gisangk yahan yakatang i sampan gan amuk, i biki ganai yaha i sampan gan ingka yakas yaba i nangku raham ragian gan.'' Bi hup anai Yisu ginia ganang kiruak santan anai mimungk i gan ayang. ²⁰ Rungan ginia, ''Nanai gisu wah kas ba i garam sampan gan in gikab nanai biki. ²¹ Gisunai in garam arunai, wah aus mpai i sampan wasak kas ayang, nanai gikab wayant mais, nangku raham barau, garam bangki pinab, zumir garam mamp ayang, ²² Rutu garam mangan hinian gan ma sagat rutu sagat mangan gabuan gan, su nuguan i mangan wah gan, nia hup zuhup, hup mais, sapi rungan yab ayang, ingka gab nangku raham subaba, nia hup kirikian i mangan. ²³ ''Nangku raham santan sunanai gigab, in garam gingan biki.'' ²⁴ Yisu gazagari binai in gihan kitamp Taia ingka Saidon gan. Rungan gihan gakatang i tagur basinta, ingka rungan ma gini garam hiruk yararab yasu rungan mpai wasak i binai amuk. Ka rungan gabuningk i yaguap ayang. ²⁵ Ka gahigut sagat basinta gariak hinam gan narun gikua garam ganun mais - sagat anai gayangua hup Yisu gan i kuri hiruk ingka giba gigantu haganugun simpingk bi Yisu hagan gan. ²⁶ Karunanai sagat anai Grik, ingka nanai kuri Fonisia gan. Rungan gaparingk i Yisu yakupias garam ganun mais i yaba yakas sibi gariak hinam gan. ²⁷ Yisu ginia wat, ''Wakab kurinarun nanungk nagan ganang kiruak. I aus nanai ma ru mimungk i kua ganang kurinarun gan in rimuab wat kiam amuk.'' ²⁸ Ka sagat anai gisuntai hup in ginia wat Yisu gisuni, ''Nizun, Suraham, i kiam gimpai rampia ragurun in gigan ganang kiruak riruan gariak kab i puruk rampia ragurun.'' ²⁹ Yisu ginia wat sagat, ''Gisu agua nia gayang, agua miayah i han ayang. Garam ganun mais anai ru gazagari agua gariak hinam gam.'' ³⁰ ''Sagat gihan tagur zua in gararab gariak ru giangk i giangkaya, ingka garam ganun mais anai ma ru gimpai bi gin amuk. ³¹ Yisu gihan mangan zua i kitamp Taia gan ingka giba gikas i Saidon i mpui nkiak Galili wasak i kitamp decapolis. ³² Kurinai gikua giba gin basinta ringanhiang ka muanbaba garam, ingka kurinai gaparingk raham i Yisu yakab bangkian gan hahuan i garam anai. ³³ Yisu gikua nanai gihan banging sibi garamsagat santan ingka hirukangkua gihan rungan gimpai, ingka rungan gikab bangkimuruan gan gihan wasak i ringan nanai gan, ingka gahinti gahurun i bangkian gan, ingka gigab mann nanai gan. ³⁴ Yisu garantab ganungkun; ingka rungan gayahari mamup raham in ginia gisuni, ''Efata,'' nanai ginia gisuni, ''Agua maram watak!'' ³⁵ Yisu gigab i ringan gan mimungk in nanai gisangk yaringanti i gin, ingka gihigut wah gab i mann anai gisu miayah, gisunai in karuni nanai ginia hup mimungk. ³⁶ Yisu ginia kurinai ma gisangk yania wat garam mangan amuk. I gubuak Yisu nia kurinai yatip muan gan in ma gisangk yania gayang amuk, kurinai ma gayangua Yisu gamuk ka ru ginia hup. ³⁷ Kurinai gabuzurun hantab, in ginia, ''Rungan gigab wah mimungk santan. Rungan gigab in ringanhiang gayangua ingka muanbaba ginia hup.''