¹ Yisu gingkiti bi nanai in rungan gihan parat gan, ingka disaipel gan gasantamp. ² Gubuak huguan mpai Gasap ba gayang, gingan nanai gihan gakatang i tagur sunta Yuda gan in ginia hup hagahagan wat garam sagat. Garamsagat marikum gayangua hup hagahagan i gan nanai in kurinai gabuzurun hantab. Kurinai ginia gisuni, ''Rungan gikua hup hagahagan nanai abingk?'' ''Wayant mimungk rugan su aus rungan gikua?'' ''Gigab nguar su aus i bangkian gan?'' ³ ''Nanai anai ma garam gab tagur amuk ahin, Maria gariak marub gan ka i raingan Jems, Josis ingka Judas ingka Saimon? Nahungan ma gimpai bi agi gamuk ahin?'' Kurinai sampan kukuap i Yisu. ⁴ In gingan Yisu ginia wat garamsagat gisuni, ''Propet gikua bingan raham i parat mangan tak. Kurinai ma gikua bingan raham i parat kurinai gan amuk, kuri gan ingka kuri gan tagur. ⁵ Nanai ma gisangk yagab gum raham amuk, ka nanai gisangk yakab bangkian gan hahuan i kuri hiruk rinimais garamsagat ingka yamari kurinai. ⁶ Yisu gaburun hatab, i aus, kurinai ma bumur amuk. In gingan nanai gihan paraparat in gikab hup hagahagan wat kuampuak kuangian i hup Anutu gan. ⁷ In gingan nanai gakayak i disaipel gan 12 anai in gasaguar kurinai hirukangkua, hirukangkua gihan. Kurinai gihan ini yania hup Anutu gan harab. ingka Yisu gikab kurukuan i kurinai yasu guzun i yakua garam ganun mais pias, ⁸ ka ginia wat kurinai gisuni, ''Wangkiti kua wah mangan su sakuak haiyak, ganang ingka hanahian i yabanua gayang, ka agam wagab gaitingkit banua gayang gan.'' ⁹ Wagagar hagarumpun tak ingka wangkiti gagar bumpungk rariruant hirukangkua. ¹⁰ In Yisu ginia wat kurinai gisuni, ''I abingka agam han in mpai wasak i tagur mangan, nampai karunanai nahan nasangk agam nkiti gin in han ayang. ¹¹ Ini parat mangan mami kua agam ka yangua agam hup gam, gubuak agam ini nkiti parat anai, watiri turiant min i hagarumpun agua gam nasu hup niharab agua gam i kurinai.'' ¹² Kurinai gikas gihan in ginia hup harab wat garamsagat i kurinai yakab kirikian wat nangku raham gan mais. ¹³ Kurinai gikua pias ganun mais ka kurinai garurub guzun garamsagat rinimais gan i wel in gimari rinimais kurinai gan. ¹⁴ King herot gayangua gagaingk anai, gisu Yisu bingan gan kas pisit payat. Hiruk ginia gisuni, Jon mpuirurub gan gitakirun zua i parat garam mamp ayang gan, gisunai in rungan gigab kurukuan yagab nguar sunanai.'' ¹⁵ Hiruk mangamangan ginia gisuni, nanai Elaijah,'' Ka hiruk ru ginia hup gisuni, ''Nanai propet basinta nungk mpai wat mamuan.'' ¹⁶ I gubuak Herot yangua hup anai, nanai ginia gisuni, ''Jon mpuirurub anai zi gitip i kuan sib, ka nanai gitakirun zua.'' ¹⁷ Herot gasaguar garam gihan gigab Jon mpuirurub gan in gikab i rumuang wasak. I aus, nanai ginia yahuar herodias, raingan Filip, hiniang gan. ¹⁸ Jon ginia Herot gisuni, ''Nanai ma mimungk i agua kua raingam hinian gan amuk.'' ¹⁹ Ka Herodias sampan mais i jon in gini yazumir nanai, ka sagat anai ma gisangk amuk, ²⁰ Herot giguan i Jon. Nanai gararab gisuni, Jon basinta garam mimungk arumangan in giha sap. Gisunai in Herot gimarigin simpim. Gubuak Herot yangua Jon hup gan, nanai gikab i sampam mais, ka nanai nuguan mimungk i yangua i hup gan. ²¹ Ka gingan, huguan Herot rinan kua gayang giba in nanai gigab ganang kiruak raham i guzun tagur gan, ingka guzun soldia gan ingka garam guzun Galili gan. ²² Herodias gariak hinam anai rungan giba gin gingkuamp i kurinai maran. Hinam gikab Herot wat garam wi ba i ganang kiruak nuguan mimungk. Anungka Herot ginia wat hinam gisuni, ''Agua wakantui zi i wah aus agua nuguam i gin, zi yangan yakab wat agua.'' ²³ Herot hup nahuh i hinam gisuni, ''Wah aus agua kantui zi, zi yangan yakab wat agua, agua gisangk yakantui zi i parat mungkak izi gangk.'' ²⁴ Anungka hinam gihan parat in ginia wat rinan gan gisuni, ''Zi yangan yakantui King i wah aus?'' Ingka rinan ginia, ''Wakantui gin i Jon mpururub guzukumpiak.'' ²⁵ In gahigut arutak hinam gihan zua i King in gikantui gin gisuni, ''Karuni zi gini yangan agua yakab wat izi guzukumpiak Jon mpuirurub gan i gai kambih basinta in yakab wat izi.'' ²⁶ I nanai garagia hup gan, i aus, nanai ginia hup nahuh wat hinam sib i garam maran ba i ganang kiruak. ²⁷ Gisunai in King gasaguar garam yas garam basinta gan, in ginia wat i yakua Jon guzun yabai gin. Anungka garam yas garam gihan in garaya Jon kuan sib i rumuang wasak. ²⁸ Nanai gikua Jon guzun giba i kambih raham basinta in gikab wat Herodias gariak hinam ingka hinam gihan gikab wat rinan gan. ²⁹ Gubuak disaipel jon gan yangua hup sunanai, kurinai giba in gikua Jon rinin gan in gihan gikab i bumpui. ³⁰ Anungka, disaipel gihan zua i Yisu in ginia wat i wah santan kurinai gab ayang ka ni hagahagan wat garamsagat. ³¹ Ingka gingan Yisu ginia gisuni, agi nahan parat miayah in nampai gasap kutik i binai. I aus in garamsagat marikum ru gihan iba in ma gimpai gasap amuk. ³² Gisunai in kurinai gakatuab i bot in gihan parat abingk mami garam. ³³ Ka garamsagat gararab kurinai han ayang ingka marikum rarab ayang i kurinai. ingka kurinai gabanua i hagan gan i parat santan in ginungk gikas i parat abingk Yisu yahan aiyah. ³⁴ Gubuak kurinai ba mpui banging, Yisu gararab kuampuak kuangian mpururun in huangk ayang. Yisu gararab kurinai in sampan gan girang i kurinai. I aus? Rungan gararab kurinai gisubi, garam kaping ayang miayah in ginia hagahagan wat kurinai i wah santan. ³⁵ I gubuak rukayang, disaipel Yisu gan giba in ginia wat gisuni, ''Parat ani ma garamsagat marikum amuk in ru gini yamikuan ayang. ³⁶ Wasaguar kurinai nahan parat min banging in tagutagur simpingk i kurinai, in kurinai yaguri ganang kiruak gan.'' ³⁷ Ka Yisu gisuntai hup kurinai gan gisuni, ''Agam wakab wat kurinai wah hiruk kurinai yagan ayang.'' Ingka kurinai ginia wat Yisu gisuni, ''Agai gisangk yahan in yakua ganang tup ayang gan gisangk yasu 200 sakuak in yakab wat kurinai yagan ayang.'' ³⁸ Anungka Yisu gakantui kurinai, ''Agam gigab ganang hurahua?'' Agam wahan in wararab. I kurinai rarab ayang, kurinai ginia gisuni, ''Agai gigab ganang hirukangkua hirukangkua basinta ingka bipi hirukangkua.'' ³⁹ Yisu ginia wat garamsagat i yagab mpumpirun in yampai hahuan i sai. ⁴⁰ Kurinai gimpaihub i mpumpirun su i 100 ingka 50. ⁴¹ Yisu gikua ganang hirukangkua hirukangkua basinta ingka bipi hirukangkua, anungk in rungan garantab ganungkun in ginia ihih arun. Yisu garumpu ganang in gikab wat disaipel i kurinai yakab wat garamsagat. Yisu gigab nangkuraham sukarunai awah i bipi hirukangkua in gikab wat kurinai. ⁴² Kuampuak kuangian gigan in gipupimpap. ⁴³ Disaipel gampuru ganang kiruak haiin i gihuangk i hayak 12 anai ingka kurinai gigab gisu karunai i bipi gawah. ⁴⁴ Guzun garam gan ga ganang kiruak gisangk i 5,000. ⁴⁵ Gahigut arutak Yisu gikab disaipel gan gihan wsak i bot in ginungk gihan marahaiin parat Betsaida gan. In gingan gasaguar garamsagat gitabitir. ⁴⁶ I kurinai han sib, anungka Yisu gihan ngaring hahuan i yayu gayang. ⁴⁷ Kamikuan giba, ingka bot kurinai gan gimin wasak i mpui nkiak, ka Yisu rumbis gan tak gimpai ngaring hahuan. ⁴⁸ Yisu gararab kurinai su gasap raham i yamari bot kurinai gan. I aus, mamup raham gabiriak wat kurinai bot gan. Anungka i ru gimparampaki maran ini yamikuan ayang ingka Yisu gabanua hahuan i mpui in gini yatampan kurinai yahan ayang. ⁴⁹ Ka i kurinai rarab Yisu banua hahuan i mpui. Kurinai ginibi, Yisu kutua basinta in kurinai gakayak raham bingan. ⁵⁰ I aus, kurinai gararab in giguan raham bingan. Ingka gahigut Yisu ginia wat kurinai gisuni, ''Agam sampam gam manangk nampai. Zi karunanai, agam wangkiti guan ayang.'' ⁵¹ Yisu gihan wasak i bot bi kurinai, ingka mamup raham gimamp. Disaipel gararab wah sunanai in kurinai gabuzurun hantab. ⁵² Disaipel ma gararab simpim i ganang ani wah aus. Gisunai in kurinai sampan gan gimin bumur. ⁵³ I kurinai ru hirak mpui huak sib. Anungka kurinai giba i kitamp basinta kuri nia Genesaret in gikab bot i mpui banging. ⁵⁴ In i kurinai han kas sibi bot, gahigut aru tak garamsagat rarab kurinai. ⁵⁵ Ingka kurinai giruant gihan parat abingk abingk in gikua garamsagat rinimais santan gihai Yisu. ⁵⁶ Abingka kurinai han i parat, ma i parat raham, ma wasak i parat raham bingan, kurinai gikab garamsagat rinimais i parat garam kua ganang kiruak iayah. In kurinai gaparingk i Yisu i yakab kurinai gisangk yakab bangkian i bumpungk gan. Yasu garamsagat rinimais santan nungk gab ayang in su mimungk zua.