¹ Kurinai giba gikas mpui nkiak marahaiin, i parat gerasens. ² Gingan Yisu gingkiti bot in giba pisit wasak i haiin anai garam kuah ganun mais giba gikas bi gin. ³ Garam anai gimpai wasak i parat bumpui anai. Garam basinta ma gisangk i yaharu gayang amuk, buak awah ma gisangk i yagab ayang amuk. ⁴ Kuri gigab, gaharu in gikab i butu wasak gubuak santan sib wat buak ingka sikan. Ka nanai garapua buak anai gihan haiihaiin ka sikan butua gan anai giha riru ri ruan. In ma garam mangan gigab sakik i yakab i yaruk ayang amuk. ⁵ Mikuan wat gubuak maimaik wasak i parat bumpui ingka wasak i ngaring, nanai girang, gagasub garat ingka gagumam rining gan i sakuak maramaran. ⁶ Gubuak nanai rarab Yisu i tamanak, nanai giruant gihai gin in gagantu hagan nugun bi Yisu hagan. ⁷ Nanai girang giba gikas wat kayak ayang raham bingan, ''Izi yangan wah aus arun i agua, Yisu, Anutu gariak marub gan wagungk nizun? Zi gaparingk i agua i Anutu bingan gan nanai rungan, wangkiti kab kukuap wat izi.'' ⁸ Gisunai, in Yisu ginia wat nanai gisuni, ''Agua wangkiti garam aru ragai in wakas waba sibi gin, agua garam ganun mais.'' ⁹ Ingka Yisu gakantui gin, agua bingang gam ausa, ingka garam anai gisuntai gin gisuni, ''Zi bingan gangk anai marikum, i aus agai anai marikum.'' ¹⁰ Garam arunai gaparingk i Yisu santan zua i Yisu ma gisangk yasaguar kurinai yakas yahan sibi parat anai amuk. ¹¹ Karuni, gihab marikum gimpai ngaring hahuan kutik in ru gigan nam. ¹² ingka garam ganun mais anai gaparingk i Yisu gisuni, ''Wasaguar agai nakatang i gihab, wangkiti agai nakatang i kurinai.'' ¹³ Anungka, Yisu gikab hup mimungk wat kurinai; in garam ganun mais anai gikas sibi garam anai in gihan gakatang i gihab, ingka gihab giruant gahigut gihan masamp i ngaring kutik in gihan gumpin i mpui nkiak, ingka simpingk i 2,000 gihab gimamp gumpin i mpui nkiak. ¹⁴ Gingan kuri kab ganang kiruak wat gihab giruant gihan parat raham ka parat min banging i parat raham in ginia harab wah aus kas ayang anai, gisunai in garamsagat gihan bi nanai gini yararab wah aus kas ayang anai. ¹⁵ Gingan kurinai gibai Yisu, ingka kurinai gararab garam aru garam ganun mais su guzun iayah ganai, garam aru wi nai garam marikum su guzun iayah, ru gimpai anai, nanai gagagar bumpung nanai gimpai wat wayant mimungk zua; ingka kurinai giguan raham bingan. ¹⁶ Kuri wi rarab wah aus i kas i garam aru garam ganun mais su guzun iayah, kurinai ginia wah mangamangan santan kas i nanai ingka kurinai ginia wat kurinai awah i wah mangamangan santan kas i gihab. ¹⁷ Gingan kurinai gaparingk i Yisu yangkiti kurinai parat gan. ¹⁸ Gubuak Yisu katuab han wasak i bot, garam aru wi garam ganun mais su guzun iayah, gaparingk i Yisu i nanai wat Yisu yahan ayang. ¹⁹ Ka Yisu ma ginia nihuan i gin amuk, ka ginia wat gisuni, ''Wahan tagur agua gam ka i kuri agua gam in wania wat kurinai i wah aus Suraham mari agua, ka i nangku raham suaus Suraham kapiri sampan nuh ayang gan wat agua.'' ²⁰ Anungka garam aru wi garam ganun mais su guzun iayah gihan in ginungk ginia harab wah raham santan abingk Yisu gab i gin wasak i parat raham santan, ingka kuampuak kuangian gayangua nanai in kurinai gabuzurun hantab wat nuguan mimungk raham i wah aus kas i garam anai. ²¹ Ka gubuak Yisu han zua i marahaiin mpui nkiak gan, wasak i bot, kuampuak kuangian gimpumpirun in gihuangk gawahik Yisu, gubuak i ru mpai mpui nkiak banging. ²² Gingan garam guzun basinta tagur sunta garam Yuda gan, bingan gan anai Jairus, giba gin gararab Yisu in gapuruk ragurun i hagan gan. ²³ Rungan gaparingk i Yisu zua in ginia, ''Zi gariak hinam gangk narun ru gini yamamp ayang.'' Zi gaparingk i agua, waba gin wakab bangkiam gam hahuan iayah yangan nanai gisangk yasu mimungk in yampai maratak.'' ²⁴ Anungka, Yisu wat nanai gihan, ingka kuampuak kuangian gasantamp Yisu in kurinai ru giba simpingk in gawahik Yisu. ²⁵ Karuni, sagat basinta gimpai, in nanai gikua rinimais ngkiti buik sangk 12 yia. ²⁶ Sagat anai gikua kukuap raham gisu nanai ka gararab garam gab rinin santan, in wah gan santan gihan sib, ka nanai ma gingan mimungk amuk in rinimais gan giha raham bingan. ²⁷ Gubuak sagat anai yangua gagaingk Yisu gan, nanai giba kirikian i Yisu wasak i mpumpirun in gigab bumpung i gan. ²⁸ Sagat anai ginia gisuni, ''Ini zi gab Yisu bumpung gan tak, zi yangan mimungk.'' ²⁹ Gubuak sagat anai gab Yisu, buik gakatik, in nanai riningan wasak gararab gisu nanai ru rinimais gan su mimungk. ³⁰ Gahigut aru tak Yisu gararab wasak i rungan gisu bumur gingkiti gin in gikas gihan. Ingka rungan ginik wasak i kuri garamsagat santan in ginia gisuni, ''Wi gikab bangkian izi bumpungk gangk?'' ³¹ Disaipel gan ginia wat gisuni, ''Agua gararab kuampuak kuangian sagisurun wahik agua in agua ginia gisunani, 'Wi gikab bangkian izi?''' ³² Ka Yisu gararab gawahik gini yararab wi gigab anai. ³³ Sagat anai maran gararab i wah aus i kas i rungan, in giguan ka gitatarat. Rungan giba gin gapuruk Yisu maran gan in ginia wat hup nizun gan i wah santan aus kas iayah, ³⁴ Ingka Yisu ginia wat gisuni, ''Gariak hinam, bumur agua gam gikab agua mimungk. Agua wahan wat sampan nuh ayang in wakua mimungk gam santan i rinimais gam.'' ³⁵ Gubuak Yisu ru niahup, kuri hiruk gibai garam guzun tagur sunta gan anai, in kurinai ginia gisuni, ''Agua gariak hinam gam ru gimamp, agua yakab barabin i kidungwaga i aus?'' ³⁶ Ka gubuak Yisu yangua wah aus kurinai nia gayang, rungan ginia wat guzun tagur sunta gan gisuni, ''Wangkiti guan ayang. bumur tak.'' ³⁷ Ka Yisu ma ginia nihuan i kuri garamsagat hiruk yasantamp ayang amuk, ka rungan ginia nihuan i Pita, Jems ingka Jon, raingan Jems. ³⁸ Kurinai giba gikas i tagur guzun tagur sunta gan in Yisu gararab bi nanai garam gahiguh runtun santan; kurinai gimpai ru girang in gakayak raham bingan. ³⁹ Gubuak Yisu katang tagur, nanai ginia wat kurinai gisuni, ''I aus agam maragayab ingka i aus agam girang?'' Gariak ma gimamp amuk ka rungan gigiangk marampuk. ⁴⁰ Kurinai garubuang igin. Ka Yisu gikab kurinai gimpai parat sibi tagur, ingka gikua gariak ramangk rinangk gan ingka kuri wi mpai bi gin, in kurinai gihan wasak i bi gariak giangkayah. ⁴¹ Yisu gikua gariak bangkian in ginia wat anai gisuni, ''Talita, kum!'' karuni agi kining i hup anai yahuh basinta gisuni, ''Hinam narun, zi ginia wat agua, agua watakirum.'' ⁴² Gahigut arutak gariak gitakirun in gabanua(Gariak hinam anai gubuak gan 12 yia ganai). Gahigut arutak kuampuak kuangian garamsagat gabuzu ruhantab wat nuguan mimungk raham bingan. ⁴³ Ingka Yisu gikab hup bumur wat kurinai gisuni ma kuampuak kuangian hiruk ma yaringant i nani gamuk. Gingan Yisu ginia wat kurinai i yakab wah hiruk wat gariak i rungan yagan ayang.