¹ Yisu ginungk i kab hup katang ayang wat garamsagat marikum i mangk mpui nkiak gan. Gingan Yisu giyab gihan wasak i bot basinta mpai hahuan i mpui nkiak in gimpai iayah. Ka garamsagat marikum anai gimpai mangk i mpui nkiak in gayangua hup. ² Yisu gikab hup katang ayang santan wat garamsagat marikum i hup ram ayang, ingka wasak i hup katang ayang gan gihai garamsagat, nanai wah aus rungan nia wat kurinai. ³ ''Waringant igin, garam gab gum gikas gihan i yantang nam gar gan. ⁴ Gubuak nanai ru ntang nam gar, nam gar hiruk gapuruk i nangku raham in gaziab giba gin gigan nam gar anai. ⁵ Nam gar hiruk gapuruk hahuan i kitamp sakuak huangk iayah nanai mami kitamp santan miayah. Nam gar anai gahigut gintamp i aus kitamp haiin anai ma gihan buamp amuk. ⁶ I gubuak ba wagungk, nanai gahasar kurinai, i aus nam gar anai kwuakian gan ma gihan kitamp gumpin amuk, gisunai in i gima bimamp ⁷ Nam gar hiruk gapuruk wasak i sai binbin. Sai binbin anai giyab in girim mub i nam gar anai, in nam gar anai ma gikab gar amuk. ⁸ Nam gar hiruk gapuruk i kitamp mimungk in gikab gar santan. Gar gan gikas gisu 30 tak ka hiruk anai 60 tak ingka hiruk anai 100 tak. ⁹ Gingan nanai ginia gisuni, wi ringan min ayang i yangua gayang, wakab i nayangua! ¹⁰ Gubuak Yisu rungan mpai ayang, kuri mpai simpingk bi gin wat disaipel 12 anai gakantui gin i hup ram ayang anai hugun gan. ¹¹ Yisu gina wat kurinai gisuni, ''agam ru giku wayant guap ayang parat raham Anutu gan. Ka i kuri wi mpai tamanak, wah mangamangan gimi i hup ram ayang. ¹² Gisunai in gubuak kurinai rarab ayang, nanai kurinai yararab ayang tak ka kurinai ma gisangk yararab ayang amuk, ingka gubuak kurinai yangua gayang, kurinai yayankua gayang tak ka kurinai ma gisangk yararab simpim amuk. Kurinai kangan kararab simpim in nanai kurinai kangan kabai Anutu in nanai yaku kurinai barabin gan pias.'' ¹³ Yisu gingan ginia kurinai gisuni, agam ma gararab i hugun gan wayant hup ram ayang ani gamuk? Agam yangan ma yararab hugun wayant hup ram ayang mangan gan amuk ahin? ¹⁴ Garam gab gum wi ntang nam gar, nanai gisu garam aru nanai ntang Anutu hup gan. ¹⁵ Nam gar anai puruk i nangku raham banging, nanai gisu, hup gapuruk aru tak i gubuak kurinai yangua gayang, gahigut aru tak, garam mais giba in gikua pias hup abingk anai puruk wasak i kurinai. ¹⁶ Nam gar anai puruk hahuan i kitamp abing sakuak amuk iayah gisuni, kuri garamsagat gayangua hup anai in gahigut gikua wat nuguan mimungk. ¹⁷ Kurinai ma kwakian giruk kitamp amuk gisunai in gimin gubuak tup aru mangan. Gingan, gubuak barabin ingka yutayang ba i kurinai i aus hup ma gimin wasak i kurinai amuk, gahigut aru tak kurinai gapuruk i barabin wat yutayang anai. ¹⁸ Kuri hiruk anai nam gar puruk wasak i sai binbin. Kurinai gayangua hup Anutu gan, ¹⁹ Ka sampan barabin kitamp ani gan, ingka nangku raham zuhup ayang gan nuguan i wah mangamangan kitamp gan ingka su nuguan i wah santan gihan wasak in girimub i Anutu hup gan, in nanai ma gikab gar amuk. ²⁰ Gingan, nam gar anai puruk i kitamp mimungk, nanai anai kuri wi yangua hup Anutu gan in gikua hup anai, gisunai in kurinai gikab gar. Hiruk gikab gar gisu 30 ka hiruk anai 60 ka hiruk anai 100 yab ayang ginus gar kuri ntang ayang. ²¹ Yisu ginia wat kurinai gisuni, ''Agam gikua lam giba tagur wasak in gikab i gur gumpin ma ragurun i gampan? Agam maimaik gikua lam giba in gikab hahuan i gai lam gan.'' ²² I aus, wah mangan ma yamin humpun amuk yangan kuri ma gisangk yararab ayang amuk, ka ma wah mangan kuri humpun ayang nanai ma gisangk yamin parat pisit gamuk. ²³ Ini kuri hiruk ringan min i yangua gayang, kurinai nayangua. ²⁴ Yisu ginia wat kurinai gisuni, ''wakab ringam in wayangua. I nguar aus agua kab ayang, i nguar anai kuri yakab agua in nanai ru wagungk.'' ²⁵ I aus, wi gab ayang, i nanai kuri yakab wat anai marikum ka wi miayah, i nanai kuri yakua pias wah aus nanai gab ayang. ²⁶ Ingka nanai awah ginia, ''Anutu parat raham gan gisu garam basinta ntang nam gar gan i kitamp.'' ²⁷ Nanai gigiangk wat mikuan ingka gamunti wat huguan, ka nam gar gintuap giba hahuan in gikas. Nanai ma gararab i nangku raham su abingk nanai gikas. ²⁸ Kitamp anai gikab gar i rungan tak, marasamub nanai gikab yahat, in gingan gar ingka gingan nanai ru gikab gar gihan raham. ²⁹ Gubuak gar nib ayang, garam gab gum gasaguar muzuk i yaraya gar ba pisit, gar ru nkamp ayang ini yakua gayang.'' ³⁰ Ingka nanai ginia zua, ''I wah suaus yangan agi yakab i yahuh wat Parat raham Anutu gan. Hup ram suaus yangan agi yakab i yahuh yakas parat pisit i parat raham Anutu gan? ³¹ Nanai gisu nam gar kutik arumagan gubuak kuri ntang ayang, nanai kutik aru mangan i nam gar santan i parat kitamp ani. ³² Ka, gubuak kurinai ntang ayang, nanai gingan gikas santan in ginus gai santan ka wah sai i gum. Ka nanai gikab bangkian gan raham i gai anai in gaziab gisangk yaba gin yasuang tagur i nanai.'' ³³ Wat hup ram ayang santan, Yisu ginia harab Anutu hup gan wat kurinai gisunai yangan kurinai gisangk yararab ayang, ³⁴ ingka hup santan i gan gihan i kurinai, gigab hup ram ayang santa. Ka, gubuak Yisu mpai rungan tak bi disaipel gan, nanai ginia harab i parat pisit hugun santan hup ram ayang anai wayant gan. ³⁵ Gubuak aru nanai hirah bagayang gan, Yisu ginia wat kurinai, ''Agi nahan mpui nkiak mara haiin.'' ³⁶ Gisunai in kurinai gingkiti garamsagat santan in gikua Yisu bi kurinai, i aus Yisu ru gimpai i bot. Bot hiruk awah wat kurinai gihan. ³⁷ Ingka gingan i, mamup raham basinta gitakirun in mpui nkiak giba gihan wasak i bot in ru gini yakab bot yahuangk ayang. ³⁸ Ka, Yisu rumbis gan gigiangk i bot kirikian. Disaipel gi is hatah in ginia, ''Kidungwaga, agua ma gararab gisu agai ru gini yamamp ayang?'' ³⁹ Yisu gitakirun in ginia mamup ingka ginia mpui nkiak gisuni, ''Manangk wampai! Wangkiti takirum!'' Gingan i mamup gazugub sib ingka mpui nkiak manangk gimpai. ⁴⁰ Gingan Yisu ginia wat garam disaipel gisuni, ''I aus in agam giguan? Agam ma gigab bumur amuk?'' ⁴¹ Garam disaipel guan ayang raham gihuangk i kurinai ingka kurinai ginia hup wasak i rungan gisuni, ''Wi ganai, ingka mamup wat mpui nkiak gayangua i hup gan?''