¹ I huguan mangan mpai gasap, Yisu gabanua gihan wasak i garam Yuda tagur sunta gan zua, ingka garam basinta bangkian gan mamp ayang gimpai anai. ² Garam hiruk gikab maran i Yisu gisangk i yamari gin wat huguan mpai gasap ani. Garam aus anai gagarui nangku raham ini yakab Yisu i butua. ³ Yisu ginia wat garam aru bangkian mamp ayang anai, ''Watakirum in wamunti wasak i garam santan.'' ⁴ Gingan yisu gakantui garamsagat, ''Nani nguar i gab mimungk wat mpai gasap, ma kab barabin; i yamari maratak, ma yayas i yamamp ayang?'' Kakurinai gimpai ntuhh irun. ⁵ Yisu gararab kurinai wat sampa kukuap, ingka Yisu sampan ginuh i kurinai zua i aus, kurinai sampan gaguzurun. Ingka Yisu ginia garam arunai, ''Wataru bangkiam gam nakas nahan.'' Garam arunai gataru bangkian gan, in Yisu gimari gin. ⁶ Gubuak kuri Farisi rarab sunanai, kurinai gahigut arutak gihai garam Herot gan in gaguzu hup ini yazumir Yisu. ⁷ I sunanai tamur gan, Yisu gabanua i sarasiri bi garam disaipel gan. Ingka garamsagat santan i Galili ka Yudia, ⁸ I Jerusalem, Idumea ingka han hainbua Jodan ingka kuri wasak i Taia wat Saidon kurinai gasantamp Yisu. Kuri santan kurinai gayangua wah aus Yisu gabayang in kurinai giba igin. ⁹ Yisu ginia garam disaipel yamari bot kutik basinta i aus garamsagat marikum ru giba i yararab ayang, kurinai kangan kampai i run in kagisu Yisu. ¹⁰ Yisu gimari garamsagat marikum, in kuri santan wi ku rimais rugarugan kurinai gagisu rungan giba igin, i aus kurinai wayant ini yagabayang ¹¹ Gubuak ganun mais rarab Yisu, kurinai gapuruk i maran, in kurinai gakayak in ginia, ''Agua gariak marub Anutu gan.'' ¹² Ka Yisu ginia hup bumur i kurinai ma yakab i yakas paratpisit amuk. ¹³ Yisu giyab gihan ngaring hahuan in gakayak i kuri nuguan igin in kurinai giba igin. ¹⁴ I nanai Yisu nguar i 12 garam in ginia kurinai aposel, gisunai in kurinai yampai bi gin, in gasaguar kurinai yahan yani harab hup mimungk, ¹⁵ in gikab kurukuan wat kurinai awah i yakupias ganun mais. ¹⁶ Yisu nguar i 12 garam aposel, i saimon gikab i bingan gan, Pita; ¹⁷ Jems, gariak marub Sebedi gan, Yuanis, Jems raingan (Gikab i bingan gisu boaneges, hugun gan gisu nani gariak marub gabagah kuruayang gan); ¹⁸ Ingka Andru, Pilip, Batelome, Matyu, Tomas, Jems gariak marub Alpius gan, Tadius, Saimon wi kuri ginia Selot, ¹⁹ ingka Judas Iskariot, garam wi kab Yisu i buman bangkian. ²⁰ Gingan Yisu gihan tagur zua, garamsagat santan gampururun zua gisunai in kuri marikum in kurinai ma gisangk i yaga ganang amuk. ²¹ Gubuak i kuri gan yangua nanai, kurinai gikas gihan ini yakuagayang, in kurinai ginia, ''Wayant gan ma mimungk amuk.'' ²² In garam wayant hahar butua gan awah giba i Jerusalem kurinai ginia, ''Belsibal gimpai wasak iah in, i nanai garam guzun ganun mais gan nanai gikupias kuri ganun mais.'' ²³ Yisu gakayak i kurinai giba igin in ginia hup wat kurinai i hup ramayang, ''Yasu abingk in garam mais yaku garam mais pias?'' ²⁴ Ini parat basinta rumpurun hirukangkua in su buman i rungan, parat anai ma gisangk yamunti gayang amuk. ²⁵ Ka ini tagur basinta rumpurun gan han su hirukangkua, tagur anai ma yamunti bumur amuk. ²⁶ Ini garam mais takirun in su buman i rungan, rungan ma gisangk yamunti gayang amuk, nanai yasu miah sib. ²⁷ Ka garam basinta ma gisangk yakatang i tagur garam kurukuan bumur gan in yaku i wah gan humpun amuk, nanai nanungk naharu garam kurukuan bumur anai hagan bangkian in, ingka yangan nanai gisangk i yaku wah humpun i tagur gan. ²⁸ Nizun bingan zi yania wat agam, mais santan garamsagat gabayang in ni hup rinimaik i Anutu, nanai Anutu yaku kurinai mais gan pias. ²⁹ Ka wi niahup rinimaiik i marapayam, Anutu ma gisangk yaku kurinai mais gan pias amuk; mais gan yamin gubuak ka gubuak. ³⁰ Yisu ginia hup sunanai i aus, garam ginia, ''Nanai giku ganun mais i gimpai iah.'' ³¹ Rinangk gan wat i raingk was gan kurinai giba gamunti parat, in gisaguar garam basinta in kuri gakayak igin i yakas yaba parat. ³² Garamsagat santan gimpai in gawahik Yisu, in kurinai ginia wat, ''Agua rinam gam wat raim was gam gimpai parat in kurinai giba gigarui agua.'' ³³ Yisu ginia kurinai, ''Wi izi rinangk ka zi raingk was gangk?'' ³⁴ Yisu gararab gimbib i kuri wi mpai hub wahikayang in ginia, ''Wararab, nani zi rinangk gangk ingka zi raingk was gangk! ³⁵ Nizun bingan wi ragia Anutu sampan gan, garamsagat sunanai izi raingk gangk, nahungk ingka rinangk gangk.''