¹ Huguan hiruk tamur ayang Yisu giha zua i Kapenaum, garamsagat gayangua gisu i mpai tagur wasak. ² In garamsagat santan giba gihuangk in tagur wasak wat masiahuan gaiin gihuangk in tagur ma gisangk amuk. Yisu gikab hup mimungk i kurinai. ³ Garam hiruk gibai Yisu in giku garam mangan hagan bangkian ru mamp ayang; Garam hirukangkua hirukangkua gikab i rampia in gabariang giba. ⁴ Kurinai ma gisangk yakatang yahan tagur wasak amuk i aus garamsagat santan gihuangk, gisunai in kurinai giyab tagur, gikab tagur gisumap in gikab rampia giruk, wat garam hagan, bangkian mampayang giha buamp i Yisu munti iah. ⁵ Yisu ru gararab bumur garam hirukangkua hirukangkua gan gisunai in i ginia wat garam aru hagan bangkian mampayang, ''Zi giku agua mais gam pias.'' ⁶ Ka garamwayant hiruk hahar lo gan gimpai bi nai in kurinai ru maran gihuar anai wasak i sampan gan, ⁷ ''I aus in garam aruni ginia hup rugan sunanai? Rungan ginia hup rinimaik i Anutu! Ma garam mangan yaku mais pias amuk, nanai Anutu basinta tak? ⁸ Gahigut Yisu gararab i sampan gan wasak i wah aus kurinai maran huar wasak i kurinai rungan, ingka Yisu ginia kurinai, i aus in agam ru maram gihuar hup ani i agam sampam gam wasak?'' ⁹ Aus anai pisit i ni wat garam hagan bangkian mamp sib, 'Zi giku agu mais gam' ma hup' Agua watakirum in waku gampan gam in wabanua'? ¹⁰ In agam wararab wasuni garam gariak gan gigab kurukuan santan i kitamp ani in nanai gisangk i yaku mais pias. Nanai ginia wat garam hagan bangkian mampayang gisuni,'' ¹¹ Zi ginia agua, watakirum, waku gampan gam, in wahan tagur gam.'' ¹² Garam anai gitakirun in gahigut giku gampan gan, in gabanua giha gikas i tagur i kuri santan maran. Gisunai in santan gakutamirun in gikab bingan raham i Anutu, ingka kurinai ginia gisuni, ''Agai ma gararab wah sunani gamuk.'' ¹³ Yisu ginkiti parat anai in gihan mpuihuak, in garamsagat santan gibai gin, ingka i gikab hup mimungk wat kurinai. ¹⁴ Gubuak Yisu ru banua hanayang, nanai gararab Livai Alfius gariak marub gan, wi gimpai i parat ku sakuak in Yisu ginia wat gisuni, ''Waba wasantamp izi.'' Nanai gitakirun in gasantamp Yisu. ¹⁵ Gubuak Yisu ru mpai in gan ganangkiruak i Livai tagur gan, garam santan ku sakuak wat garamsagat mais bi kuri disaipel awah gigan ganangkiruak bi Yisu, i aus in garamsagat santan ru gatamur igin. ¹⁶ Anungka garam wayant hahar lo gan, wat kuri Farisi gararab gisu Yisu gan ganangkiruak bi garam gab mais wat garam ku sakuak, kurinai ginia kuri disaipel Yisu gan gisuni, ''I aus in Yisu gigan ganangkiruak bi garam ku sakuak ka garam gab mais?'' ¹⁷ Gubuak Yisu yangua hup sunanai ginia wat kurinai gisuni, ''Garamsagat wi riningan bumur ma nuguan i garam mari rinimais amuk; nanai garamsagat wi su rinimais nanai kurinai tak yahan yararab garam mari rinimais. Zi ma giba i yakayak i garamsagat mimungk amuk, Miayah. Zi giba i garamsagat mais.'' ¹⁸ Yuanis disaipel gan wat garam Farisi gingki sampan i ganangkiruak. Kurinai giba gin ginia Yisu, ''I aus in Yuanis disaipel gan wat garam Farisi disaipel gan gingki sampan i ganangkiruak, ka agua disaipel gam ma gingki sampan i ganangkiruak amuk?'' ¹⁹ Ingka Yisu ginia kurinai gisuni, ''Ini garam su nuguan i yahuar sagat kuri gan ma gisangk yangki sampan i ganangkiruak i gubuak i ru mpai bi kurinai amuk? Nani ma gubuak ngki sampan i ganangkiruak i gubuak garam huar sagat ru mpai bi kurinai. ²⁰ I gubuak bampan kurinai giku garam huar sagat arunai gihan tamanak sibi kurinai, ingka i huguan arunai, kurinai yangki sampan i ganangkiruak. ²¹ Garam mangan ma yantang buru harih yaha bi buru mamuan amuk, i aus buru harih yarutu buru mamuan in yakab i yangan map raham. ²² Ma garam mangan gisangk yarungka waingurun in yakab i yaha wasak i waingurun rinin mamuan gan amuk, ini i sunanai rinin waingurun gan yapukayang in waingurun yasu mais, ka waingurun rinin awah yasu mais. Ka nanai yakab waingurun harih in yarungka i yaha wasak i waingurun rinin harih.'' ²³ I huguan mpai gasap gan Yisu gabanua wasak i gum giri, ingka kuri disaipel gan ginungk i ku giri gal in ganayang. ²⁴ In kuri Farisi ginia wat Yisu gisuni, ''Wararab, i aus in kurigani ru gigab wah haru nguar igin wat huguan mpai gasap ani gan ah? ²⁵ Ingka Yisu ginia wat kurinai gisuni, ''Agam ma gipumuan i wah aus Davidi gabayang gubuak i wat garam gan mpai marimp amuk ahin? ²⁶ Davidi gakatang i Anutu tagur gan gubuak Abiata mpai su guzun pris, ingka giga ganang mi wasak, i Anutu maran gan, abingk garam guzun pris tak gisangk yagan ayang ka ma garamsagat marikum amuk; ka nanai gikab wat kuri gan awah wi mpai bi gin?'' ²⁷ Ingka Yisu ginia hup zua gisuni, ''huguan mpai gasap anai garamsagat gan, ka ma garamsagat gan huguan mpai gasap amuk.'' ²⁸ Gisunai in Garam Gariak gan nanai awah Suraham in gisu guzun i huguan mpai gasap.''