¹ Yisu gazagari bi nanai, abingk rungan mpai in gabanua gihan in gikas i distrik Yudia, nanai kitamp mungkak mangan abingk min banging i Jodan mpui. Ingka kuampuak kuangkian garagia zua. Rungan ginia hagahagan wat kurinai zua gisu i nungk gab ayang. ² Ingka Farisi hiruk giba gini yakirib Yisu ingka gikantui gin gisuni, ''Nani nizun gisuni, butua gitip hup garam gisangk yangkiti hinian gan?'' ³ Ingka Yisu gisuntai kurinai, ''Moses ginia aus wat agam?'' ⁴ Ingka kurinai ginia wat Yisu gisuni, Moses ginia, ini garam mangan nkiti sagat gan han ayang, nanai yahahar mamin sap rapua huar sagat gan ingka yasaguar i yahan ayang.'' ⁵ Yisu ginia wat kurinai gisuni, Moses gahahar butua ganai, i aus, agam nuguan bumur i yangkiti sagat agam gam.'' ⁶ ''Ka i marasamub i wah manga mangan i kitamp ani, Anutu gikab hinam marub.' ⁷ I nanai hugun gan, garam gingkiti ramangk rinangk gan ingka gihan wat sagat gimpai. ⁸ Gisunai in hirukangkua yangan yampai yasu rinin basinta tak, hirukangkua ma gimpai gipagapak gamuk, miayah, hirukangkua gimpai gisu rinin basinta tak.' ⁹ Gisunai in wah aus Anutu haru gayang, ma garam yatab sib gamuk.'' ¹⁰ Gubuak kurinai mpai tagur wasak, kuri gan gikantui gin zua i hup anai. ¹¹ Rungan ginia wat kuri gan gisuni, ''Ini garam mangan nkiti sagat gan, garam arunai gigab nangkuraham barau, ingka ini nanai huar sagat harih zua, nanai gigab nangkuraham barau bi gin.'' ¹² Ini sagat nkiti gabuan gan ingka sugabuan i garam harih, rungan awah gigab nangkuraham barau bi garam anai." ¹³ Kurinai gikua kuri narun gan giba i Yisu yangan i yakab bangkian i kurinai ingka yayu i kurinai, ka kuri gan gikua kurinai pias. ¹⁴ Ka gubuak Yisu rarab kuri gan gab nangku raham anai, rungan sampan kukuap i kuri gan in ginia kurinai, "Wangkiti kuri narun naba i zi, agam wangkiti nting kurinai, i aus, Anutu Parat raham gan nanai kuri wi mpai su kuri narun gan. ¹⁵ Nizun bingan zi ginia wat agam, "Garamsagat ma mpai su kuri narun, nanai kurinai ma gisangk yakatang i Parat Raham Anutu gan amuk." ¹⁶ Rungan gikua kuri narun in gigab i bangkian gan ingka gikab nuguan i kurinai, ingka rungan gikab bangkian hahuan i kurinai in giyu i kurinai. ¹⁷ Gubuak Yisu ini wat kuri gan yabanua gayang, garam basinta giruant giba i Yisu in gagantu hagan nugun bi gin ingka gakantui gin, "Kidungwaga mimungk, zi yasu aus in yangan zi yakua maratak mpai mimungk gubuak ka gubuak?" ¹⁸ Ingka Yisu gisuntai gin i hup gan gisuni, "I aus in agua ginia zi Kidungwaga mimungk, ma garam mangan i kitamp ani rungan mimungk gamuk, Anutu basinta tak nanai mimungk. ¹⁹ Agua ru gararab butua sib, 'Wangkiti zumir garam mampayang, ka wangkiti gab nangkuraham barau, ka wangkiti paginab garam hiruk wah gan, ka wangkiti nia hup santan rugan ka hup zuhup ayang, agua wayangua hup Ramangk rinangk gam gan tak. ²⁰ Ka garan anai ginia wat Yisu gisuni, "Kidungwaga, zi garagia butua ganai sib gubuak zi mpai narun." ²¹ Yisu gipumaran i garam anai ingka nuguan gan i gin in ginia wat gisuni, "Agua miayah i wah basinta tak. Agua wahan zua in wasaguar wah santan agua gab ayang in wakua sakuak ingka wakab sakuak anai wat garamsagat maragayab. Ingka nanai agua yagab wah santan i ganungkun. In agua waba wasantamp izi." ²² Gubuak nanai yangua hup anai, nanai ma nuguan giyab gamuk ingka rungan sampan barabin raham in gihan, I aus, nanai gigab wah mangamangan santan. ²³ Yisu gipumaran i kuri gan in ginia wat kurinai, "Wayangua, nani barabin raham i garam gab wah marikum han katang i Parat raham Anutu gan!" ²⁴ Ingka Yisu kuri gan gayangua hup anai in kurinai gakutamirun. Ka Yisu ginia wat kurinai zua gisuni, "Narungk was, nani barabin raham i han katang i Parat raham Anutu gan. ²⁵ Nani pisit i kamel han katang i yantuik maran gan, ka nani barabin raham i garam gab sakuak ngan han katang i Parat raham Anutu gan." ²⁶ Ingka kuri gan gakutamirun i hup sunanai ingka kurinai ginia hup santan wasak i kurinai rungan gisuni, "Ini nanai suni, wi yangan yakua maratak mpai mimungk gubuak ka gubuak." ²⁷ Ingka Yisu ginik in gipumaran i kurinai ingka ginia, bi garam nanai gabuningk, ka i Anutu nanai gisangk, i aus, ma wah mangan barabin i Anutu gamuk." ²⁸ Gubuak Yisu nia hup anai sib, Pita ginia wat Yisu gisuni, "Wararab, agai sibangu gingkiti wah mangamangan santan agai gangk ingka giba gisantamp agua." ²⁹ Ka Yisu ginia, "Zi ginia nizun wat agam, ini garam mangan nkiti tagur gan, ka raingan ka nahungan ka ramangk rinangk ka gariak ka kitamp gan ka maran huar izi ingka hup mimungk izi gangk. ³⁰ Nanai yangan yakua zua wah mangamangan anai rungan nkiti gin anai, yasangk 100-gubuak rungan mpai kitamp ani. Nanai wah su tagur ingka raingk nahungk, ingka ramangkrinangk ingka gariak, wat kitamp kurinai gan, ka garamsagat bariang barabin awah i nangkuraham bumur i Anutu hup gan. Kurinai awah yangan yakua maratak mpai mimungk gubuak ka gubuak. ³¹ Gisunai in garam ingka sagat santan wi mpai tamur yangan yaba nungkayang ka wi mpai nungkayang yahan tamur." ³² Gingan Yisu kuri gan gabanua gihan Jerusalem, ingka Yisu ginungk gihan i kurinai. Yisu kuri gan gakutamirun, ingka garamsagat santamp kurinai ba gayang giguan. In Yisu gakayak i kuri gan 12-anai gihan i parat mami garam ingka ginia wat kurinai i wah aus yangan yakas i rungan. ³³ Agam wararab, gubuak agi han hahuan i Jerusalem, kuri yangan yaba yagab Garam Gariak gan in yakab i guzun pris bangkian gan ingka kidungwaga butua gan, ingka garam wayant yangan yakab i butua, in yaharu hup i yazumir Yisu yamamp ayang. ingka kurinai yangan yasaguar Yisu yahai garam hiruk ingka kurinai yangan yazumir i yamamp ayang." ³⁴ Kurinai yania hup paip ayang igin ka yahinti gahurun iayah ingka kurinai yayas ayang ingka yazumir nanai yamamp ayang, ka gingan i huguan hirukangkua basinta rungan yangan yatakirun zua." ³⁵ Jems ingka Jon hirukangkua Sebedi gariak gan, gikantui Yisu gisuni, "Kidungwaga, agai hirukangkua gini yangan agua yagab wah basinta agai hirukangkua gini yakantui agua." ³⁶ Yisu gakantui hirukangkua, "Agam hirukangkua gini yangan zi yagab wah aus i agam hirukangkua?" ³⁷ Ka hirukangkua ginia, "Wakab agai hirukangkua nampai bi agua i kurukuan agua gam, basinta i bangkian yami ingka mangan i bangkian sakias agua gam." ³⁸ In Yisu ginia wat kurinai gisuni, "Agam hirukangkua ma gararab wah aus agam hirukangkua kantui gin amuk, agam hirukangkua gisangk yanum i kumpiak zi yangan yanum iayah gani? Ma gisangk agam hirukangkua yakua mpuirurub i nangkui zi yangan yakua mpuirurub iayah gani?" ³⁹ Hirukangkua ginia wat Yisu, "Agai hirukangkua gisangk." Ka Yisu ginia wat hirukangkua gisuni, "Nanai nizun gisu agam hirukangkua gisangk yanum i kumpiak zi yangan yanum iayah ingka mpuirurub i mpui zi yangan mpuirurub. Ka mpai i Anutu bumur gan bi zi i bangkian yami ka i bangkian sakias izi gangk, nanai ma zi wah gangk gamuk. ⁴⁰ Ka i mpai i bangkian yami ka mpai i bangkian sakias izi gangk, nanai ma wah izi gangk i yakab ayang gamuk. Miayah. Ka nanai gan kuri rungan marigin sib gan kurinai yakua gayang. ⁴¹ Gubuak kuri gan hiruk 10-anai gayangua hup sunanai jems wat Jon gan, kurinai sampan kukuap in gabazamp wat hirukangkua. ⁴² Gingan Yisu gampuru kuri gan sib ingka ginia wat kurinai gisuni, "Agam gararab garam guzun wi marigin garamsagat mangan kurinai suguzun i kurinai. Ingka kurinai yabigin gan ru gisu guzun i kurinai. ⁴³ Ka agam wangkiti gab nangku raham rugan sunai, ini basinta agam gam gini yasu garam guzun wasak i agam, rungan anai yasu samuak gab gum agam gam. ⁴⁴ Ingka wi gini yampai nungk ayang i agam, rungan anai yasu samuak gab gum agam gam. ⁴⁵ Garam gariak gan ma giba gini agi gisangk yagab gum i yakab bangkian i gin amuk. Miayah. Rungan gikab maratak gan tak sib gisu sakuak rim garamsagat marikum sib bazua." ⁴⁶ Gubuak kurinai ru ba Jeriko, Yisu wat kuri gan gazagari Jeriko in gabanua gihan ingka kuampuak kuangkian gasantamp kurinai. Garam maranpuk ayang basinta, nanai Timeus gariak gan, nanai bingan gan Batimius. Rungan gimpai nangkui banging in gaparingk garamsagat i sakuak. ⁴⁷ Gubuak rungan yangua gisu nanai Yisu Nasaret gan, rungan gitakirun in gakayak raham bingan ingka ginia, "Yisu Devit gariak gan, agua wamui zi sib!" ⁴⁸ In garamsagat ginia nanai i ma gisangk yakayak ayang gamuk. Ka rungan gakayak raham bingan zua in ginia, "Yisu Devit gariak gan, agua wamui zi sib!" ⁴⁹ Anungka Yisu gayangua nanai ingka rungan gamunti in ginia, "Wakua garam maranpuk nai waba." Ingka garamsagat ginia wat, "Agua wamunti wahigut! Rungan gakayak i agua." ⁵⁰ Gahigut arutak rungan gitakirun in girim bumpungk gan gihan banging in giruant gihan i Yisu. ⁵¹ Ingka Yisu gakantui garam maranpuk anai gisuni, "Agua gini yangan zi yangan wah aus i agua." Ingka rungan ginia, "Suraham, zi gini yararab zua." ⁵² Ingka Yisu ginia wat nanai, "Wahan, bumur agua gam tak gikab agua gikas mimungk." Gahigut aru tak nanai gararab zua, ingka rungan gasantamp Yisu i nangkui gihan.