¹ Gubuak kurinai banua ba Jerusalem, kurinai giba gikas simpingk i Betpeis ingka Betani, i ngaring Oliv gan, Yisu gasaguar kuri gan hirukangkua ² Ingka ginia wat hirukangkua gisuni, "Wahan i parat ming marahain i agi. Ingka gubuak agam katang han i nanai, karunanai agam yararab donki hak basinta ma garam gimpai iayah wat mamuan amuk. In agam watirak buak kuri haru iayah ingka wakua nanai waba i zi. ³ Ini garam basinta ini niahup, 'I aus in agua gigab gisu nanai?' agua wania, 'Suraham gini yagab ayang ingka rungan yangan yasaguar anai yaba gani zua yahigut ayang."' ⁴ Ingka kurinai gihan in gararab donki hak basinta kuri haru i parat pisit i masiahuan i nangkui raham, ingka hirukangkua gatirak buak sibi gin. ⁵ Garamsagat hiruk gamunti ganai in kurinai gakantui kuri ganai gisuni, "Agam hirukangkua gingan aus, in gatirak buak sibi donki hak ragai?" ⁶ Hirukangkua ginia wat kurinai hup su karu nanai gisu Yisu niawat kuri gan i yania gayang, ingka garamsagat anai gazagari kurinai gihan. ⁷ Kuri gan hirukangkua gikua donki hak giba Yisu ingka kuri gan girim bumpungk gan hahuan i donki i Yisu yampai aiyah. ⁸ Garamsagat marikum gikua bumpungk gan in gayahus i nangkui ka kuri hiruk garaya gai bangkia i wap in gayahus i nangkui. ⁹ Ingka garamsagat wi han nungkayang igin ka ba kirikian igin gakayak raham gisuni, "Hosanna! Garam wi kua wah mimungk, rungan garam wi ba i Suraham bingan gan. ¹⁰ Suraham ginia hup i parat raham agi rumpungk gangk Devit gan, rungan ru giba karuni! Hosanna gihan wagungk!" ¹¹ Gingan Yisu gihan gakatang i Jerusalem ingka gihan wasak i parat abingk tagur Anutu gan miayah ingka rungan gararab gihan i wah santan. Karunanai ru simpingk i yamikuan ayang ingka rungan wat kuri gan 12-anai gihan Betani, ¹² Gingan huguan mangan, gubuak kurinai zagari Betani gin han ayang, Yisu marimp. ¹³ Rungan gararab gai fik munti tamanak in rungan gararab yahat tak. Gisunai in rungan gihan gini yararab ini nanai fik gar hiruk min ayang iayah. Gubuak rungan ba i nanai, rungan gararab yahat tak, i aus nanai ma gubuak gan kurinai kab gariak gamuk. ¹⁴ Rungan ginia hup igin gisuni, ma garam mangan yangan yagan agua gar gam zua gamuk." Ingka kuri gan gayangua wah aus rungan nia hup i gin. ¹⁵ Kurinai giba Jerusalem, ingka rungan gihan gakatang i tagur sunta. Ingka rungan gikupias garam ru saguar ka kab sakuak i kua wah i tagur sunta. Ka rungan gatawab rampia garam hiruk gan ru kab sakuak han bagayang ka rampia garam saguar gaziab gan. ¹⁶ Rungan ma gazagari garam mangan i yakua wah mangan saguar ayang yahan yakatang i tagur sunta gamuk. ¹⁷ Rungan ginia hagahagan wat kurinai in ginia, "Kuri gahahar gisuni, zi tagur gangk kuri yangan yania yasuni tagur yugayang gan i parat sib. Ka agam gigab anai gikas gisu tagur garam bangki pinab gan." ¹⁸ Guzun pris ingka kuri hahar hup bumur gayangua ganai ingka kurinai gagarui nangkui basinta i yazumir Yisu. Kurinai giguan igin i aus garamsagat huangk binai gakutamirun raham i wah rungan nia hagahagan wat kurinai. ¹⁹ I mikuan bagayang gan, kurinai gazagari parat raham in gihan. ²⁰ Mara huguan kus kurinai banua han ayang, kurinai gararab gai fik mamp sib i bangkian han buamp i hugun gan. ²¹ Pita maran gihuar in ginia, "Kidungwaga, wararab! gai aru agua nia gayang anai rungan gimamp sib." ²² Ingka Yisu gisuntai kurinai hup gan gisuni, agam wakab bumur gam i Anutu. ²³ Nizun bingan zi ginia wat agam garam wi nia wat ngaring ani suni, watakirum warim rungam nahan wasak i mpui nkiak,' ingka nanai yangan ma gisangk sampan hirukangkua i bumur gisu wah aus rungan nia hup i nanai yangan yakas ayang, nanai Anutu yangan yagab ayang. ²⁴ Gisunai in zi ginia wat agua, wah mangamangan santan agua yu in kantui i gin, bumur gisu agua ru kua gayang ingka nanai yangan yakas ayang. ²⁵ Gubuak agua munti gin yu gayang, agua wakupias mais mangan gan, wi gab su mais i agua, gisunai in Ramangk agam gam wi mpai ganungkun awah yangan yakupias mais agua gam. ^{26 27} Kurinai Giba Jerusalem zuah. Gubuak Yisu banua wasak i tagur sunta, guzun pris, garam kakar hup bumur ingka garam guzun giba i gin. ²⁸ Kurinai ginia wat Yisu gisuni, "Agua gigab wah sunani i wi kurukuan gan, ingka wi gikab kurukuan wat agua i gab wah mangamangan?" ²⁹ Yisu ginia wat kurinai gisuni, "Zi yakantui agam kantui gin basinta. Wania wat izi ingka zi yania wat agam i zi gikua kurukuan i abingk in zi gigab wah sunani. ³⁰ Jon mpuirurub gan, nanai gimin ganungkun giba ma i garam? Wasuntai zi hup gangk." ³¹ Kurinai ginia hup ingka hup yasrun wasak i kurinai rungan ingka ginia gisuni, "Ini agi nia, 'I ganungkun' nanai yania, 'I aus in agam ma bumur izi gamuk?' ³² Ka ini agi nia, 'I garam'" kurinai giguan i garamsagat, i aus, garamsagat sib bumur gisu Jon anai propet mangan. ³³ Gisunai in kurinai gisuntai Yisu ingka ginia, "Agai ma gararab gamuk." In Yisu ginia wat kurinai gisuni, "Zi gawah zi ma gisangk i yania wat agam, i kurukuan wi gan zi gigab wah mangamangan nani."