¹ Yisu ginungk ginia hagahagan wat kurinai i hup ram ayang. Rungan ginia wat kurinai gisuni, "Garam basinta gintang wain i gum, rungan gipu butua gawahik gum wain anai, ka girah suah gini yamari parat yagab ka yakua wain. Rungan gisuang tagur basinta wat garam rarab ayang i yampai yararab gum wain ka gikab i gihan i kuri yampai yamari gum wain i gan. Ka rungan gihan mangan. ² Gubuak kua wain gar giba, rungan gasaguar samuak gab gum basinta gihan i garam mpai sib gum wain in gikua wain gar hiruk. ³ Ka kurinai gigab anai, giyas nanai, ingka gasaguar i gihan zua bangki sasak ⁴ Rungan gasaguar samuak gab gum gan mangan gihan i kurinai, gubuak mangan zua kurinai giyas i guzun gan gipuk ka kurinai gisu mais iayah ka gikab rini maik igin. ⁵ Rungan gasaguar mangan zua gihan, ingka kurinai gazumir garam anai gimamp. Kurinai gisu mais i santan mangan garagia nangku raham su karunanai, giyas hiruk kurinai gan ka gazumir hiruk gimamp. ⁶ Rungan gigab garam basinta yasaguar i yahan ayang, nanai gariak gan, kab i nuguan gan. Karunanai tak anai garam bampan yasaguar i yahan i kurinai. Rungan ginia gisuni, "Kurinai yangan yaringanti zi gariak marub gangk hup gan." ⁷ Ka kuri mpai gum wain sib gitip hup wasak i rungan gisuni, "Garam aruni yangan yakua wah mangamangan Ramangk gan gan. Agam waba, in agi nazumir nanai, sakuak sib wat wah mangamangan mimungk i gan agi yakua gayang. ⁸ Kuri gigab, gazumir in girimuab i gihan sibi gum wain. ⁹ Gisunai in, ramangk gum wain gan yagab aus karuni? Rungan yangan yaba gin yawaya garam mpai sib gum wain ingka yakab gum wain anai yahan i garam hiruk. ¹⁰ Agam ma gararab hup min i mamin sap Anutu gan ani gamuk ahin ma miayah? Sakuak abingk garam suang tagur gikua pias, nanai bumur hugun ka mimungk i suang tagur iayah. ¹¹ Hup anai rungan giba i Suraham, ka nanai mimungk arumangan i agi marang gangk.'" ¹² Kurinai wayant i yakab Yisu i rumuang wasak, ka kurinai giguan i garamsagat marikum mpai ayang, i aus kurinai gararab gisu Yisu kab hup ram ayang wat kurinai. Gisunai in kurinai gazagari Yisu gin gihan. ¹³ Ingka garam yabigin gasaguar Farisi hiruk ingka Herot kuri gan hiruk giba i Yisu, kurinai gini yazuhup wat in yania hup hiruk ma mimungk gamuk. ¹⁴ I kurinai ba gayang, kurinai ginia wat Yisu gisuni, "Kidungwaga, agai gararab gisuni agua garam nia hup i pisit, in agua ma gisu nuguam i garam basinta tak gamuk miayah, su nuguam agua gam gimin wasak i garamsagat marikum. Nizun bingan agua ginia hagahagan wat garamsagat i nangkuraham Anutu gan. Nani mimungk i kab takis wat Sisa, ma miayah? "Yangan agai yakab sakuak ma miayah?" ¹⁵ Ka Yisu gikua kurinai wayant gan zuhup ayang ingka rungan ginia wat kurinai gisuni, "Gisu aus in agam gini yazuhup wat izi? Wakua sakuak basinta waba gin zi nararab." ¹⁶ Gisunai in kuri gikua siring basinta gibai Yisu. Rungan ginia wat kurinai gisuni, "Nani mara ganun wi gan i siring ani ingka wi bingan gan gimin i nanai?" Kuri ginia, "Sisa." ¹⁷ Ingka Yisu ginia wat kurinai, "Wakab wat Sisa wah aus Sisa gan, ka wakab wat Anutu, wah aus Anutu gan." Ingka kurinai gabuzuru hantab igin i hup gan. ¹⁸ Anungka Sadusi giba i Yisu, kuri wi nia sunani takirun zua miayah. Kurinai gikantui Yisu, in ginia, ¹⁹ "Kidungwaga, Moses gahahar hup ani ginungk giba i agai, 'I rabuang gan basinta mamp ayang ingka zagari hingian gan mpai ayang, ka mami kab gariak, ingka garam mamp ayang anai raingan yakua sagat anai in yahuar ayang, ingka yangan yakab rabuang gan gariak was gan. ²⁰ Gikab raingk rabuangk 7-anai gimpai, rabuan raham gihuar sagat basinta ingka gingan nanai gimamp, ingka ma gikab gariak gamuk. ²¹ Ingka ra in gihuar rabuan hinian ingka gimamp awah, ma gikab gariak gamuk. Gisu karunanai i ra in wasak. ²² Ka 7-anai gimamp sib ma gikab gariak gamuk. Ka gingan sagat anai awah gimamp. ²³ I takirun zua, gubuak kurinai takirun zua, nanai yangan sagat wi gan nizun? I aus ra in was 7-anai gihuar sagat anai gisu kurinai hingian gan." ²⁴ Yisu ginia wat kurinai gisuni, i nangku raham su karunanai agam gigab mais, i aus agam ma wayant i hup min mamin sap Anutu gan ka Anutu kurukuan gan awah? ²⁵ I aus gubuak kurinai takirun zua i mamp ayang, kurinai yangan ma gisangk yahuar sagat zua gamuk, Miayah. Ka kurinai yangan yampai yasu angira i ganungkun. ²⁶ Ka i hup aru garam mamp in takirun zua gani, agam ma gararab mamin sap Moses gan gamuk ahin, i niahup wap gan, i wah aus Anutu niahup wat anai in ginia, 'Zi Anutu Abraham gan, Anutu Aisak gan, ingka Anutu Jekop gan?' ²⁷ Rungan ma Anutu garam mamp ayang gan gamuk, ka Anutu garam mpai maratak gan. Agam garam nia hup hanta bahub." ²⁸ Garam wayant yas ayang basinta hahar butua giba in gayangua kurinai hup gan, nanai gararab gisu Yisu suntai kurinai hup gan mimungk. In nanai gakantui Yisu gisuni, Anutu butua gan aus nanai mimungk i hiruk sib?" ²⁹ Yisu gisuntai gin in ginia, "Isrel wayangua, Suraham Anutu nanai basinta tak. ³⁰ Agam wakab nuguang gam i Suraham, Anutu agi gangk wat agam sampam gam sib, wat agam ganun gam sib, wat agam wayant gangk sib, ingka wat agam kurukuan gan sib.' ³¹ Ka santamp igin gan Anutu butua gan gisuni, "Agua wakab nuguan gam i garamsagat mpai simpingk bi agua gisu agua nuguam i rungam.' Anutu butua gan hiruk ma raham gimin gisu nani gan gamuk." ³² Anungka garam wayant yas i hahar butua ginia gisuni, "Mimungk, Kidungwaga! Agua ginia nizun bingan gisu Anutu ganai basinta tak, ingka gisu karunanai ma mangan gimpai simpingk bi gin gamuk. ³³ I nuguan gam i nanai i sampan gam sib, ingka wat wayant gam sib, ingka wat kurukuan sib, ingka i nuguan i wi mpai simpingk bi agua gisu agua nuguan i rungam, nani hup hirukangkua ganai ru raham in ma gisu ofa santan kati sib i zah gamuk. ³⁴ Gubuak Yisu gararab gisu nanai gikab hup mimungk gisu garam kua wayant mimungk nizun, Yisu ginia wat nanai gisuni, "Agua ma gimpai tamanak i Anutu Parat raham gan gamuk." I gubuak arunanai garam ma ru gakantui gin i hup hiruk i Yisu gamuk i aus kurinai giguan. ³⁵ Gubuak Yisu kapiri hup wat garam sagat wasak i tagur sunta, in rungan gisuntai hup kurinai gan in ginia, "Gisu aus in garam wayant hahar butua gan ginia gisu Kirisi ganai Devit gariak marub gan? ³⁶ Ganun mimungk gimpai gumpin i Devit, in nanai ginia gisuni, 'Suraham ginia wat Suraham izi gangk gisuni, wampai i bangkian yami zi gangk, yahan yasangk zi gab buman agua gam mpai agua hagan ragurun gam. ³⁷ Devit basinta tak ginia Kirisi, 'Suraham' gisu aus in nanai yasu gariak marub Devit gan?" Kuampuak kuangian gayangua Yisu hup gan wat sampan nuhayang. ³⁸ Yisu ginia hagahagan wat garamsagat ingka ginia gisuni, "Manangk i garam wayant butua gan, wi nuguan mimungk i gagar bumpungk piar in banua gayang, ingka garamsagat niahup sampan mimungk wat kurinai i parat wasak saguar nam ka kua sakuak, ³⁹ ingka kurinai nuguan i yampai i rampia mimungk i tagur sunta wasak, ingka yampai i rampia mimungk i gubuak mpururun raham i gan nam. ⁴⁰ Ka kurinai awah gawaya tagur sagat muant gan, ingka kurinai gigab yu gayang bam pam piar i garamsagat gisangk yararab ayang. Kurinai yangan yakua barabin raham bingan." ⁴¹ Gingan, Yisu gimpai bi ha in abingk sakuak kambih min aiyah wasak i tagur sunta; rungan ru gararab garamsagat ba ini yakab sakuak yahan wasak i kambih. Ka garam mimungk santan giba gikab sakuak raharaham. ⁴² Gingan sagat maragayab basinta gabuan mamp ayang giba girim siring hirukangkua gihan wasak, gisangk gisu siring basinta. ⁴³ Yisu gakayak i kuri gan giba gampurun ingka ginia wat kurinai gisuni, "Nizun bingan zi ginia wat agam, sagat maragayab gabuan gan mamp ayang aruni gikab sakuak raham in ginus sib garamsagat wi mpuru sakuak han i sakuak kambih tagur sunta gan. ⁴⁴ Garamsagat anai gan sib gikab sakuak marikum i aus kurinai gigab sakuak raham, i sagat muant aruni, nanai ma gigab sakuak marikum gamuk, ka rungan gikab sakuak gan sib in rungan ma gigab sakuak gimin i yakua wah iayah gamuk.