¹ Gubuak Yisu zagari tagur sunta in banua han ayang, kuri gan basinta ginia nanai gisuni, "Kidungwaga, waguri sakuak mimungk arumangan ragai ka tagur mimungk ragai!" ² Yisu ginia nanai, "Agua gararab tagur raham ani? Sakuak basinta ma yami hahuan i sakuak mangan gamuk. Sakuak sib yangan hirihiri yaba buamp." ³ Gubuak Yisu mpai ngaring Oliv, abingk min marahain tagur sunta gan, Pita, Jems, Jon ingka Andru gakantui gin. ⁴ Wania wat agai, gubuak aus yangan wah anai yakas ayang? Nguar su aus yangan yakas i yakapiri agai gisu wah su nanai yangan yakas ayang?" ⁵ Yisu ginungk i nia wat kurinai," Agam manangk. Garam basinta kangan kakua agam kahan nangkui mangan. ⁶ Garam santan yaba izi bingan gangk in yania, 'Zi Kirisi,' ingka kurinai yagabi garamsagat yahan i nangkui rugan. ⁷ Gubuak agam yangua gagaingk raham yasrun kas ayang ma hup mamup yasrun raham, agam wangkiti nuguam pumpu. Wah su nanai yakas yaba gayang, ka kitamp zugub ayang gan mungkua. ⁸ Ka garamsagat parat basinta yayas run wat garamsagat parat mangan ingka parat raham basinta wat parat raham mangan. Ka hahuriangk raha raham yakas i parat santan mungkak abingk ingka gubuak marimp raham gan yakas ayang. Wah su nanai anai gisu kukuap sagat nungk kua gayang i gubuak yakua gariak. ⁹ Agam wararab simpim. Kuri yakab agam yaha i kaunsel bangkian in kurinai yayas agam i tagur sunta wasak. I zi kurinai yakab agam i butua ka agam yamunti gavana maran ingka king maran, in agam gisangk yania zi harab. ¹⁰ Ka marasamub i wah mangamangan anai, gum nia harab hup mimungk nanungk nahai garamsagat kitamp sib. ¹¹ Gubuak kurinai gab agam raguan ingka saguar agam han ayang, agam wangkiti nuguam mpumpu ka wayant santan i hup rugan su aus yangan agam yania gayang. I gubuak maran aru nanai, hup rugan su aus agua yangan yania gayang, Anutu yangan yakab wat agua. Ka nanai agam ma yangan yania hup gamuk, i Ganun Mimungk yania hup. ¹² Rabuan yagab raingan raguan in yakab wat garam yazumir i yamamp ayang, ingka Ramangk basinta yagab su karunanai wat gariak gan. Gariak was yasu buman i raman rinan gan in yangan yagab kurinai yamamp ayang. ¹³ Garam ingka sagat sib nanai ma gisangk nuguan i agam i aus agam bumur i zi bingan gangk. Ka garamsagat wi munti bumur in gab sisib bumur han i kitamp zugub ayang, garam arunai yangan yampai mimungk. ¹⁴ Gubuac agam rarab wah mais yagab barabin yaba gayang munti i parat abingk nanai ma gisangk i yamunti i nanai gamuk (Wakab garam rarab anai yakua wayant), garamsagat wi mpai Judia kurinai naruant nahan ngaring, ¹⁵ Wakab garam wi mpai hahuan i tagur ngisung nangkiti ba buamp wasak i tagur ma kua wah mangan han kas ayang, ¹⁶ Ka garam wi mpai gum, rungan nangkiti han zua i kua bumpungk gan. ¹⁷ Ka maragayab raham i sagakuri wi wangkun ayang ingka sagat wi kab ntut wat garikakak i gubuak aru nanai! ¹⁸ Agam wayu gisu wah anai nangkiti kas wat gubuak gamiak ka nuh. ¹⁹ I aus buman yakab kukuap raham ka barabin wat garamsagat. Barabin rugan abingk su nanai ma gikas wat mamuan gamuk i gubuak Anutu kab kitamp ani giba gisangk karunani. Barabin wat kukuap rugan mangan sunanai ma gisangk yangan yakas tamur zua gamuk. ²⁰ Ka Anutu mami kab gubuak sutup, garamsagat basu miayah sib. Ka Suraham maran gihuar garamsagat wi rungan tak kabayang, gisunai in rungan gikab gubuak gisu tup. ²¹ Ini garam basinta nia wat agam sunani, 'Wararab, Kirisi gimpai ani! ma 'Wararab, rungan gimpai bi gaba!' agam wangkiti bumur i hup sunanai. ²² I aus Kirisi zuhup ayang ingka propet zuhup ayang yangan yakas paratpisit in yakab nguar ka marahahiang i yazuhup wat garamsagat, ka ini kurinai sangk ayang, nanai kurinai yazuhup wat garamsagat Anutu ru kab ayang gan. ²³ Agam waguri simpim. Tamur anai wah sunanai yangan yakas yasu zi niawat agam karunani. ²⁴ Ka tamur i barabin anai kas ayang i gubuak aru nanai, gubuak yakining igin yasu mikuan ka ikap anai ma gisangk i yakab pisit gamuk, ²⁵ Ka wantuang yapuruk yaba buamp i gabagah ingka kurukuan mpai ganungkun sib yaguin nirun. ²⁶ Ingka tamur kuri yangan yararab garam gariak gan yaba i gabagah wat kurukuan raham ka bingan raham. ²⁷ Ka rungan yangan yasaguar angira gan ingka rungan yampuru garamsagat gan yaba i 4-ganai kitamp mungkak, yanungk i kitamp zugub ayang gan yahan yasangk i ganungkun zugub ayang gan. ²⁸ Agam wakua wayant i maraganun gai fik gan. gubuak gai fik bangkian harih, rungan gikab yahat harih in agam wayant gisu nanai gubuak mimungk gubuak gini yakas yaba simpingk. ²⁹ Su karu nanai tak, gubuak agam rarab wah sunanai ru kasayang, agam wayant wasuni nanai ru gimpai simpingk, simpingk arumangan i masiahuan. ³⁰ Nizun bingan zi ginia wat agam, garamsagat mpai karuni kurinai yangan ma gisangk yamamp yasangk wah mangamangan anai kasayang. ³¹ Ganungkun ingka kitamp yasu miayah, ka zi hup gangk ma gisangk yasu miayah gamuk. ³² Ka garam mangan ma wayant i gubuak ka gubuak maran Garam Gariakan ba zua. Angira ganungkun ka Anutu Gariakan awah ma wayant i gubuak ka gubuak maran. Ramangk Anutu tak nanai rungan wayant igin. ³³ Agam wamari rungan in wampai wararab! I aus agam ma wayant i gubuak aus yangan wah sunanai yangan yakas ayang. ³⁴ Nanai gisu garam basinta gini yahan parat tamanak ingka rungan gazagari tagur gan in gikab wat garam gab gum i yamari tagur. Rungan gikab gum wat garam gab gum basinta sinta ingka rungan gikab hup bumur wat garam mpai masiahuan i yaguri simpim. ³⁵ Gisunai in agam wampai in wararab, i aus agam ma wayant i gubuak aus tagur Ramangk gan yangan yaba gayang. rungan yangan yaba wat hirah ahin, ma i mikuan wasak tariak niahup, ma i marahuguan kush. ³⁶ Ini rungan ba higut ayang, wangkiti nkiti gin i rungan rarab agua ru giangk ayang. ³⁷ Hup aus zi ginia wat agam karuni, nanai zi ginia garamsagat sibangu gawah. Agam sib wampai in wararab simpim.