¹ Karunani nanai huguan hirukangkua mungkua i tampan yakas ayang ingka mpururun raham yist miayah i ganang. Guzun pris ingka garam wayant hup bumur gan gaharu hup gini yagab Yisu, ingka yazumir i yamamp ayang. ² Kurinai ginia gisuni, "Nanai ma gisangk yakas i gubuak mpururun raham gan i aus garamsagat ma gisangk yania run yayas run wasak i rungan gamuk." ³ Gubuak Yisu mpai Betani i Saimon tagur gan wi kua rinimais suruh. Rungan gimpai gasap i rampia, in sagat basinta giba i gin wat wel sanda mimungk arumangan. sagat gakari sanum maran ingka garurub Yisu guzun. ⁴ Ka garam hiruk sampan kukuap, kurinai ginia hup wasak i rungan gisuni, "Aus hugun nanai sagat gatawa wel sanda gani tak?" ⁵ Wel sanda gani nanai gisangk i basaguar i 300 sakuak siring ingka bakab wat garamsagat maragayab." Anungka kurinai ginia sagat arunai. ⁶ In Yisu ginia wat kurinai, "Agam wazagari gin, gisu aus in agam ginia hup i sagat aruni? Rungan gigab nangkui mimungk i zi. ⁷ Gubuak sibangu agam gigab maragayab garamsagat gimpai bi agam. Gubuak suaus agam gini yamari kurinai ka yasu mimungk i kurinai yangan agam yagab ayang. I agam anai ma gisangk yampai bi zi gubuak sibangu gamuk." ⁸ Sagat aruni gigab wah suaus rungan gisangk yagab ayang. Rungan gikab wel i zi rining gangk i yakab izi mamp ayang gangk. ⁹ Nizun bingan zi ginia wat agam, abingka i kitamp ani kuri yania hup mimungk harab kuri yania harab nangkui sagat aruni gab ayang ingka kuri maran yahuar ayang." ¹⁰ Gingan Yudas Iskariot nanai disaipel 12-anai basinta gan wi yakab kirikian wat Yisu in giha i guzunpris i rungan yasaguar Yisu yahan i kurinai bangkian. ¹¹ Gubuak guzunpris yangua Yudas, kurinai nuguan mimungk in gihuhup i yakab sakuak wat Yudas. In Yudas gikab maran i gubuak mimungk suaus yangan rungan yasaguar Yisu yahan i kurinai bangkian. ¹² I huguan basinta yist miayah i ganang, gubuak kurinai gakati sipsip gariak gisu ofa i tampan, Yisu kuri gan ginia wat Yisu, "Agua gini yangan agai yahan abingk in yamari parat agua yagan ganang tampan anai?" ¹³ Yisu gasaguar kuri gan hiruk kangkua in ginia wat kurinai, "Agam wahan wakatang i parat raham ingka garam basinta yangan yabariang mpui sanum raham yangan yatur agam. Anungk agam wagab wasantamp anai. ¹⁴ Tagur suaus garam anai han katang iayah, agam wasantamp anai wahan wakatang ingka wania hup wat garam tagur hugun. Kidungwaga agai gangk ginia, 'Tagur wasak izi gangk gimi abingk yagan zi yagan tampan bi kuri zi gangk?' ¹⁵ Garam anai yangan yakapiri agam wasak raham min hahuan i tagur abingk ru mari gin sib. Agam wamari agi tampan gangk i bi nanai." ¹⁶ Kuri gan gihan parat raham ingka kurinai gararab wah mangamangan gisu Yisu niawat kurinai, ingka kurinai gamari ganang kiruak tampan. ¹⁷ I gubuak giruk, Yisu wat kuri gan giba. ¹⁸ Kurinai gimpai i rampia gin gigan, ingka Yisu ginia wat kurinai gisuni, "Nizun bingan, zi ginia wat agam basinta i agam wi gan ganang bi zi yangan yasaguar izi yahan i buman bangkian gan." ¹⁹ Kurinai sib sampan girang, ingka kuri gan basintasinta ginia Yisu, "Ma zi gamuk, ahin?" ²⁰ Yisu gisuntai kurinai hup gan gisuni, "Nanai basinta i agam kuri zi gangk 12-anai, nanai yangan yakab ganang bi zi i kambih. ²¹ Kuri yangan yakab Garam Gariak gan yahan i buman bangkian gan gisu Anutu hup gan nia gayang igin. Ka zi sampangk girang raham i garam wi saguar Garam Gariak gan i buman bangkian gan. Nanai mimungk aru mangan i garam arunai rinangk gan ma gikab gamuk. ²² Gubuak kurinai gan ayang, Yisu gikua ganang basinta, ingka rungan giyu ingka garumpu in gikab wat kuri gan. Ingka Yisu ginia wat kurinai, "Wakua nani ganai zi rining gangk." ²³ Rungan giku kumpiak in ginia ihiharun i Anutu, ingka rungan gikab wat kuri gan in kurinai ginum. ²⁴ Yisu ginia wat kurinai gisuni, "Nani ganai buik harih hupnahuh izi gangk, buik anai gihus i garamsagat sibangu," ²⁵ Nizun bingan zi ginia wat agam gisuni, zi yangan ma gisangk yanum bi agam i gubuak mangan yasangk i gubuak zi num waingurun harih i parat raham Anutu gan. ²⁶ I kurinai rirua gahuan basinta sib, kurinai gikas gihan ngaring Oliv. ²⁷ Yisu ginia wat kuri gan, "Agam sibangu yangan yazagari zi, i aus nanai gimi i hup, 'Zi yangan yazumir garam hugun ka sipsip yangan yaruant yahan hantabahub,' ²⁸ Ka tamur i zi takirungk zua, yangan zi yanungk yahan Galili i agam." ²⁹ Pita ginia wat Yisu, "I kuri mangan zagari agua zi yangan ma gisangk yazagari agua gamuk." ³⁰ Yisu ginia wat Pita, "Nizun bingan zi ginia wat agua, i mikuan arunai marasamub tariak niahup su hirukangkua, agua yakaringan i zi bingang gangk yasu hirukangkua basinta." ³¹ Ka Pita ginia, ini zi gini wat agua yahuh yamamp ayang, zi yangan ma gisangk yania yasuni zi ma yakaringan i agua gamuk." Ingka kurinai sib ginia hup sukarunai i Yisu. ³² Kurinai giba parat kuri nia Getsemani, ingka Yisu ginia wat kuri gan, "Agam wampai ani yangan zi yahan yayu gayang." ³³ Yisu gikua Pita,Jems ingka Jon bi rungan, ingka i kurinai ba kas ayang, barabin raham bingan giba i rungan. ³⁴ Yisu ginia wat kurinai gisuni, zi rining gangk barabin raham bingan gisangk i karuni zi yamamp ayang. Agam wampai ani ingka wakab maram simpim." ³⁵ Yisu gihan tamanak bis i kurinai ingka rungan gihan gapuruk kitamp. Ingka giyu i Anutu ini nanai simpim gubuak mais anai gisangk yatamp anai. ³⁶ Yisu giyu gisuni, "Ramangk Anutu, wah sibangu gisangk yakas i nuguan Agua gam. Wakua pias kumpiak ani sibi zi, ka i ma zi nuguangk gangk gamuk ka agua nuguang gam. ³⁷ Yisu giba zua in gararab kuri gan giangk ayang, rungan ginia Pita, "Saimon, agua ru gigiangk? Agua gisangk yatakirum in yararab ayang gubuak maran basinta? ³⁸ Agam wararab in wayu, in yangan agam ma yapuruk i kirib ayang gamuk. Ganun anai simpim, ka rinin anai ma nuguan gamuk." ³⁹ gubuak mangan zua Yisu gihan in giyu, ingka rungan ginia hup sukarunanai wat kurinai. ⁴⁰ Ka i gubuak mangan zua, Yisu gararab kuri gan giangk ayang. Kurinai maran barabin in kurinai ma wayant i kurinai yangan yania hup aus igin. ⁴¹ Hirukangkua basinta zua, Yisu giba gin ginia wat kurinai gisuni, "Agam gigiangk in gikua gasap i rining gam tak, ahin? Rugisangk! Gubuak maran anai rugiba. Wararab! Garam Gariak gan kuri yangan yasaguar i yahan i garam mais bangkian gan." ⁴² Agam wamunti, agi nahan. Wararab! garam wi gini yakab izi yahan i buman bangkian gan nanai ru gimpai simpingk. ⁴³ Gubuak Yisu mpai bi kuri gan in ru niahup, Judas anai kuri gan 12-anai gan basinta nanai giba gikas. Ingka garam marikum gasantamp nanai giba, kuri guzun pris ingka garam wayant butua gan ingka garam guzun. Kurinai gigab huzuk ingka gai in kurinai giba i Yisu. ⁴⁴ Garam wi yangan yakab Yisu yahan i buman bangkian, nanai gikab hup gisuni, "Garam wi zi ziruh gayang, nanai anai garam agam wagab waharu in wararab ingka wakua wahan." ⁴⁵ Gubuak Judas kas i parat, gahigut arutak nanai giba i Yisu ingka ginia, "Kidungwaga," ingka nanai gaziruh Yisu. ⁴⁶ Gingan kurinai gikab bangkian gan i Yisu ingka gigab gaharu. ⁴⁷ I kuri gan basinta munti bi kurinai gitus huzuk gan ingka garaya ringan garam gabgum basinta guzun pris gan. ⁴⁸ Yisu ginia wat kurinai, Agam giba gisu agam gini yagab garam bangkipinab mangan in agam giba wat huzuk ingka gai i yagab izi? ⁴⁹ Gubuak zi mpai huguan sibangu bi agam ingka nia harab hup mimungk i tagur sunta, agam ma gigab gaharu zi gamuk. I nani gikas gisangk Anutu hup gan." ⁵⁰ Sibangu wi mpai bi Yisu kurinai gingkiti gin ingka giruant rampan. ⁵¹ Garam samuak basinta gaharu bumpungk mpiar i rining gan in rungan gasantamp Yisu gihan i gubuak buman kua Yisu hanayang. ⁵² Nanai gingkiti bumpungk mpiar gan anai ingka giruant ragi sasak gihan. ⁵³ Kurinai giku Yisu gihan i guzun pris. Sibangu guzunpris, garamguzun ingka garamwayant butua Juda gan kurinai gimpai. ⁵⁴ Ka Pita gasantamp Yisu ru tamanak bis gihan ntinting guzunpris gan. Ingka nanai gimpai hub bi garam gab garam i zaah in gimun zaah. ⁵⁵ Guzunpris ingka garam gab hup gabuningk i yagarui gagaingk zuhup ayang i yakab Yisu i butua, in yangan kurinai yazumir Yisu yamamp ayang. Ka kurinai ma gararab gagaingk mangan gamuk. ⁵⁶ Kuri ganai gan marikum gikua gagaingk zuhup ayang gini yakab Yisu i butua, ka ma basinta gagaingk anai gan wat gihuh gisu gagaingk Yisu gan gamuk. ⁵⁷ Kuri hiruk gamunti ingka ginia gagaingk zuhup ayang i yakab Yisu i butua, in kurinai ginia, ⁵⁸ "Agai gayangua Yisu ginia gisuni, "Zi yangan yayas tagur sunta garam gab i bangkian ragai hub, ka i huguan hirukangkua basinta zi yangan yagab tagur sunta kuri bangkian mami gabayang."' ⁵⁹ Ka kurinai ginia hup mangamangan, gagaingk kurinai gan ma gihuh gisu gagaingk mimungk Yisu gan gamuk. ⁶⁰ Ka guzun pris gamunti wasak i kurinai ingka gakantui Yisu, "Agua ma gisuntai agai hup gangk gamuk? gisu aus i hup ani kuri buzua i agua?" ⁶¹ I Yisu ma ginia hup gamuk ingka ma gisuntai hup kurinai gan gamuk. Ka i mangan zua guzun pris gakantui Yisu ingka ginia, "Agua Kirisi gahin, Anutu gariak gan?" ⁶² Yisu ginia, "Nanai zi tak, ingka agua yangan yararab Garam Gariak gan yangan yampai i bangkian yami Anutu gab kurukuan sibangu ingka yangan yaba i gabagah ganungkun." ⁶³ Guzun pris gagasiab bumpungk gan, ingka ginia, "Yangan agi ru yagarui hup rugan suaus zua?" ⁶⁴ Agam ru gayangua hup rinimaik ani sib, wah suaus yangan agam yagab ayang. Kuri sibangu gawaya Yisu gisu garam wi nia hup mais mangan yasangk i gini yamamp ayang. ⁶⁵ Hiruk gahinti gahurun i Yisu, ingka gahangka i maran gan ingka kurinai gawaya gin ingka ginia, "Wania hup propet, ingka wani harab wi giyas agua."Ingka guzun tagur gikua Yisu gin giyas. ⁶⁶ Gubuak Pita mpai warangk i haiin nanai bi guzun pris gan, sagat basinta gabgum guzunpris gan giba i gin. ⁶⁷ Sagat gararab Pita mpai banging i zaah in ru mun zaah. Ingka sagat gararab Pita simpim in ginia, "agua gawah gimpai bi Yisu Nasaret." ⁶⁸ Ka Pita gazuhup in ginia, "Zi ma gararab wah aus agua niahup i gin ragai." Gingan Pita gikas gihan parat simpingk bi masiahuan tagur gan ingka tariak ginia hup. ⁶⁹ Sagat gabgum guzunpris gan gararab Pita ingka gitip ginia harab zua wat garamsagat munti ganai ingka ginia gisuni, "Garam aruni nanai basinta kurinai gan." ⁷⁰ Ka Pita gazuhup zua ingka ginia zua gisuni, "Zi ma gararab Yisu gamuk." Gingan sutup arumangan garam munti binai ginia Pita gisuni," Nizun bingan agua basinta kurinai gan, i aus agua gawah Galili gan." ⁷¹ Ka Pita ginia hup santan i yawaya rungan ingka ginia hup yasu nizun gisuni, "Zi ma gararab garam aru ragai agam niahup i gin gamuk." ⁷² Ka gahigut tariak niahup zua su hirukangkua. Gingan, Pita maran gihuar wah suaus Yisu niawat anai, "Tamur i tariak niahup hirukangkua i, agua yangan yania zi ma gararab agua gamuk hirukangkua basinta." Ingka Pita girang i aus rungan gazuhup.