¹ I marahuguan kus, guzun pris gampurun bi garam guzun ingka garam wayant butua Yuda gan ingka kurinai gigab gaharu Yisu ingka gigab Yisu gihan gikab wat Pailat. ² Anungka Pailat gakantui Yisu gisuni, "Agua Suguzun Raham Yuda gan ahin?" Ingka Yisu gisuntai hup gisuni, "Agua rungam ginia." ³ Guzun pris ginia hup santan i Yisu gisubi rungan gab mais marikum. ⁴ Ingka Pailat gakantui Yisu zua gisuni, "Agua yasuntai hup ma miayah? Wayangua barabin hurahua kuri gini yagab i agua?" ⁵ Ka Yisu ma gitip gisuntai Pailat hup gan zua gamuk, ingka i nanai hugun gan, Pailat gikua wayant santan. ⁶ I gubuak raham ganangkiruak gan kasayang, Pailat gararab gikupias garam basinta mpai rumuang wasak han rininuh, gisu garamsagat kurinai nuguan gan. ⁷ Wasak i garam rapua hup ingka zumir garam wasak i rumuang wasak, gikab garam basinta gimpai kuri ginia nanai Barabas. ⁸ Kuampuak kuangian giba i Pailat ingka gakantui gin i rungan yagab wah aus anai yasu rungan gab wat mamuan. ⁹ Pailàt gisuntai hup kurinai gan gisuni, "Agam gini yangan zi yazagari Garam Guzun Raham Yuda gan yabiak i agam?" ¹⁰ Zi gararab i sampan mais guzunpris gan i aus kurinai gikab Yisu gihai gin. ¹¹ Ka guzun pris gigab kwampuak kuangian gakayak raham i kurinai yazagari Barabas yahan rininuh. ¹² Pailat gisuntai hup zua ingka ginia gisuni, "Ka agam gini yangan zi yagab aus i Garam Guzun Raham Yuda gan?" ¹³ Ingka kurinai gakayak raham bingan zua gisuni, wayas bin i Yisu i gaimpariruan." ¹⁴ Pailat gisuntai hup wat kurinai gisuni, "Rungan gigab aus mais?" Ka kuri gakayak raham bingan in ginia wayas bin i Yisu i gaimpariruan." ¹⁵ Pailat gini gisangk i garamsagat nuguan gan gisunai in rungan gazagari Barabas gihai kurinai. Rungan gazagari garam gan yas garam gitab Yisu ingka gingan rungan gikab Yisu gihan yangan kuri yayas bin i Yisu i gaimpariruan. ¹⁶ Garam yas garam gikua Yisu gihan wasak butua gavman gan ingka garam yas garam marikum gasantamp Yisu. ¹⁷ Kurinai gikab bumpungk ganang ngarak i Yisu ingka gimbib buak binbin gisu Garam Guzun Raham guntuh gayang in gikab i Yisu guzun. ¹⁸ Kurinai ginia hup rinimaik i Yisu in ginia, "Garam Guzun Yuda gan!" ¹⁹ Kurinai giyas i guzun gan, ingka gahinti gahurun i Yisu, gagantu haganugun in gazuhup gigab sunta i gin. ²⁰ Gingan i kurinai niahup rinimaik i Yisu, kurinai gisup bumpungk ganang ngarak pias sibigin ingka kurinai gikab i bumpungk gan mamuan wat i gagar, ingka gikua Yisu gihan i yayas bin i Yisu i gaimpariruan. ²¹ Garam mangan, nanai Saimon sairini gan, Aleksendra ingka Rafas Ramangk gan. Kurinai gigab anai i yabariang gaimpariruan. ²² Garam yas garam gikua Yisu gihan parat mangan kuri nia Golgata. Hugun gan gisunani, "Parat garam guzun kurukuan gan." ²³ Kuri gikab waingurun gab abi mir, ka Yisu ma ginum gamuk. ²⁴ Gingan i kurinai yas bin i Yisu i gaimpariruan, kurinai gagasiab i bumpungk gan ingka gapaip satu i yakua haiin basinta sinta. ²⁵ I gubuak maran 9 marahuguan, garam gatugu Yisu hantab i gaimpariruan. ²⁶ I gai tup basinta, garam gahahar hup i Yisu gisuni, "Garam Guzun Raham Yuda gan." ²⁷ Bi Yisu, garam gatugu hantab garam bangkipinab hirukangkua, basinta i bangkian yami ingka mangan i bangkian sakias. ^{28 29} Kuri wi han ba ganai ginia hup rinimaik i Yisu in ginia, "Ma! agua karunanai ginia yangan agua yais tagur sunta hub ingka yakab zua wasak i gubuak hirukangkua basinta. ³⁰ Agua rungam wakab bangkiam i rungan in waba buamp sibi gaimpariruan!" ³¹ I nangkuraham rugan sukaru nanai,guzunpris ingka garam wayant butua gan ginia hup rinimaik i Yisu in ginia, Rungan gimari kuri hiruk, ka rungan ma gisangk i yakab bangkian i rungan gamuk. ³² Wakab Kirisi, Garam Guzun Raham Isrel gan, i naba buamp sibi gaimpariruan ingka yangan agai awah gisangk yararab ingka bumur." Garam bangkipinab hirukangkua i gaimpariruan awah ginia hup rinimaik i gin. ³³ I gubuak maran wasak, kamikuan raham gahumpun kitamp giha gisangk gubuak maran 3. ³⁴ I gubuak maran 3, Yisu gakayak raham bingan gisuni, "Eli, Eli, lama sabaktani?" Hup ganai hugun gan gisunani, "Anutu zi gangk, Anutu zi gangk, i aus in agua gazagari zi?" ³⁵ Hiruk i kuri munti simpingk bi Yisu kurinai gayangua hup ganai ingka kurinai ginia, "Wararab, rungan gakayak i Elaija." ³⁶ Garam basinta giruant giba gin gikab waingurun ganingan i spans ingka gikab i gai mpiar basinta in gikab i gihai Yisu i yanum ayang, ingka ginia, "Agi nararab gini Elaija yangan yaba gin yakab bangkian i gin." ³⁷ Gingan, Yisu gakayak raham bingan ingka rungan gimamp. ³⁸ Ingka buru i tagur sunta gagasiab run i wagungk gihan warangk gihan hirukangkua. ³⁹ Ka i gubuak garam guzun garam yas garam gan gararab Yisu mamp i nangkuraham sunanai, rungan ginia harab gisuni, "Nizun bingan, nani ganai Anutu gariak gan." ⁴⁰ Ingka i bi nanai awah sagat hiruk wi munti tamanak in rarabayang. Wasak i kurinai nanai sagat Makdalin, ingka Meri, rinangk Jems mangan gan rabuangan Joses, ingka Salome. ⁴¹ Gubuak Yisu mpai Galili, kurinai gasantamp Yisu in gigab mimungk i Yisu. Ka sagakuri hiruk awah gasantamp Yisu giha Jerusalem. ⁴² Gubuak hirah ba gayang, in nanai awah huguan mari wah mangamangan i huguan mpai gasap gan, ⁴³ Yosep Arimatia gan giba gikas bi nanai. Nanai yabigin basinta kansol gan harui Parat Raham Anutu gan. Rungan gihai Pailat ingka gikantui Pailat i Yisu riningan. ⁴⁴ Pailat gabuzu ru hantab gisu Yisu ru mampayang, ingka Pailat gakantui garam guzun garam yas garam gan ini Yisu ru mampayang. ⁴⁵ I Pailat yangua hup anai gisu Yisu mampayang, i garam guzun garam yas garam gan, rungan gikab Yisu riningan gihai Yosep Arimatia gan. ⁴⁶ Yosep girim sakuak i kua buru ingka gikua Yisu riningan giba buamp sibi gaimpariruan ingka gibir rinin i buru ganai, ingka gikab i sakuak bumpui harih. Ingka gikua sakuak raham in gasanting masiahuan bumpui gan. ⁴⁷ Sagat Mekdalin ingka Sagat Joses rinangan gararab parat anai abingk garam tihun Yisu.