¹ Gingan Yesu giha gibanua parat wat taun, giha gikab hup mimung gan i parat an. 12-pela garam gan ragia gayang wat i banua gayang gan, ² hin sagat iruk wat gabanua. Sagakuri Yesu ku marapayam mais sib i gin ka giku rinimais sib i kurinai. Kurinai mangan gan Maria, kurinai gini Sagat Makdala. Yesu nungk giku 7-pela marapayam mais sib i gin. ³ Mangan anai Joana, Susana wat sagakuri iruk. Joana gabuan gan Kusa, i garam su guzun i tagur Herot an. Sagat aus anai gikab wa mangamangan wat Yesu ka garam gan ragia gayang. ⁴ I gubuak garam sagat ba wangk ayang, kurinai giba taun. Ka Yesu gini hup ram ayang mangan wat kurinai. ⁵ "Garam gab gum giha girim giri yamuan, iruk gapuruk kandaham ka iruk i kandaham banging, ka garam gintuat i hagan hin gaziab giba giga giri. ⁶ Giri iruk gapuruk hahuan i kitamp sakuk kurukuan ka mami mpui. Giri gar gitamp kutik ka gimamp. ⁷ Giri gar iruk gapuruk maragabian wasak.Ka maragabian wat gihu gintamp hin gigab giri gar anai gimamp. ⁸ Ka iruk gapuruk kitamp mimungk hin gigap giri gar santan." Gingan Yesu gini hup anai arunai, gi kayak i kurinai gisu ni, "Garam kab ringan, agu ga yangu hup simpim." ⁹ Yesu garam gan wat banua gayang gakantui gin, "Hup ram ayang anai hugun gan giha gisu aus a?" ¹⁰ Yesu gini wat kurinai gisu ni, "Anutu gikab wayant mimungk wat agam i agam yararab wa mangamangan gimi parat guap ayang Anutu gan. I garam iruk tak zi gini hup ram ayang wat kurinai, kurinai gararab anai ka ma yararab ayang amuk. Kurinai gayangua anai ka ma yararab hup hugun gan amuk. ¹¹ Yesu gini wat kuri gan ragia gayang i hup hugun gan ram ayang hin ginia. Gariak gai gar gisu hup Anutu gan. ¹² Gai gar gariak gamuruk kandaham su garam yangu hup Anutu gan ingka garam mais giba ga hukis hup i sampan gan. Garam mais wayant an, "i garam kab sampan gan nanai Anutu yakua gayang." ¹³ Gai gar gariak gamuruk kitamp sakuak, kurinai gisu yangu Anutu hup an hin giku wat sampan basinta. Hin kurinai gisu gai gar mami kab kuakian gan ruk kitamp. Kurinai gikab sampan gan gisu tup arumangan, ka barabin giba i kurinai, kurinai gamuruk i mais. ¹⁴ Gai gar gariak gamuruk wasak i buak maran, kurinai gisu garam sagat yangu Anutu hup an. Kurinai wayant gihur sampan kurinai gan ka kurinai sampan wat wayant gan gihai sakuak, wa mangamangan kitamp an. I wa mangamangan arunai giwangk i kurinai sampan ka gahukis hup Anutu gan i kurinai sampan gan. Gisu kurinai ma gabanu bumur wat Anutu. ¹⁵ Gai gar gariak gamuruk i kitamp mimungk, nanai kurinai gisu garam yangu hup Anutu gan. Giku hup arunai hin gikab i sampan gan, ka garagia hup arunai. I yaku gariak mimungk marapayam gan. ¹⁶ Yesu gini gisu ni, ma garam basinta ga mintung ja amuk ka ga humpun i gur wasak o ga humpun i giangk ayang ragurun gan. Gikab i pisit i garam santan yaguria gayang. ¹⁷ Ma wa mangan yaguap ayang amuk. Ka wa mangamangan garam humpun ayang i gubuak arunai yaba pisit. ¹⁸ Karuni agam wayangua. Ini garam mangan ku wa mangamangan sib, ingka Anutu yakab santan wat. I garam mangan wa mangamangan gan mia, Anutu ya hukis ausa i wayant agu kua gayang. ¹⁹ I gubuak arunai rinangk wat raingk was an gibai gin, gisu aus hin kurinai ma yaha simpingk i gin amuk i aus garam sagat santan wat gimpai. ²⁰ Hin kuri iruk gini wat Yesu, "Rinangk wat raingk was am ini yararab agua, hin kurinai gamunti parat." ²¹ Hin Yesu gikab hup an gihai kurinai gisu ni, "Rinangk wat raingk izi gangk, nanai garam sagat yangu hup Anutu gan hin ragia gayang." ²² Gubuak basinta Yesu wat kuri gan ga katuab i bout. Ka gini wat kurinai gisu ni, "Agi yaha mpui wak hain aba,"Hin kurinai gihan. ²³ Kurinai ru gian ka Yesu gigiangk. Mamup raham gitakirun i mpui wak, ka bout kurinai gan giwangk i mpui. Kurinai giku barabin daham. ²⁴ Yesu garam gan gihai gin hin gararab i giangk ayang, kurinai gis ata hin ginia, "Bumpum! Bumpum! agai ru bamamp!" Yesu gi takirun hin gini hup bumur gihai mamup wat mpui. Hin mamup wat mpui gimamp giruk hin ma gaguin irun amuk. ²⁵ Hin gakantui kuri gan, "Agam gikab sampan i amingka?" Kurinai ga kutumirun hin giguan, i aus hin Yesu gini hup ani, ka kurinai gakantui rungan i wasak gisu ni, "Garam aruragai wia? Gini hup bumur gihai mamup wat mpui, hin kurinai ga yangu i hup." ²⁶ Gubuak mangan Yesu wat garam gan giha gikas Gerasenes, parat arunai gimi mpui wak hain abua Galili gan. ²⁷ Gubuak Yesu gan kas ayang sib i bout, giha gitur garam mangan mpai parat raham ka marapayam mais gimpai garam anai gubuak bampampiar. Ma gagagar wa mangan ka ma gimpai tagur amuk, ru gimpai parat bumpui. ²⁸ Ka garam arunai girarab Yesu ka gi kayak hin gamuruk i Yesu hagan gan. Hin ga kayak raham ka gini hup, "Yesu, agu gini yangha aus izi, Anutu gariak an mpai wagungk? Wangkiti su mais izi!" ²⁹ I ausa Yesu gini hup bumur i marapayam mais yahai sib i garam arunai. Garam ga harui hagan bangkian gan wat buak ka gimpai sib i gin. Ini gubuak marapayam mais mpai yah, gitab buak sib. Ka marapayam mais giku giha parat garam mami mpai yah. ³⁰ Hin Yesu gakantui gin, "Agu bingan gam wia?" Ka gini hup, "Zi bingan gangk marium santan." Gini gisu ni, i ausa marapayam mais santan gimpai i sampan. ³¹ Marapayam mais ru gakantui Yesu i ma gisangk yakab kurinai yaha ngaring tagumpin amuk. ³² Simpingk i karunanai giab iruk gimpai ngaring hain hin ru gigan hin gimpai. Ka marapayam mais ru gakantui Yesu i yakab kurinai yaha wasak i giab. Yesu gikab hup mimungk gihai marapayam mais i yaha giab wasak. ³³ Hin marapayam mais gingkiti kurinai ka giha giab wasak ka giab arunai giruant giruk mpui wak, hin ginum mpui hin gimamp. ³⁴ Garam kaping giab gaguri aus i gikas a, ka kurinai giruant gian hin gini hup arab wat garam sagat mpai taun wat parat. ³⁵ Garam sagat gi yangu hup arunai ka kurinai giha girarab. Kurinai giba hin gaguri garam marapayam mais kiti gin hin gimpai simpingk i Yesu hagan gan. Gingan mimungk hin gagagar wa mangamangan gan hin gimpai. Garam sagat gaguria hin giguan daham. ³⁶ Garam gaguri Yesu ga hukis marapayam mais sib i garam karunai, kurinai ga angak i garam sagat i gubuak kurinai ba gayang gan. ³⁷ Ingka garam sagat i distrik Gerasenes giguan daham hin gini wat Yesu wangkiti kurinai hin wahan. Hin Yesu gi katuab i bout hin kurinai giha zua. ³⁸ Garam arunai Yesu hukis marapayam mais gini wat Yesu zua, "Zi garun, ini wat agu yahan ayang." Ingka Yesu gikab i gihan. Ka gini wat gisu ni, ³⁹ "Agam waha parat am hin wakab hup i wa mangamangan Anutu gikab i yararab agua." Ingka garam arunai giha zua hin gini hup arab i wa mangamangan Yesu ru ni wat. Gihan hin gini hup i parat daham. ⁴⁰ Hin a Yesu giha zua i mpui wak hain, ka garam sagat sampan ginu i kua gayang, i aus kurinai ga harui gin hin gimpai. ⁴¹ Garam mangan bingan gan Jairus, nanai garam guzun tagur sunta gan. Giba ga rubi hagan nugun i Yesu hagan hin gakantui Yesu i yahai gin i tagur an. ⁴² I ausa gariak hinam gan gini yamamp ayang. Gariak hinam gan basinta hin gubuak krisimas gan 12. Ingka Yesu gihai Jairus tagur an, hin garam marium gisagisu run hin gi ragia gihan. ⁴³ Ka sagat basinta gimpai. Sagat karunai buik an gihus gihan gisangk 12 krisimas. Rungan girim sakuak an atabahub ini yaku mimungk hin a mangan ma giba garinu i gin amuk. ⁴⁴ Sagat arunai giba i Yesu kirikian gan ka gigab Yesu wa gagar ayang. I gubuak arunanai gisu mimungk. ⁴⁵ Yesu gi kantui, "Wia gigab zi ga?" Kurinai gini mia. Ka Pita gini wat gisu ni, "Bumpum, wararab garam sagat santan giba gamungki hin gikab agu i wasak." ⁴⁶ Hin Yesu gini hup, "Zi gararab garam mangan giba gigab izi, i aus zi bumur angk iruk gitus run sib i zi hin gihan." ⁴⁷ Sagat arunai gararab rungan gisu ma yaguap ayang amuk. Gisu nanai hin gi tatarat, ingka giba ga rubi hagan nugun gan hin gikab maran giruk simpingk i Yesu. I garam sagat santan maran i gini rungan arab i aus hin i gigab Yesu. I gubuak a gab Yesu giku mimungk an. ⁴⁸ Hin Yesu gini wat gisu ni, "Gariak hinam, agu sampam gam gikab agu ru mimungk, gisu nanai hin agu ru mimungk. Waha wat sampan nu ayang. ⁴⁹ Gubuak Yesu ni hup wat sagat arunai, garam guzun mangan i Jairus tagur an giba gikas hin gini wat gisu ni, "Gariak hinam gam ru gimamp. Hin wangkiti kab sampan barabin i Yesu." ⁵⁰ I gubuak yesu yangu hup arunai, gini wat Jairus gisu ni, "Wangkiti guan ayang, wakab sampan tak, hin agu garik hinam gam yangan mimungk." ⁵¹ Yesu giha gikas i Jairus tagur an. Ma gikab garam sagat iruk giha wat amuk. Yesu giku Pita, Jon wat Jems, ramangk rinangk wat gariak an tak hin kurinai giha tagur wasak. ⁵² Ka garam sagat mpai tagur gikab sampan hin girang, ingka Yesu gini hup wat kurinai gisu ni, "Agam wangkiti rang ayang, ma gimamp amuk ru gigiangk anai." ⁵³ Ingka garam sagat girubuang i gin, i aus kurinai gararab tu mamp ayang. ⁵⁴ Yesu gigab garik hinam bangkian gan hin gikayak gisu ni, "Gariak, watakirun!" ⁵⁵ Marapayam garik hinam gan giba zua anungk a gitakirun. Hin Yesu gini wat kurinai agam wakab ganangkiruak wat. ⁵⁶ Ramangk wat rinangk gariak an gakutumirun. Hin Yesu gini hup bumur wat garam irukangkua agam wangkiti ni hup arab i wa mangamangan kas ayang ani.