¹ Daq alulin nazaq iysa iyan yaqmo Pol ya ne on mataw Juda a haiqta na gilumsihnan haqad Krais Yesus ago gamuk gibilenaiqta. Teq ya kabiy naqmo emsa mataw ya iwazim iqirquran ya bit kab tuqosaiq. ² Nabag ne yaqgo tuhuritiyta. God on mataw en ta asor Juda a haiqta nagan inaqmo gilumsihta agamukan in ya yaqgan ya gamuk wamuzad ne gibilenaiqta. ³ Gamuk na kwaziqmo ulilemim usta. Teq God eman yaqgo hib ulal iyan ya ago tuhurit. Huritim ya gamuk na asitmo naw ne gimen mar tonan ne ahol tuwaqiy. ⁴ Krais boleq on mataw en bunmo gilumsihdaqta na agamukan ulilemim usta. Teq ya ne gimen gamuk nawa na mar tonta na ne ahol waqeqta teq ya Krais ago kabiy alulin hurita kemta nazaq ne ginad tiqem has daqaymo. ⁵ Kwaziqmo God gamuk na ulileman ussa in mataw a hi gibilenyaq. Ari muran God ago Bugaw Dimunta in God ago Aposel tawonta na teq in ago nantut tawonta na gamuk ulilemabta na tigibilan. ⁶ Gamuk na kazaq bilam, on mataw en ta asor Juda a haiqta nagan in Juda mataw nenaq araqibmo Yesus awagamun dimunta tuwaqim in bunmo araqibmo Gimam God atatniz tiqiyim osayta ham. Osad in bunmo mataw en amulikmo iyim in bunmo Krais anon amulikmo tiqiyiymo ham. Iyan God in Krais Yesus amalib on mataw gidimun tonan haqad hel diqmo bilamta agamukan na in muran Krais ago on mataw bunmo gigota tiqiy ham. ⁷ God in ya itowun emim agem dimunta yagan in ago zaway ya iholib tiqem. Eman zaway na amalib ya Yesus awagamun dimunta na akaiyan emaiqta ⁸ God ago on mataw tawonta na bunmo gilikmanib ya ibin amik diq usaqta. Ta teq God kabiy dimunta na samanmo naw nog yag, Kabiy na ya on mataw en ta asor Juda a haiqta nagan gibilenid Krais in gilumsihta na ago in hurit daqayta.Teq Krais i gilumsihta na in nagah ayah diqmo iyan i a hi ulum kemamta. ⁹ God nagah bunmo giqeman osayta. Ad in on mataw en ta asor Juda a haiqta nagan gilumsihgo anad usta na in isihan kam sisaqmo diq ulilemim usta.Teq muran ya in anad ulilemim usta na ulalabmo bilqsa on mataw en bunmo tuhurit kemayta. ¹⁰ Nazaq iysa iyan on mataw Yesus ago nan huritad abin sorsa God anad dimdimunta amo amo na in gigo hib ulal tiqiyaq. Ulal iysa Heven-ib angelo giwaz meqinta maror gan osayta na teq bugaw aseseqta gibin inaqta nagan bunmo in tuhurit kemaymo. ¹¹ Kwaziq diqmo God daq nazaq emnan haqad anad emad osta. Ossa muran i gigo Ayahta Krais Yesus gwahtiqim in God anad na tuwol net bug. ¹² I Krais anan helmo haqad aholib soqotim inaq osad i God agerab loqnan a hi rabauqta. Haiqgam. Muran i God anognib gwahtiqsa nagah araq i gidanin a hi qwaya. ¹³ Nazaq iyan muran ya ne gibilenaiq.Ya ne gilumsihad santitiy soraiqta ta ka luweq ne ya ibiyad gidan sosil iydaq haqaiq. Haiqgam. Ne ya inan ginad dimniyan. Ya ne gimen afaqan ka sorsa God ago hib ne gibin inaq tiqiyay. Gibin inaq iyeq abeb teq ne le tugwahtiqeq dimun tuqos daqay. ¹⁴ Gimam Ayahta ne gilumsih naqmo hiqiyta na ya inadin emad ya in ayon ibakbakan ulum lawuwaiqt. ¹⁵ In on mataw Heven-ib teq og kab osayta na bunmo Gimamta teq inmo bilaqan on mataw en bunmo in gimo gimaman og kabta gihaqenib osaytamo. ¹⁶ Ye in ayon ibakbakan ulum laquwim turad ya ne gimen kazaq God bulonaiqta. God haiqaiq ni nibin teq ningo zaway ayahmo usaqta nazaqmo ni Efesus on mataw na ayahmo gilumsihmo haqaiq. Gilumsihad ni ningo Bugaw emid le in giduganib usad in ginad gigem inaq emid awaz meqniyan haqaiq. ¹⁷ Awaz meqniysaon mataw na Krais anan helmo haqsa Krais in gimuganib usanmo haqaiq. Sa Krais in ginan anad bilqaqta na in loyinad giwaz meqniyeq turiy haqaiq. Bilaqne ay aninin og aduganib wolehim og waz naqmo hiqiysa ay na zaway iyim turaqta nazaq nog haqaiq. ¹⁸ Nazaq iyeq teq Krais agem dimunta negaqta na in loyin kemiy haqaiq, ningo on mataw tuwonta bunmo loyinayta nazaq haqaiq. Loyinsa Krais i ginan anad bilaqaqta na in nagah ayah diqmo iyim ago sisaq pasanmo lehaqta na ago in ginad emiy haqaiq. ¹⁹ Teq nagah ulilibmo diq gwalehim abeqar ogibmo diq wolehaqta na ago in hurit kemiymo haqaiq. Hurit kemeq Krais ago daq na ayah diqmo iyim i ginad bunmo uriyamta nazaq in ginad emiymo haqaiq. Efesus on mataw na in nazaq diqta iyid teq ningo daq teq ninad dimdimunta nagan bunmo in giholib ate gwaleq usan haqaiq. ²⁰ Ari God ago zaway i gigemab kabiy emaqta na amalib in i gidimun diq tonaqta. Teq i ginad emad susumun ugauqta na in i igad in nagah asor i inadin a hi emqta ta inaqmo em igaqtamo. Igsa i nilingo biyab haiq. ²¹ Nazaq iyan kam bunmo tuteqmo on mataw Krais ago nan huritayta na in God abin iluwiy. Sa God in Krais Yesus ago hib abin ayahta waqanmo. Waqsa daq na muran useq le on mataw gidauhan abeb teq gwahtiq daqay na gigo kamub iyeq in nazaqmo leh tutan. Hel diqtaqmo.