¹ Amuto ge hilo tigia la ilisulisu ale mave sele e tama gatou abi tia gatou, ale via egite ge tola le etatou e latatu le Deo, me ale male etato guvi ti mae vola. me ale a la vuhula, ale la mautula kama rovi etatou, la vuhula a tai kama rovi eia. ² Eau masaga emei, igoie etato guvi ti mae e latule Deo, me a souka matagaga via etato ge maele, e tato rovia via mae la imala e Kraist ge sibitala, etato ge mae sele eia, me etato ge hilo eia mae moli eia lou, ³ Egite tomi ale tautaulailo oilo tetala igo maroka ti egite mae moli eia ale maroka viuviu. ⁴ Egite tomi la valalua ale igigo la iriru egite tilimuli la vulovulo la ragautu la viturila, la iriru eia la vulovulo la ragautu la viturila. ⁵ Amuto rovi tia mae e Kraist sibitala matagaga ti la vuhula ge abitaro la vulovulo ale kama kora, me oilo tetala la vulovulo ale kama kora ouka. ⁶ La tahalo isa kama koramuli ge mou oilo te tala goio age igigo lou la iriru. ouka la tahalo isa kama koramuli ge igo moli la iriru a goio ge via eia hilo ti eia ouka age via eia rovi eia. ⁷ Amuto latatu, la tahalo isa umala ge vituga galegale amuto loio la gauru, me la tahalo ale igigo la vulovulo la magiri matatala, eia matata. a mae moli ale e Kraist eia matata. ⁸ La tahalo ale igigo la iriru eia loio tela hitu. la hititu igo la iruru palati tela siloko la vipoupou, ale eia la vuhula ale e latu le Deo guvi palala. la vuhula ale eia ge igo bara la igolula tela tahalo kama kora. ⁹ La tahalo ale guvi halaba loio te Deo kama koramuli ge igigo moli la iriru. la vuhula la vavua la merera te Deo tabuli ti oilo tetala. eia kati koramuli ge igo lou la iriru la vuhula eia guvi halaba ti oio te Deo. ¹⁰ Me oilo moli tealeie e latatu le Deo me egite e latatau la hitu sibitala palala: la tahalo isa kama igigo la vulovulo ale kama tartigi eia kama loio te Deo, me eia tai kama la tahalo ale ge masaga e tabarala. ¹¹ Aleie eia la merera ale amuto lolotia pala tela silokolokola: etato ge masaga sele e tabara gatou. ¹² Etato umala ge igo mae e Kain, eia loio tela tahalo kama kora goio bili e tabarala. ilava eia bili eia? la vuhula la igolu tetala a loio tela tahalo kama kora me ale te tabarabarala a matata. ¹³ Amuto umala ge karuturutu, tabarabara gu, mae la valua la mautula kama ge masaga amutou. ¹⁴ Etato ge rovia mae etato gali taro ti la pileho me etato goilo ti tela mahulila, la vuhula etato masaga e tabarabara gatou, mae la tahalo isa kama masaga la gilogo ale eia solio mou oilo la pileho. ¹⁵ Mae la tahalo isa kama masaga e tabarala ale eia la tahalo la bilili. eme rovitia la tahalo la bilili la mahulila ale la tapasila ouka kama oilo tetala. ¹⁶ Me oilo moli teale etato rovi la gilogo, la vuhula e Kraist tau la mahulila sotalo tegatou, me etato tamai abia le tabarabara gato la mahulila tegatou, ¹⁷ Mae la tahalo isa tahoka la papaga la mautula ale taritigi, me eia hilo taro moli e tabarala ale pou la savelela, agoio kapi robo la hate la gilogo ale oilo tetala soio tetala, me la gilogo te Deo ge mou oilo tetala mave? ¹⁸ Amuto e latatugu, la masagala tegato kamage tela merera moli ouka tela kalamea gato moli, ouka age oilo tela vulovulo gatou mela seselela. ¹⁹ Aloio moli teale etato rovia mae etato loio tela merera la selela, me etato sugutaro la hate gato soio tetala. ²⁰ Mae la hate gatou igo geru lou etatou, e Deo uru tavuala hate gatou, me eia rovi tomi la papaga tomi. ²¹ Eau masaga emei, mae la hate gato kama ge igo gegeru etatou, ale etato tahoka la vagari uru soio te Deo. v22 ²² Me la rova etato ge tahia ovola ale eia ge abi gatou, la vuhula etato sautola la viturila tetala me etato igigo tai la papaga ale igo sagege eia. ²³ Aleie a la mera vagarila tetala, mae etato ge tautaulailo oilo tela isale latula e Isus Kraist me oio tai mae etato ge masaga e tabarabara gatou, age mae moli ale eia abi tia gato la mera vagarila tetala. ²⁴ La tahalo ale vimou la mera vagarila tetala la merera ge mou oilo tetala, e Deo tai ge mou oilo tetala. me oilo teale etato rovia mae eia mou ti oilo tegatou, loio moli tela kalulu maroka ale eia abitia gatou.