¹ Ne ginad ya inan helmo haqayta na hi hulosiy haqad ya gamuk ka gibilenaiqta ham. ² Abeb mataw ne gibaymuzad ne in ginaq bit humab wolayta humab a ta hi wol daqay ham.Helmo kam nab mataw na ginad em daqay,I Yesus ago mataw ka ginol emad i bilaqne God ayon tamaz em nog iyaq haq daqay ham. ³ Mataw na ya imam ago a hi huritayta ham. Ad in yaqgo a hi huritaytamo ham. Nazaq iyan in ne nazaq tigiton daqaymo ham. ⁴ Abeb mataw nazaq ne gimeqin tonsa ne yaqgo gamuk ka anadin a ta em daqay haqad ya muran kawa ne tigibilenaiq ham.Kwaziqmo ya nenaq luw osad nagah kagan ago ya ne a hi gibilenta ham. Na ezaqgo ya nenaq osad iyan ham. ⁵ Ari muran ya muleqim ya imam iqeman bolta na ago hib ta lehaiq ham.Ta teq ne gigo araq diq gibilenim bilaqaq , Ni edob lehaq? nazaq in a hi susumun yagaq ham. ⁶ Ad muran ya gamuk ka gibilensa ne huritad ginad a hi em hasad ne gigem afaqan diq iyaq ham. ⁷ Ya helmo ne gibilenaiq ham.Ya ne gilumsihnan haqad ya gihulosim imam ago hib tilehdaiq ham. Ya nab a hi lehid teq ne giteqsor na ne gigo hib a hi bolnag ham.Nazaq iyan yaqmo leheq teq mat na emid ne gigo hib tuboldaq ham. ⁸ In og kab boleq on mataw God gileh ugayta na bunmo giqisihunsa in daq meqinta emayta na ago gihol tiloyin daqay ham. Ad in giqisihunsa ezaq toneq God ameb titnonta iy daqayta na ago tuhurit daqay ham. Ad in giqisihunsa teq in hazizirib tursa God in ago daq gilum kemdaqta na ago in ginad tiqem has daqay ham. ⁹ on mataw God gileh ugayta bunmo in ya inan helmo a hi haqayta ham.Nazaq iyan ne giteqsor na boleq in on mataw na giqisihunsa in daq meqinta emayta na ago gihol tiloyin daqaymo ham. ¹⁰ Teq ya imam ago hib lehid ne a ta hi ibiy daqay ham.Nazaq iyan ne giteqsor na in on mataw og kabta na giqisihunsa in ezaq toneq God ameb titnonta iy daqayta na ago tuhurit daqayta ham. ¹¹ Teq God in mat meqinta og ka wamuzim osaqta na hazizirib emim ayon tibilayta ham.Nazaq iyan ne giteqsor na in on mataw God gileh ugayta na bunmo giqisihunsa in teq nazaqmo hazizirib tursa God in ago daq gilum kemdaqta na ago in ginad tiqem has daqay ham. ¹² Yaqgo gamuk kabemmo ne gibilendaiqta usaq ham. Teq ne muran huritgo ginad siqim iyaq ham. ¹³ Ari abeb God ago Bugaw gamuk helta bilaqaqta na boleq in ne ginad wamuzsa ne gamuk helta bunmo alulin tuhurit kem daqay ham. Teq in anadibmo gamuk a hi gibilendaqta ham. In yaqgo hib gamuk huritaqta naqmo in tigibilendaqta ham. Ad in nagah abeb teq gwahtiqdaqta na ago tigibilendaqmo ham. ¹⁴ God ago Bugaw na in ya ibin emid ayah iydaq ham.Na ezaqgo in yaqmo igo gamuk waqeq in ne gibilendaq ham. ¹⁵ Ya imam ago nagah bunmo in yaqgota ham. Nazaq iyan ya bilay,God ago Bugaw na in yaqmo igo gamuk waqeq gibilendaqta hay ham. ¹⁶ Kam asitmo tihiqiyid teq ne a ta hi ibiy daqay ham.Ad kam asitmo loq not kayeqmo ne a ta hi ibiy daqay ham. ¹⁷ Haqan in ago disaipel asor an bulonim bilaqiy, In biiaqaq, Kam asitmo tihiqiyid teq ne a ta hi ibiy daqay haqaq haqiy. Ad kam asitmo loq nog iyeqmo ne ta hi ibiy daqay haqaq haqiy.Teq in bilaqaq, Na ezaqgo ya imam ago hib lehdaiqta na ago haqad in bilaqaq haqiy.Gamuk ko alulin ezaq diqta in i gibilenaiq? haqiy. ¹⁸ Haqadmo in bilaqiy,Kam asitmota nawa in anan bilamta na in naga diq anan bilaqaq? haqiy.Nan kowa in bilaqaqta ko alulin ago i ginad a hi em hasauq haqiy. ¹⁹ Haqsa Yesus anad tiqam,Yaqgo disaipel in nan na ago susumun yagnan inad emay ham. Haqad in gibilan, Ya bilay, Kam asitmo tihiqiyid teq ne a ta hi ibiy daqay hay ham. Ad kam asitmo loq nog iyeqmo ne a ta hi ibiy daqay hay ham. Nan nawa ya bilayta na ago ne an bulonad osay ye? ham.20Ya helmo ne gibilenaiq ham. Ne gaqad gaq ayahmo tuwaz daqay ham. Sa on mataw God gileh ugayta na in ginad diq tidimniy daqay ham.Ne ginad ayahmo timeqniydaq ham.Ta teq ne ginad meqniyaqta na hiqiysa ne ginad tidimniy daqay ham. ²¹ Bilaqne Aw Amun baysa anad meqniyaqta nazaq ham.Na ezaqgo in amun emdaqta akaman tugwahtim ham,Ari in amun tiqemimo in santitiy anadin a ta hi emaqta ham.Na ezaqgo in ago amun muturta og kab tugwahtimta na ago in anad tidimniyaq ham. ²² Ad nazaqmo muran ne ginad ayahmo meqniyaq ham.Teq abeb ya bo ne ta gibiydaiqta nabmo ne ginad a ta tidimniydaq ham.Ginad dimniysa mataw ne gigo ginad dimniy na walemad biyab a hi iy daqay ham. ²³ Kam nab ne nagah araq ago a ta hi susumun yag daqay ham.Ya helmo gibilenaiq ham.Ne nagah araq ago ginad emad ya ibinib imam bulonsa in tinegdaq ham. ²⁴ Kwaziqmo ne nagah araq waqgo haqad ya ibinib a hi susumuniyta ham.Ari muran ya ne gibilenaiq ham.Ne susumunsa teq ne tuwaq daqay haqaiq ham.Waqeq ne ginad dimniy hasa osad ne nagah araq ago ginad a ta hi meqniydaq ham. ²⁵ 25 Gamuk kawa ya bilaqaqta ka ya gamuk awowun bilaqaiqta ham.Ari abeb teq ya gamuk awowun amalib a ta hi gibilendaiq ham.Kam na tugwahtiqnan tonaq ham.Gwahtiqid teq ya imam abin anononmo bilaq rireneqmo tigibilendaiq ham. ²⁶ Kam nab ne ya ibinibmo gimam Iyah tisusumun ug daqay ham. Ya ne gimen Gimam Iyah susumun ugid teq in ne gilumsihdaq nazaq ya hi bilaqdaiq ham. Na ezaqgo negmo teq Gimam Iyah tubulon daqay ham. ²⁷ Ne ya inan ginad bilaqsa osiyta ham.Ad ya imam ago hib osim bolta na ne anan helmo tihaqiymo ham.Nazaq iyan Gimam Iyah ne ginan anad bilaqaqta ham. ²⁸ Kwaziqmo ya imam inaq osim teq ya hulosim og kab bolta ham.Ta muran ya og ka hulosad ya imam ago hib ta lehaiq ham. ²⁹ Haqan in ago disaipel bilaqiy,Muran ni nan tibilaq sireqaq haqiy.Bilaq sireqad ni gamuk awowun a ta hi bilaqaq haqiy. ³⁰ Muran i ginad tiqem hasauq haqiy.Ni nagah bunmo ago tuhurit kamta haqiy. Mataw gigo susumun ginadib ussa in a hi bilaqsamo ni amenin emaqta haqiy.Nazaq iyan i ginad emauq ,Ni God- mo agerab osim bolta haqauq haqiy. ³¹ Haqan Yesus amenin emim bilam,Muran ne helmo tihaqay ye? ham. ³² Ne huritiy ham. Mataw ne giwamuzsa ne hares iyad giquliqab Tuke tileh daqay ham. Lehad ne ya ihulos ya immo tuqosdaiq ham. Kam na tugwahtiqnan tonad teq in tugwahtimta nog tiqiy ham. Ta teq ya imomo diq a hi osdaiq ham. Na ezaqgo ya imam in ya inaq osaqta ham. ³³ Ne ya iholib soqoteq inaq osad ne gigem kute nemdaq haqadya gamuk ka gibilenaiq ham.Ne og kab ossa afaqan teq ne gigo hib tugwahtiqdaq ham. Teq ne giwaz meqniy ham.Ya og ka ago zaway tuquriyam bugta ham.