¹ Yesus gamuk nawa na tibilaqim teq in ame ulilib Heven-ib gwalehsa in bilam,Ya imam ham.Ya ibin ayah iydaqta na akaman tugwahtim ham.Nazaq iyan ni nitatin abin emid ayah iyan ham.Ayah iyid teq in ni nibin emid ayah tiqiydaqmo ham. ² Ni og kab on mataw bunmo giqeman in ni nitatin ahaqenib tiqiyiy ham.Ad ni nitatin zaway ayahmo tuqugamo ham. Zaway ugan in mataw ni ugta na giqemid in tuteqmo kuluwa- kuluwmo tuqos daqay ham. ³ Teq os dimunta ahiqiy haiqta na alulin in kazaq ham. On mataw God diqmo ago tuhurit daqay ham. Huritad in Yesus Krais mat ni eman bolta na ago tuhurit daqaymo ham.Mataw na in gigo nazaq diq huriteq teq in os dimunta kuluwa-kuluwmo osayta na tuwaq daqay ham. ⁴ Ni kabiy yagta na ya eman tihiqiy bug ham.Ya nazaq emim nibin eman og kab ayahmo diq tiqiy ham. ⁵ Kwaziqmo og ka a hi gwahtiqsamo ya ibin ayahta inaq ni nimeb osaiqta ham. Ari muran ni ya ibin ayahta na a ta yagid kwaziqmo ya gimeb osyaiqta nazaqmo ya ta osiq ham. ⁶ Ni on mataw og kabta asor giyagan ya in gigo hib ni nibin eman ulal tiqiyta ham.Mataw na in ningota ham.Teq ni mataw na tiqigyata ham.Yagan ya ningo gamuk gibilenan in tuhuz bugayta ham. ⁷ Muran in ginad emay,Ni nagah bunmo yagta na in ninmo ningo hib bolta haqay ham. ⁸ Na ezaqgo ya gamuk bunmo ni yagta na tigibilen bugta ham.Teq ya ninaq osan ni ya iqeman bolta na ago in tuhuritim anan helmo tihaqaymo ham. ⁹ Ni yaqgo on mataw diq gilumsihdaq haqad ya kawa ni tigibilenaiq ham.Ya og kab on mataw gileh ugayta na gimen a hi nibilenaiq ham.Haiq ham. Ni on mataw giyagta naqmo ni gilumsihdaq haqad ya nibilenaiq ham.Na ezaqgo mataw naqmo in ningota ham. ¹⁰ Yaqgo on mataw in ningota ham. Ad ningo on mataw in yaqgota ham.Nazaq iyan yaqgo on matawta na gigo hib ya ibin ayahta tuway ham. ¹¹ Ad muran ya og kab a ta hi osdaiq ham. Ta teq yaqgo on mataw ka og kab tuqos tut daqayta ham. Os tutsa ya in gihuloseq ningo hib tilehdaiq ham. Ya imam dimun diqta ham.Ni nibin ayah diqta na tiyah ham.Nazaq iyan ni yaqgo mataw ya ibinib osayta ka giwamuz ham. Giwamuzsa in ginad gigem amulikmo iyeq osiy ham. Ya ninaq ginad gigem amulikmo iyim osauqta nazaq ham. ¹² Ni nibin ayahta na tiyah ham. Yagan ya mataw ya ibinib osayta ka giwamuzsa in dimunmo osayta ham. Ya in giwamuzsa in gigo araq diq nabag a hi iy ham. Ari mat amulikmo ni anan bilam, In teq meqniydaq hamta naqmo amomo in nabag iyta ham, Iyan daq na in ningo marib mat ananin usaqta na tuwol net bug ham. ¹³ Ad muran ya ningo hib tilehdaiq ham,Teq yaqgo inad dimniy in yaqgo on mataw gigemab ayahmo usdaq haqad ya og kab nenaq osad gamuk kagan bunmo tigibilen bugta ham. ¹⁴ Ya og kabta a haiq ham. Ad nazaqmo ya ningo gamuk yaqgo on mataw tinegan in ya isen muzim in og kabta a haiqmo ham. Nazaq iyan on mataw og kabta in yaqgo on mataw gigem meqinta negayta ham. ¹⁵ Ni yaqgo on mataw giwaqid in og kab a ta hi os daqay haqad nazaq ya a hi nibilenaiqta ham. Yaqgo on mataw og kab ossa ni giwamuzsa mat meqinta na a hi gimeqin tonan haqad ya nibilenaiqta ham. ¹⁶ Ya og kabta a haiq ham.Ad nazaqmo yaqgo on mataw in og kabta a haiqmo ham. ¹⁷ Ningo gamuk in helmo diq ham.Nazaq iyan ningo gamuk helta na in yaqgo on mataw gigemab kabiy emsa in ni giqemid ningo on matawmo diq iyiy ham. ¹⁸ Ni ya iqeman ya on mataw og kabta gigo hib bolta nazaqmo ya igo on mataw ka giqeman in on mataw na gigo hib tilehdaqaymo ham. ¹⁹ Yaqgo on mataw ka in ningo gamuk helta huriteq teq in gihol bunmo nigad in ningo kabiy amomo emgo os daqay haqad ya nazaqmo ihol bunmo tinigim ya ningo kabiy amomo emgo tuqosdaiq ham. ²⁰ Ari ya mataw kawa nenaq osaiqta ka gimomo ginan a hi nibilenaiq ham. Haiq ham. Mataw ka leheq on mataw ta asor gibilenid helmo haq daqayta na inaqmo ya ginadin emad gamuk ka nibilenaiq ham. ²¹ Nibilenid ni yaqgo on mataw na bunmo giqemid in ginad gigem amulikmo iyeq os daqay haqad, Ya iman ham ni yaqgo hib ossa ya ningo hib osaiqta nazaqmo yaqgo on mataw in i gigo hib osimmo haqad ya inad emaiq mo ham. Ossa on mataw ni gileh ugayta na in nazaq gibiyad in ya inan bilaq daqay,Helmo God in mat na eman bolta haq daqay ham. ²² Ni ya ibin eman ayahmo tiqiy ham.An yaqgo mataw ya ibinib gigem gind amulikmo iyeq os daqayta haqad ya ihol abin ayahta na in tineg daq ham.Negid ya ni ninaq gigem amulikmo iyim osauqta nazaqmo in tuqos daqaymo haqad ham. ²³ Ya in gigo hib ossa ni yaqgo hib tuqosdaqmo ham. Nazaq iyid teq yaqgo on mataw ka gigem amulikmo tiqiy haseq os daqay ham. Ossa og kab on mataw ni gileh ugayta na in gibiyad ginad em daqay,Helmo haq daqay,God-mo Yesus eman bolta haq daqay ham.Haqad ni ya inan ninad bilaqaqta nazaqmo ni yaqgo on mataw ginan ninad bilaqaqta na ago in tuhurit daqaymo ham. ²⁴ Ya imam ham, uliq ya osdaiqta nab ya on mataw ni giyagta nenaq osnan inad bilaqaq ham.Ya nenaq ossa in ya ibin ayahta teq ya ihol anuwan ni giyagta na ahol tuwaq daqay ham.Kwaziq diqmo og ka a hi gwahtiqsamo ni ya inan ninad bilaqsa osta ham.Na ago ni nagah aseseqta na tiyag ham. ²⁵ Ya imam ham,Ni daq titnonta emaqta ham. Og kab on mataw gileh ugayta na in ningo a hi huritayta ham.Teq ya ningo tuhuritta ham.Sa ni ya iqeman bolta na ago yaqgo on mataw ka tuhuritmo ham. ²⁶ Ya nibin eman yaqgo on mataw gigo hib ulal tiqiyta ham.Teq ya nibin eman gigo on mataw gigo hib ulal tiqiyta ham.Teq ya nibin emid in gigo hib ulal tiqiy hasdaq ham. Ulal iy hassa teq ni ya imam ninad bilaqaqta na ago adan in gigo hib ussa ya in gigo hib tuqosdaqmo ham.