¹ Yaqmo am wain-mo diq ham.Sa ya imam in am wain na anamren ham. ² Teq ya imam in ya iben anon a hi emayta na bunmo giqurotim hunegaqta ham. Ad in ya iben anon emayta na bunmo gisawan emad in ya iben samanta dimunta giqisih ugim usayta na giqurotim hunega iben dimunta na anon kabemmo emayta ham. ³ Ari ya gamuk tigibilenta naqmo in ne gisuholan ne giholib ginumlan haiq tiqiyiyta ham. ⁴ Ne ya iholib soqoteq inaq ossa teq ya ne gigo hib tuqosdaqmo ham. Am wain aben ahulib a hi soqoteq anon a hi emdaqta ham. Ad nazaqmo ne yaqgo hib a hi soqoteq ne ginon a hi em daqaymo ham. ⁵ Am wain na yaqmo ham. Sa ne ya iben ham. On mataw yaqgo hib ossa ta ya in gigo hib osdaiqta na in ginon kabemmo emayta mo ham. Na ezaqgo ne ya ihulos yageq ne ginon araq a hikidikmo em daqay ham. ⁶ Ya imam in on mataw yaqgo hib soqotim a hi osayta na giqurot tayan in miliyawim may bugaqta ham. Bilaqne mataw ay aben samanta urot tayim hunegan lehim mayaqta nazaq nog ham. Mataw ay aben samanta ginuwan afaqab eman oyaqta ham. ⁷ Nazaq iyan ya ne gigo hib ossa yaqgo gamuk ne gigemab ussa ne nagah ginad usaqta na ago susumun yagsa ya ne gimen tiqem negdaiq ham. ⁸ Ya ne gibilenaiq ham.Ne yaqgo disaipel iyeq ginon kabemmo emiy haqaiq ham,Na ezaqgo ya imam in daq naqmo ago hib abin ayahta waqaqta ham. ⁹ Ya imam ya inan anad bilaqaqta nazaqmo ya ginan inad bilaqaqmo ham.Nazaq iyan ya ne ginan inad bilaqsa ne ya hi holosiy ham. ¹⁰ Ne yaqgo gunun ya tinegta na muz bugsa teq ya ne ginan inad tibilaqsa ne ya a ta hi ihulosdaqay ham.Ya imam ago gunun muz bugsa in ya inan anad bilaqsa ya in a hi hulosdaiqta nazaqmo ham. ¹¹ Yaqgo inad dimniy in ne gigemab ayahmo usdaq haqad ya gamuk ka gibilenaiqta ham. ¹² Teq ne ginan inad bilaqaqta nazaqmo ne an anan ginad bilaqanmo ham. ¹³ Mat araq iyogniz ginadin emad gilinsihad gimen ahol nog hulosdaiqta na, Daq na in an anan ginad bilaqgo adan bunmo giquriyamim in ameb diqta ham. ¹⁴ Ne yaqgo gunun ya nawa tigibilenta na muz bugsa teq ne ya iyognizmo diq tiqiy daqay ham. ¹⁵ Kabibiy mat ago ayahta daq emsa in daq na alulin a hi hurit kemaqta ham. Teq ne nazaq a haiq ham. Ya imam ago hib gamuk bunmo hurita na ya ne tigibilen bug ham. Nazaq iyan ya ne ginan yaqgo kabibiy mataw nazaq a ta hi bilaqdaiq ham. Muran ya ne ginan ya iyognizmo diq tibilaqaiq ham. ¹⁶ Ne ya inan ni i gigo Haqan ya a hi osaiqta ham. Haiq ham. Yaqmo ne ginan yaqgo Haqan ne osayta ham. Ne yaqgo kabiy emgo haqad ya ne gitowun tiqem ham. Emad ya bilay, Ne leheq yaqgo kabiy emsa ne gigo kabiy na anon eman hay ham. Anon emid teq anon na tuqus tutaq haqad ya bilay ham. Nazaq iyan ne ya ibinib nagah araq anan Gimam iyah bulonid in tinegdaq ham. ¹⁷ Ya gunun araq kazaqmo ne negaiq ham. Ne an anan ginad bilaqsa osiy ham. ¹⁸ Og kab on mataw God gileh ugayta na gigem meqinta negsa teq ne ginad emiy ham. Mebmebmo in gigem meqinta ya yagiymo haqiy ham. ¹⁹ Helmo ne og kabta iyid teq on mataw og kabta ne ginan ginad bilaq nagiy ham, In gimo an anan ginad bilaqsa osayta nazaqmo ham.Teq haiq ham. Ya on mataw og kabta bunmo gilikmanib ne giluwiyim giwaqan ne og kabta a ta hi iyayta ham. Nazaq iyan on mataw og kabta gigem meqinta ne negayta ham. ²⁰ Teq on mataw God gileh ugayta na in ya ibaymuzad imeqin imeqin toneq in ne gibaymuzad gimeqin ton daqaymo ham.Ari on mataw yaqgo gamuk huriteq in ne gigo gamuk tuhurit daqaymo ham. Nazaq iyan ya mebmebmo ne gibilenim bilay,Kabibiy mat in ago ayahta a hi itiyondaq hayta na ne anadin emiy ham. ²¹ Mataw og kabta na in mat ya iqeman bolta na ago a hi hurita ham.Nazaq iyan ya ibin ne gigo hib ussa in ne gibaymuzad gimeqin ton daqayta ham. ²² Helmo ya mataw na gigo hib boleq a hi gibilenta iyid in daq meqinta emayta na ananin a hi waq nagiy ham.Teq ya bolim tigibilen ham.Nazaq iyan in daq meqinta emayta na ananin tuwaq daqay ham.Ananin waqad in gamuk araq bilaq daqayta haiq tiqiy daqay ham. ²³ Mat agem meqinta ya yahad in agem meqinta God ugaqtamo ham. ²⁴ Mat araq boleq ya kabiy emta nazaq in a hi em nag ham.Nazaq iyan ya og kab boleq kabiy a hi emta iyid mataw og kabta in daq meqinta emayta na ananin a hi waq nagiy ham.Teq haiq ham.Ya og kab bolim kabiy emsa in ahol tuwaq kemiy ham.Ahol waqad in gigem meqinta ya yagad in ya imam tuqugaymo ham. ²⁵ In gigo daq nawa na in gamuk araq in gigo marorib mar tonan usaqta na tuwol net bug ham.Gamuk na bilam.Mataw na gigem meqinta samanta yagiy haqad in bilam ham. ²⁶ Ari ya imam ago hib leheq teq ya ne giteqsor na emid ne gigo hib tuboldaq ham.Na in God ago Bugaw Dimunta gamuk helta bilaqaqta ham. In Gimam Iyahta inaq osaqta ham.In boleq ya mat ezaq diqta na ago ne in tigibilendaq ham. ²⁷ Teq kwaziqmo ya og kab kabiy alulin emsa ne ya ibiyad osim bo muran kawa tiqiy ham.Nazaq iyan ne nagah gimeb ahol waqiyta na ago ne on mataw gibileniymo ham.