¹ Ari Yesus in ago disaipel bunmo gibilenim bilam, Ne gihol afaqan iysa ginadnad hi emiy ham. Ne God anan helmo haqad ne ya anan helmo haqiymo ham. ² Ya imam ago bit adugan kabemmo usaqta ham. Nazaq iyan ya leheq ne gimen ban wastitaynan ham. Ya nazaq emnan inad a hi usta iyid ya ne gimen ban wastitaynan haqad nazaq a hi gibilen nagta ham. ³ Ya leheq ne gimen ban wastitayeq teq ya muleqeq ta boldaiq ham. Boleq ya ne giwaqeq giqad yaqgo sawab tilehdaiq ham.Giqad lehid uliq ya osdaiqta nab ne tuqos daqaymo ham. ⁴ Teq ya uliq lehdaiqta na ago dante ne tuhuritiy ham. ⁵ Haqan Tomas bilam, Iyahta ham ni edob lehaqta na i a hi hurit ham. I ezaq toneq teq dante na ago hurit kemim? ham. ⁶ Haqan Yesus bulon, Dante ya imamgo hib lahta na yaqmo ham. Ya gamuk helta na alulin diq mo ham. Teq yaqmo on mataw giqeman kayeqmo kuluwa- kuluwmo osayta ham. On mataw dante amulikmo ya gimen emdaiqta naqmo muzineq teq in le imam ago hib tugwahtiq daqay ham. Dante amo amo haiqgam ham. ⁷ Ne yaqgo huriteq teq ne ya imam ago tuhurit daqaymo ham. Ari muran ne in ago ituhuritad teq ne in ahol tuwaqaymo ham. ⁸ Haqan Filip bulon,Iyahta ham ni nimam i giqisihun ham. Giqisihunid i ahol waqad teq i ginadnad a ta hi emad i nagah araq ago a ta hi susumunam ham. ⁹ Haqan Yesus bulon,Filip ham ya nenaq kam sisaqmo tuqos ham.Ta teq ni yaqgo a hi huritaq e? ham. Mat ya ibiyaqta na in ya imam ahol tuwaqaqmo ham. Ezaq haqad ni bilaqaq.Ni nimam i giqisihun haqaq? ham. ¹⁰ Ya imam ago hib ossa in yaqgo hib osaqmo ham. Na ne anan helmo a hi haqay e? ham.Ya gamuk gibilenaiqta ka ya inadibmo a hi bilaqaiq ham. Ya imam ya iholib osad ago kabiy emaqta ham. ¹¹ Ya bilay,Ya imam ago hib ossa in yaqgo hib osaq hayta na ne anan helmo haqiy ham.Ari ne yaqgo gamuk na anan helmo a hi haqeq teq ne yaqgo kabiy naqmo anadin emad ya inan helmo haqiymo ham. ¹² Ya helmo ne gibilenaiq ham.Mat ya inan helmo haqaqta na in ya kabiy emaiqta nazaqmo in kabiy ayahmo diq emad in ya kabiy emta na tuquriyamdaq ham.Na ezaqgo ya imam ago hib lehdaiqta na ago ham. ¹³ Lehid teq ne ya ibunib nagah anan susumunsa ya tiqem negdaiq ham.Nazaq emad teq Gimam Iyah in Atatin ago hib abin ayahta tuwaqdaq ham. ¹⁴ Ne ya ibunib nagah araq ago susumun yagsa ne inad usaqta nazaq ya tiqem negdaiq ham. ¹⁵ Ari Yesus bilam,Ne ya inan ginad bilaqsa teq ne yaqgo gunun ya gisuhunta na bunmo anonon diqmo tumuzin daqay ham. ¹⁶ Teq ya imam susumun ugid in ne giteqsor araq awaz meqinta na tinegdaqmo ham.Negid in ne nenaq tuteqmo tuqosdaq ham. ¹⁷ Mat ne gilumsihaiqta na in God ago Bugaw gamuk helmo bilaqaqta naqmo ham.Og kab on mataw God gileh ugayta na in God ago Bugaw ahol a hi waqad teq in ago a hi huritayta ham.Nazaq iyan in Bugaw na a hi waq daqay ham.Ari negmo teq Bugaw na ne gilikmanib osaqta ham.Osad teq in ne giduganib tuqosdaqmo ham.Nazaq iyan ne in ago tuhuritiyta ham. ¹⁸ Ya ne gihulosid ne onmin ginenmaman haiqta nog a hi os daqay ham.Haiq ham.Ya teq ne gigo hib ta boldaq ham. ¹⁹ Sisaq haiq og kab on mataw God gileh ugayta na a ta hi ibiy daqay ham.Ari negmo teq ya tiqibiy daqay ham.Ya kayeqmo osaiqta ham.Nazaq iyan ne kayeqmo tuqos daqaymo ham. ²⁰ Kam nab teq ya imam ago hib osaiqta na ago ne tuhurit daqaymo ham.Teq ne yaqgo hib ossa ya ne gigo hib osaiqta na ago ne tuhurit daqaymo ham. ²¹ On mataw yaqgo gunun giwaqim muzinayta na in ya inan ginad bilaqayta ham. Teq in ya inan ginad bilaqsa ya imam in ginan anad bilaqdaqmo ham. Sa ya nazaqmo mataw na ginan inad bilaqsa ihol tigiqisihundaiq ham. ²² Yesus nazaq haqsamo Judas ta araq in mat uliq Kariyot- ibta na a haiqta,In Yesus kazaq bulon, Iyahta ham ezaqta ago ni nihol i gimomo giqisihunta? ham.Ad ni og kab on mataw ta asor na bunmo nihol a hi giqisihundaq? ham. ²³ Haqan Yesus bilam, Mat ya inan anad ayahmo bilaqaqta na in yaqgo gamuk tumuzdaq ham. Sa ya imam in mat na anan anad ayahmo tibilaqaiq ham. Ad ya imam inaq kuluwa- kuluwmo tuqosam ham. ²⁴ Ari mat ya inan anad a hi bilaqaqta na in yaqgo gamuk a hi muzinayta ham.Teq ya gamuk negaiqta ka in yaqgota a haiq ham.Gamuk na in ya imam iqeman bolta naqmo ago gamukta ham. ²⁵ Ya nenaq osad gamuk nawa na bunmo tigibilenta ham. ²⁶ Ari ya imam teq ya ibunib inmo ago Bugaw Dimunta na emid tuboldaq ham.Ne giteqsor na boleq teq in ne gilumsihad nagah bunmo ago asuleqin tinegdaq ham. Ad in ne ginad enqenunid eraqsa ne yaqgo gamuk bunmo ya negta na anadin a ta em daqay ham. ²⁷ Ya ne giqemid ne gigem kute nemsa os daqay ham. Yaqmo igem kute nemim usaqta nazaq nogmo ya negid ne gigem kute tinemdaqmo ham.Teq on mataw og kabta gigem kute nemsa osayta nazaq nog ya a hi negdaiq ham.Ne gihol afaqan iysa ginadnad hi emiy ham.Ad ne hi rabiy ham. ²⁸ Ari ya gibilenim, Ya ne gihuloseq leheq teq ya ne gigo hib ta boldaq Haqsa ne tuhuritiy ham.Ne ya inan ginad bilaqsa teq ya bilay, Ya imam ago hib lehaiq Haqsa ne huritad ginad tidimniy nagiy ham.Na ezaqgo ya imam ago zaway in yaqgo zaway uriyamim usaqta ham. ²⁹ Daq nawa ya teko anan bilayta na a hi gwahtiqsamo ya anan kawa ne tigibilenta ham.Abeb daq na gwahtiqsa ne ahol waqad teq ne ya inan helmo haq daqay haqad ya muran kawa ne tigibilenaiq ham. ³⁰ Ya nenaq nan sisaqmo bilaqad osgo akamun haiq tiqiydaq ham.Na ezaqgo mat meqinta og ka wamuzim osaqta na tibilaq ham.Teq in anadibmo ya gimeqin tongo in ago zaway haiqta ham. ³¹ Ya imam ibilanta nazaqmo ya emaiqta ham.Ya nazaq emad teq ya imam anan inad bilaqaqta na ulal iysa on mataw og kabta bunmo tuhurit daqay ham.Ari ne eraqya i lehuq ham.